Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 22 >> 

1"O ingkännakoa' solasohongku anna ingkänna to baha', pehingngiia' inde tula' ang la kupalambi' mating di alla'-alla'mua' dinoa aka' la mendahi kamalesoang didiona kalaeku."

2Tahpana nahingngi yato tau mai'di ma'tula' Paulus ma'basa Ibrani, tuhtuang mahtang pole'. Nalombungnging tula'na naoatee,

3"Kodi' to Yahudiä', sohong di haoä' di Tarsus di Kilikia, ampo' lobo' dinneä' di Yerusalem. Dipakuhuä' yaling di pepakuhunna tuangkuhu Gamaliel situhu' atohanna neneta. Lambi' mala touä' ko mendahi mesa tau ang handang bansa' yaling di pengkähänganna Puang Alataala, sinnoa ang si umbabea' dinoa.

4Anna puha tumä' undahha mai'di tau ang untuhu'i Puang Yesus, dianto lalang dai' di Puang Alataala, lambi' dipatei, noa muane noa bahine kusahka anna kupatamai di tahungkung.

5Didiona kaha-kaha yatoo, handang pongkahana imang sibaha ingkänna to panghohto' mala mendahi sa'bi. Aka' dia ang sika kupangngalai yato suha' pahenta ang kubaha boheng la le'ba' umpellambi'i pebulle ada' di hao di Damsyik, aka' la kusahka ingkänna to pentindo'na Puang Yesus mane kubahai sule dinne di Yerusalem anna ditahungkungngi.

6Ampo' tahpana yalingngä' di pellaoang di tängngä allo la lambi'mä' pano di Damsyik, tahpa ahang makähhäng yaho mai di langi' mangngimba'ä'.

7Ya' tilumbäng siamä' naung di tampo anna kuhingngii kamaha naoatee, 'Saulus, O Saulus, aka suhunna anna undahhaä'?'

8Kutimba'mi kuoatee, 'Aka' mennarako Dio, Puang?' Naoamingkä'tee, 'Kodi'mito inde Puang Yesus to Nazaret ang undahha.'

9Yato ang kuposola sika ungngita toe' yato ang makähhäng pansillo', ampo' daine' sika nainsang napebahtuang yato kamaha.

10Ya' ma'karamä' kuoatee, 'O Puang, aka ang la sihatang kubabe?' Ya' naoamingkä'tee, 'Kalehao anna le'ba'o pano di Damsyik. Di haoke' mane dipainsangngio ingkänna ang puha naäto' Puang Alataala ang la ungkähäng.'

11Ampo' donetoo, damä' paita napobua' pansilona yato ang makähhäng ang kuita. Dahi natehteä' pole' solaku tahhi' pano di Damsyik.

12Di hao di Damsyik aha mesa tau disanga Ananias, mesa toi ang meada' anna ang meimäng anna umpentokei ingkänna pepakuhunna Nabi Musa. Napakeangka' toi ingkänna to Yahudi yaling yato di bohto mahoa'.

13Sule napellambi'ä' anna naoaingkä'tee, 'O Saulus solasohongku, paitamote' sumule!' Ya' paita siamä' sumule anna tahpa kuitai.

14Ma'kara bumi naoatee, 'Puang Alataala ang napenombai neneta ang mantuhoo la umpengnginsangngi pahtuyunna. Anna la ungngitao To Maroho Inaha anna la unghingngi karanna ang sohong yaling mai di suana.

15Aka' la mendahio sa'binna pano di ingkänna hupatau didiona kaha-kaha ang puha ungngita anna ang puha unghingngi.

16Dahi akake' ungngempei? Kalehamo, behong kalaemu ditero' anna malauo dai' di Dehata anna malai napa'dai ingkänna dosammu.'

17Tahpana sumuleä' dinne di Yerusalem donetoo, lella' bumä' ma'sambayang yaling di Dasang Ada'na Puang Alataala, tahpa mantikaitamingkä'.

18Ya' kuitang Puang Yesus anna napa'karaiä' naoatee, 'Penandaii le'ba' umpellei Yerusalem aka' dai aha tau dinne ang la untahimbo kasa'biammu didiona Kalaeku.'

19Ampo' kutimba' kuoatee, 'O Puang, nainsang asang liu tau dinne done yato naonge kulelengngii ingkänna pa'sambayangang anna kusahkai tau ang mampetahpa'o, mane kupatamai di tahungkung anna dipohetongngi.

20Noa toi yato naonge dipateii Stefanus mesa sa'bimmu. Kuakui anna situhu' tou ko pihki'ku ke dipanoai yatoo anna kodi'ke' ang mandakai yato kaya' kalambe'na ingkänna ang mampatei.'

21Ampo' ma'kara Puang Yesus naoatee, 'Laoo, aka' la kusuoo pano di ongeang makahao do umpellambi'i ingkänna tau ang tadia to Yahudi.'"

22Tahpana nahingngi yato tau tula'na Paulus, naoatee la pano di tau ang tadia to Yahudi, ya' sika koha burang dai ma'pehingngi anna naoaitee, "Alaii yaling mai di lino ne tau! Dai sihatang tuho!"

23Ya' sika kohang yato tau mai'di lella' siang umpenghiä'ing kaya'na anna umpensahu'ing ähäng tampo dai' di nähäng.

24Lambi' ma'pahentang yato kapalana tantara anna malai Paulus dibaha tama di ongeanna tantara anna napesuoii dipahehsa laona siang disämbä'i anna malai diinsang aka suhunna anna sika kohai yato tau mai'di nakeaha'i.

25Tahpana lella' dipungo Paulus la dipohetong, ma'karang pano di mesa pongkahana tantara ang ke'de' di hao di behinna naoatee, "Situhu' atohanna to ma'pahenta Katomarayaang Roma, la tahpa dipohetong tomande'daka mesa to Roma ke dake' aha dihohto' kaha-kahanna?"

26Nahingnginna pongkahana tantara inde tula'na tahpa le'ba' siang ungkutanai kapalana naoatee, "Akang la umbabe, aka' yato tau setonganna to Romae'?"

27Tahpa le'ba'mi inde kapalana tantara umpellambi'i Paulus anna naoaintee, "Tula' manahpai, to Roma si'darakako?" Natimba'mi Paulus naoatee, "Io, tahpa' to Romaä'!"

28Ya' naoante yato kapalana tantara, "Masuli' kodi' kubaya'ing mane malaä' mendahi to Roma." Natimba' bung Paulus naoatee, "Aka' mengkalaoä' dahi inang to Romamä'."

29Ingkänna yato ang disuo la unsämbä'i Paulus le'ba'i asang aka' mahea', moi yato kapalana tantara aka' mane nainsang naoatee to Romae' yato ang napesuoi dipungo.

30Ampo' moinnakato noa, yato kapalana tantara la umpengnginsangngi manahpa aka suhunna anna napahsalai to Yahudi. Ya' tahpana marondonna napesuoing dibuhkei pepungona anna ditambaii ingkänna kapala imang sibaha To Mahkeada' ma'limbo. Tahpana tihimpung, ya' umposolang Paulus yaling mai di ongeanna tantara anna napapengngoloi tama yato di pa'limboang.


  Share Facebook  |  Share Twitter

 <<  Kisah Para Rasul 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel