Dual Panel1Tempo donetoo di hao di Antiokhia ahake' sangngaka-sangngaka nabi anna tuangkuhu solana Saulus dianto: Barnabas, Simeon ang si disangai ta Maloteng, Lukius mesa to Kirene, anna Menahem ang sibaha lobo' Tomaraya Herodes.
2Pihsang tempo yato tau lella' menomba dai' di olona Dehata anna ma'puasa, ya' ma'karang Inaha Masero naoatee, "Pasenga'ingkä' Barnabas anna Saulus aka' la ungkähäng pengkähängang ang puha kupama'tantuing."
3Puhanna ma'puasa sala anna ma'sambayang, nasahpang yato derua tau mane nasuoi le'ba'.
4Aka' pahentana Inaha Masero mengkalaong Barnabas anna Saulus naposolai Yohanes Markus ang la mandului, naung di Seleukia mane tahhi'i sau di Siprus mokahpala' uhai. Lambi'na di Bohto Salamis umpepainsamming Bahtakara Dehata yaling di pa'sambayanganna to Yahudi.
5(13:4)
6Ya' napesambaing naola yato ongeang lambi' pano di Bohto Pafos. Tahpana di hao sitammung mesa to Yahudi disanga Bar-Yesus mesa to pa'ihsang ang unsangai kalaena nabi ampo' setonganna loseng.
7Si sibaha lolong tuambahsa' yato di ongeang ang disanga Sergius Paulus, mesa to manähäng. Ya' untambaing Barnabas sibaha Saulus yato tuambahsa' anna malai unghingngi Bahtakara Dehata.
8Ampo' Barnabas anna Saulus napamasuhsa yato to pa'ihsang (ang disanga ta Elimas yaling di basa Yunani) anna malai yato tuambahsa' dai mampetahpa'.
9Ta Saulus nei' bahtu' dioatee Paulus napunnoi Inaha Masero menge umpahandang Bar-Yesus
10anna ma'karai naoatee, "O änä'na setang, to supung mambulitu' anna ang si umbabe liu kakarakeang sibaha umpa'bali ingkänna kamapiaang, daliukake' la umboli umpabengko' lalang marohona Dehata?
11Dinoa la unsa'ding teyyena Dehata sule napabutao. Yaling di sangngaka-sangngaka allona dao la ungngita mata allo." Ya' buta siarang yato tau kasapu-sapu umpeäng tau ang la mantehte.
12Naitanna tuambahsa' yato kadahiang, ya' mampetahpa' siarang aka' tungke'du' toe' unghingngi pepakuhu didiona Puang Yesus.
13Ya' umpelleing Pafos Paulus sibaha solana le'ba' mokahpala' sau di Bohto Perga di Pampilia. Ampo' Yohanes nei' mensähä' di solana anna sumulei dai' di Yerusalem.
14Sika mengkalaong di Perga umpatahhi' pellaoanna lambi' dai' di Bohto Antiokhia di Pisidia. Tahpana di allo katohhoang le'ba'mi tama di pa'sambayanganna to Yahudi anna mohko'i yaling.
15Puha dibata yaling mai di suha' pepakuhunna Musa anna yaling mai di suha'na ingkänna nabi, ya' sika nasuong pebulle ada' yaling di pa'sambayangang naoaintee, "Oa' solasohong, ponna aha pepakahanga ang la untula' pano di tau mai'di, ya' tula'i."
16Ya' ke'de'mi Paulus anna ungngängkä'i teyyena umpamahtang tau mai'di mane ma'karai naoatee, "O ingkämmua' to Israel anna ingkänna ang mahea' dai' di Puang Alataala, pehingngi manahpaia' inde tula'ku!
17Puang Alataala ang tapenombaia' ingkänta to Israel puha umpillei neneta anna napapembea' naonge tohhoi di hao di Mesir. Sibaha kakuasaanna mantehte yaling mai di Mesir.
18Uhpa' pulo pahiamanna naongei Puang Alataala sa'bara' ungngita pembabenaii di hao di ongeang makä'däng.
19Tahpana puha untalo ihsinna pitu katomarayaang di hao di Kanaan, nabahe-baheming yato tampo pano di neneta la napomana'.
20Ingkänna kadahiang yatoo umbai uhpa' atu' limampulo pahiamanna masaena. Puhanna yatoo, sika nabeang Puang Alataala to manghohto' ang la ma'pahenta lambi' pano di tempona Nabi Samuel.
21Mane sika umpalaui mesa tomaraya lambi' nabea Puang Alataala Saul änä'na Kis peänä'anna Benyamin. Uhpa' pulo pahiamanna ma'pahenta.
22Tahpana Puang Alataala ungngalang inde Saul, ya' untuho bung Daud la mendahi tomaraya. Ma'karang Puang Alataala didiona inde Daud naoatee, 'Daud änä'na Isai ang naala inahangku aka' la diang pole' umpembabeing pa'elo'ku.'
23Anna situhu' pa'dandianna Puang Alataala, peänä'anna Daud naängkä' mendahi To Mepasalama' yaling di alla'na to Israel, diantoo Puang Yesus.
24Akinna sule Puang Yesus inang puhang natula' Yohanes pano di ingkänna to Israel naoatee, 'Pengkatoba'koa' anna umbehoi kalaemu ditero'.'
25Tahpana la puhang pengkähänganna Yohanes si ma'karang naoatee, 'Tadiaete' kodi' ang si unsangaa' To puha Dilanti' la Mepasalama' ampo' mane la suleete' dako'. Tandana keangka' yato Tau, moi la mensabua' pälli'ä' di olona datukä' sihatang.'
26Dahi, ingkämmua' solasohongku, noa peänä'anna Abraham, noa toi to mahea' dai' di Puang Alataala, dipalambi'imingkea' kaheba kasalama'ang.
27Aka' ihsinna Bohto Yerusalem sibaha ingkänna sepongkahaanna dai nainsang naoatee Puang Yesus To Mepasalama'. Datoi nainsang kalemba'anna tula'na ingkänna nabi, yato ang si dibata liu ke lambi' bung allo katohhoang. Dahi sika ungngalang kabohtuang anna napapepateii situhu' yato ang natula' ingkänna nabi.
28Moinnakato dai aha nalambi' suhunna anna malai dipatei ampo' sika napalau liu siang pano di Pilatus anna malai dipatei.
29Tahpana yato ihsinna Yerusalem sibaha ingkänna sepongkahaanna puha umpasundung yato ang puha tiuki' didiona Puang Yesus, sika napatuhummi yaho mai di kayu sitambeng anna napatamai di ku'bu'.
30Ampo' napatuho sumule Puang Alataala di hoi' mai di alla'na to mate
31anna sangngaka-sangngakake' allona naonge si umpepaitaing Kalaena pano di ingkänna to pentindo'na, mengkalao di hao di Galilea lambi' dai' di Yerusalem anna dianto ang mendahi sa'binna pano di to Israel.
32Dahi dinoa kitula'ingkoa' Kaheba Mapia: Pa'dandianna Puang Alataala pano di neneta
33sundummi pano di kita'a' peänä'anna. Aka' umpatuho Puang Yesus di hoi' mai di alla'na to mate. Situhu' karanna Puang Alataala ang tiuki' yaling di suha' pampudianna Daud ang kaderuanna naoatee, "Diontoo änä'ku; mengkalao allo dinoa kupamalesong kuoatee Kodi'mitoo Ambemu."
34Puha napatuho Puang Alataala di hoi' mai di alla'na to mate anna dang la napabei la ungngolai sala kamateang, situhu' ang puha tiuki' yaling di Suha' Maserona naoatee, 'Ingkänna pebehe maseroku ang mala dipetahpa' la kubea touo sinnoa ang puha kubea Tomaraya Daud.'
35Anna naoa toitee Tomaraya Daud yaling di pampudiang senga'na: 'Dai la umpabei To Maseromu la bosi.'
36Ampo' Tomaraya Daud naonge puhanna umpembabeing paelo'na Puang Alataala, ya' mateng anna diku'bu'i di behinna neneta anna inang bosiete' nei'.
37Ampo' Puang Yesus ang puha napatuho sumule Puang Alataala daine' bosi.
38Dahi pahallua' ungnginsang ingkämmua' solasohongku: aka' sanganna Puang Yesus, dipepainsangnging didiona pangngampungang dosa.
39Aka' menna-menna umpetahpa' Puang Yesus, la dilahpa' di hao mai di ingkänna dosa, ang dai aha dilambi' noa ke umpentokeike' tau pepakuhunna Musa.
40Dahi pentokei manahpaia' inde tula'ku. Madakakoa' andana la dahii pano di kalaemua' yato aka ang puha natula' nabi yaling di suha'na dianto:
41'Kalehaiia' ingkämmu ang umpakauho-uho to mampetahpa'. La pusa'koa' lambi' mate aka' la kubabeng mesa pengkähängang yaling di tempo ang ungngongeia' dinoa. Ampo' dasiangnga' la umpetahpa' moi la aha tau mantula'ingkoa'.'"
42Tahpana la mensohommi Barnabas sibaha Paulus sika napalaung tau mai'di ke la malai ma'tula' buke' ke lambi' bung allo katohhoang.
43Soho' ma'sambayang, mai'ding ang inang to Yahudi anna ang senga' ang mahea' dai' di Puang Alataala untindo' Paulus sibaha Barnabas lambi' napakuhu anna napahenta anna malai tontong lolo untokei mana' pa'kalemunna Puang Alataala.
44Tahpana lambi' bung allo katohhoang sai'di' tala sule asang ihsinna yato bohto mahoa' ma'himpung la umpehingngii Bahtakara Dehata.
45Ampo' naitanna to Yahudi yato tau mai'di, ma'kasueheng lambi' sika napetaha-tahai anna umbahoii yato tula'na Paulus didiona Puang Yesus.
46Ampo' sibaha kabahaniang ma'kara Paulus sibaha Barnabas naoatee, "Setonganna inang dioete'a' la dolu umpehingngii inde Bahtakara Dehata, ampo' daia' ungngaku untahimbo. Sinnoanna ungngoaa'tee, 'Daang kami' la sihatang untahimbo katuhoang sapano-panona.' Dianto anna mempakoang pano di tau ang tadia to Yahudi.
47Aka' naoaingkante Dehata, 'Puhakoa' kutuho la mendahi ballo pano di ingkänna tau ang tadia to Yahudi anna malakoa' umpepainsangnging kasalama'ang lambi' pano di sikunna lino.'"
48Ya' tahpana nahingngi yato tula' ingkänna tau ang tadia to Yahudi, sika mahasang inahanna anna umpakäyyängngi Bahtakara Dehata. Ya' napetahpa' asammi pole' ingkänna tau ang puha natuho Puang Alataala la untahimbo katuhoang lambi' sapano-panona.
49Lambi' tisembu' Bahtakara Dehata pano di umba-umba naongei yaling yato di lembäng.
50Ampo' to Yahudi umpakeaha' ingkänna to dipakeangka' yaling yato di bohto mahoa' sibaha bahine ang mahea' dai' di Dehata. Napakeaha' anna malai undahha Paulus sibaha Barnabas anna nasuoi le'ba' umpellei yato lembäng.
51Ya' unsapuing dolu ähäng tampo di bihti'na Paulus sibaha Barnabas, aka' la mendahi tanda pano yato di tau ang dai mantahimbo pepakuhunna, anna yato tau datoe' natahimbo Puang Alataala. Mane le'ba'i pano di Ikonium.
52Ingkänna to mampetahpa' di hao di Antiokhia napunnoi kakahsiang anna Inaha Masero.