Dual Panel1Ya' umpatahhi'mi pellaoanna Paulus sibaha Silas mangngola Amfipolis anna Apolonia le'ba' pano di Bohto Mahoa' Tesalonika. Di hao aha pa'sambayanganna to Yahudi.
2Sinnoa biasa, le'ba'mi Paulus tama di pa'sambayangang. Pentallung allo katohhoang sihuntung-huntung naongei Paulus umpakaleso anna unsitula'-tula'i Bahtakara Dehata sibaha tau mai'di.
3Napakaleso si'da-si'da situhu' ihsinna Suha' Masero pano di tau mai'di naoatee, "Yato To Dilanti' la Mepasalama' dai mala tala unsa'ding kamadahhaang lambi' dipatei anna dipatuhoi di hoi' mai di alla'na to mate. Puang Yesus ang kupainsangngikoa', diantoo To Dilanti' la Mepasalama'."
4Ya' ahang sangngaka-sangngaka to Yahudi ang di hao donetoo mampetahpa' lambi' umpempakoi Paulus sibaha Silas. Anna mai'di tuke'ne' tau senga' ang mampetahpa', noa tau ang tadia to Yahudi ang mahea' dai' di Puang Alataala, noa toi bahine ang dipakeangka'.
5Ampo' mai'di to Yahudi ma'kasuehe lambi' unghimpung ingkänna to pa'maho-maho yaling di pasa' anna napopa'mesai umpaaha kasiba'diang yaling di bohto mahoa'. Ya' ullebong dasanna Yason umpeäng Paulus sibaha Silas aka' la nabaha pano di olona tau mai'di la dihohto'.
6Ampo' tahpana dai nalambi', ya' Yason-mi sibaha sangngaka to mampetahpa' nahui' pano di to keangka'na yato bohto lella' sika tamba naoatee, "Yato tau si umpaaha kakarakeang tama di lino, ya' dinoa sule tunne' dinne.
7Anna inde Yason untahimbo yato ang sule lambi' nadasangngi. Ingkänna babena dai sihatang atohanna Katomarayaang Roma aka' naoatee, 'Aha are' tomaraya senga' ang disanga Yesus.'"
8Tahpana nahingngi tau mai'di anna ingkänna to keangka'na bohto mahoa', ya' sika keaha'mi.
9Ya' umpalaung doi' pano di ta Yason anna pano di solana anna napalau toinne' anna ma'dandii dai la umpaaha bou kakarakeang. Ya' puharang nabaya' mane dilahpa'i.
10Benginna yatoo ingkänna to mampetahpa' di hao di Tesalonika sika unsuo siang Paulus sibaha Silas naoaintee, "Lupanokoa' di Berea." Lambi'na pano mentamang di pa'sambayanganna to Yahudi.
11Ingkänna to Berea mapia inaha nei' andana to Tesalonika, aka' untahimbone' Bahtakara Dehata sibaha kamasannangang inaha lambi' allo-allo umpahehsa lolo Bahtakara Dehata, aka' naoatee, "Bahtu' tahpa' si'darakae' inde pepakuhunna Paulus?"
12Lambi' mai'di tau umpetahpa' Puang Yesus: noa to Yahudi, noa toi ang tadia to Yahudi, moi bahine ang dipakeangka', moi muane.
13Ampo' tahpana nainsang sangngaka-sangngaka to Yahudi di hao di Tesalonika naoatee umpepainsang buming Bahtakara Dehata Paulus di hao di Berea, sika le'ba'ing pano anna umpentama alla'i tau mai'di lambi' sika keaha' pano di Paulus anna Silas.
14Sika napenandai siang ingkänna inde to mampetahpa' di hao di Berea unsuo Paulus pano di behing le'bo'; supung Silas sibaha Timotius ang tohhoke' nei'.
15Ingkänna ang umposola Paulus naposola lambi' pano di Bohto Mahoa' Atena. Tahpana la sumule, sika napasammi Paulus naoaintee, "Painsangngii Silas sibaha Timotius anna baha' sulei napellambi'iä'."
16Lella' Paulus ungngempei Silas sibaha Timotius di hao di Bohto Mahoa' Atena, ya' mapi'di' liung inahanna ungngita to di hao si umpenombai tau-tau.
17Lambi' umpa'tula'i to Yahudi anna tau senga' ang mahea' dai' di Puang Alataala yaling yato di pa'sambayangang. Noa tunne' allo-allo si sipa'tula' sibaha ingkänna ang si nasilambi'ing di hao di pasa'.
18Ya' sule tunne' samai tuangkuhu yaling di pepakuhunna Epikuros anna Stoa anna sika sibehtai Paulus. Aha ang mangngoatee, "Aka ang natula' inde to si mai'di tula' kale?" Aha sangngaka ang mangngoatee, "Umbai ang umpepainsangnging pepakuhunna dehatanna ang dai diinsang dinne." Aka' ta Paulus umpepainsangnging Kaheba Mapia didiona Puang Yesus sibaha katuhoanna sumule di hoi' mai di alla'na to mate.
19Lambi' sika umposolang Paulus pano di pa'limboanna to panghohto' ang disanga Areopagus anna naoaintee, "Pemalaang la umpainsangngi yato pepakuhu bakahu ang si umpepainsangnging.
20Aka' yatoo pepakuhu ang umbaha, senga'-senga' kihingngi. Dahi pemalaang kiinsang aka kalemba'anna."
21(Ingkänna to di hao di Bohto Mahoa' Atena, noa ang inang to di hao, noa tunne' ang to sule, si nakärä'i untibe tempona umpehingngii anna untula' didiona kaha-kaha bakahu.)
22Ya' ke'de'mi Paulus yaling di alla'-alla'na to pa'himpung di hao di Areopagus anna ma'karai naoatee, "Oa' ingkämmu to Atena, kuita ingkänna pembabemu dakoa' aha tala meada' pano di ingkänna dehatammu.
23Aka' tahpaku ma'lao-lao yaling di bohtomua', ya' kuitang ingkänna ongeang penombaammua'. Anna kulambi' toi mesa ongeang penombaang diuki' di hao naoatee, 'Penombaang dai' di dehata ang tadiinsang.' Yato Dehata ang umpenombaia' ampo' daia' ungnginsang, dianto inde ang kupainsangngikoa' mating.
24Puang Alataala ang puha umpadahi lino anna ingkänna ihsinna, dianto Dehatanna langi' anna lino. Dai tohho yaling di dasang ang napapia hupatau,
25anna datoi pahallu nadului hupatau, sinnoanna si aha kakuhanganna. Aka' Diaete' ang umbea katuhoang anna ingkänna aka-aka pano di hupatau.
26Aka' supung mesa tau napake naonge umpadahii ingkänna hupatau anna malai la umpunnoi inde lino. Dia toi ang puha ungngäto' lohpo' tempona ingkänna hupatau anna ungngalla'i ingkänna ongeannaii.
27Napanoa Puang Alataala anna malai le'ba' leleng hupatau umpeäng Puang Alataala umbato ke malai nalambi'. Aka' setonganna dasiamingkea' sikahaoang Puang Alataala.
28Aka' yaling di kakuasaanna lambi' malaingkea' tuho anna malaingkea' mengkähäng. Darakate' si natula' siamingkoa' to manähämmua' naoatee, 'Kita' toia' peänä'anna Dehata.'
29Dahi ke peänä'annaingkea' Puang Alataala, daete' la mala tapasinnoaa' tau-tau bulahang, tau-tau pera' anna tau-tau batu, aka' ingkänna yatoo sangka' dipapia situhu' kamanähänganna hupatau.
30Aka' dolu Puang Alataala dai umpasuhungngi babena hupatau aka' bala' sika tanainsanna yato pembabenaii, ampo' dinoa napainsangngimingkea' pole' Puang Alataala naoatee, 'Ingkänna tau yaling di lino pahallu mengkatoba'.'
31Ma'kara noa aka' puhang napama'tantu lohpo' allo ang la naonge unghohto' maroho pembabena to lino. Pengkähängang yatoo la nabea pano di tau ang puha napillei. Anna napepaitaing umpake tanda ang maleso naita hupatau, napatuho di hoi' mai di alla'na to mate."
32Tahpana sika unghingngi tula' didiona katuhoanna sumule to mate, ahang sangngaka-sangngaka tau ang mampetaha-tahai, ampo' aha toe' ang mangngoatee, "Allo sala buke' kipehingngii tula'mu."
33Ya' le'ba'mi Paulus umpellei yato pa'limboang.
34Ampo' aha toe' sangngaka-sangngaka muane mentindo' pano di Paulus anna umpetahpa'i Puang Yesus, sinnoanna Dionisius, mesa toe' to panghohto'na Areopagus. Anna aha tuke'ne' mesa bahine disanga Damaris anna sangngaka-sangngakake' tau senga'.