Dual Panel1Donetoo yato Saulus pemala liu umpakahea'i anna la umpatei ingkänna ang umpetahpa' Puang Yesus. Dianto anna le'ba'mi umpellambi'i handang pongkahana imang yaho di Yerusalem.
2Umpalau suha' pahenta aka' la napepaitaing pano di pongkaha ada' di yaling di ingkänna pa'sambayanganna to Yahudi di hao di Damsyik anna malai dipabei unsahka tau ang untuhu'i Puang Yesus anna nabahai pano di Yerusalem, noa bahine, noa muane.
3Tahpana la lambi' pano di Damsyik umbaha yato suha', tahpa aha pansillo' yaho mai di langi' ungkapupu' inde Saulus.
4Ya' tilumbäng siarang naung di tampo anna unghingngii kamaha ma'kara naoatee, "O Saulus, aka suhunna anna undahhaä'?"
5Natimba'mi Saulus naoatee, "Aka' mennao ne, Puang?" Naoantee, "Kodi'mi to indee Puang Yesus ang undahha.
6Ampo' dinoa kalehamo anna tamao di Damsyik, aka' di haoke' mane ditula'ingko aka la umbabe."
7Sika pusa' toe' yato ang nasibahaing Saulus aka' unghingngi toe' yato kamaha ampo' dai aha naita taunna.
8Kalehang Saulus anna ke'de'i umbuhkei matanna la mennenne' ampo' dang paita. Ya' natehteng solana lambi' pano di Damsyik.
9Tallu allona dai mala paita, anna dai mande anna menu'.
10Yaling yato di Damsyik aha mesa to umpetahpa' Puang Yesus disanga Ananias. Napellanda'i Dehata anna napa'karaii naoatee, "O Ananias!" Ya' mentimba'mi naoatee, "Aka Puang?"
11Ya' ma'kara bung naoatee, "Maio anna maoo pano di lalang ang disanga Lalang Maroho anna umpekutanaing di hao di dasanna Yudas didiona mesa to Tarsus disanga Saulus ang lella' ma'sambayang.
12Puha napaitai Dehata naoaintee la sule mesa tau disanga ta Ananias nasahpa anna malai paita sumule."
13Natimba'mi Ananias naoatee, "O Puang, ampo' mai'ding tau mangngoatee tau yatoo si undahha ingkänna to mampetahpa' yaho di Yerusalem.
14Anna inde kasuleanna dinoa sibaha napakuasa kapala-kapala imang aka' la unsahka tau ang unghannuang sangammu."
15Ampo' naoatee Dehata pano di Ananias, "Laorako, aka' tau yatoo la kutuho mendahi pesuoku la umpepainsangnging sangangku pano di tau ang tadia to Yahudi anna pano di tomarayanna, noa toi pano di to Israel.
16Aka' Kodi' siang la umpainsangngii didiona kamasuhsaang anna kamapahhi'ang ang la nasitammuing anna nasa'ding aka' umpetahpa' sangangku."
17Ya' le'ba'mi Ananias umpellambi'i Saulus di hao di dasanna ta Yudas. Tahpana lambi' pano unsahpang Saulus anna naoaintee, "O solasohong, Dehatanta Puang Yesus puha umpepaitaing Kalaena mating naonge ungngolao lalang sule dinne. Dianto ang mansuoä' mampellambi'io anna malao paita sumule anna la napunnoio Inaha Masero."
18Ya' nasa'ding siarang Saulus malai yaling mai di matanna sinnoa sihsi' bau. Ya' tahpa paita siarang sumule, kalehang anna umbehoi kalaena ditero'.
19Tahpana puha mande, ya' matoho siarang nasa'ding. Inde Saulus tohhoke' di hao di Damsyik sangngaka-sangngaka allona sibaha to mampetahpa'.
20Anna lella' siang umpepainsangnging sanganna Puang Yesus dianto Änä'na Puang Alataala yaling di sangngaka-sangngaka pa'sambayanganna to Yahudi."
21Pusa' asang ang manghingngi pepakuhunna anna sika kutanai naoatee, "Tadiarakate' ang umpapepatei to umpetahpa' Puang Yesus yaho di Yerusalem? Anna darakate' nasuhung sule aka' pahtuyunna la unsahka ingkänna to mampetahpa' anna nabahai mengngolo pano di kapala-kapala imang?"
22Tuhtuang mai'di tau umpehingngii pepakuhunna Saulus anna saundu' toi umpapusa' pihki'na to Yahudi di hao di Damsyik, aka' mala napakaleso si'da-si'da naoatee Puang Yesus dianto To Dilanti' la Mepasalama'.
23Tahpana sangngaka-sangngaka allona, ya' sipa'tula'-tula'mi sangngaka-sangngaka to Yahudi mopahtuyu la umpatei Saulus.
24Ampo' nainsang Saulus pahtuyunna. Allo bengi unghonda baba bohto yato to Yahudi anna malai umpatei Saulus ke mensohommi.
25Moinnakato sika nahonda, ampo' mala siang napasohong to mampetahpa' donetoo, dianto tahpana bengi napayaling di mesa kalahohäng, mane sika nalehä'i naung di kebo' hala tembo'na bohto.
26Le'ba'mi Saulus ungngalai kalaena dai' di Yerusalem aka' pemala sibaha ingkänna to mampetahpa' yaho, ampo' dai sika natahimbo aka' sika dake' napetahpa' naoatee mampetahpa' tung nei'.
27Supung ta Barnabas ang mantahimbo. Ya' naposolang umpellambi'i ingkänna rasul mane natula'ing umba noa Saulus ungngita Puang Yesus anna napa'tula'i di hao di tängngä lalang. Noa toi didiona kabahanianna mampakuhu yaling di sanganna Puang Yesus di hao di Damsyik.
28Ya' tohho tunne' pole' sibaha-baha yatoii yaho di Yerusalem anna dai aha mahea'na mampakuhu didiona kapampetahpa'ang yaling di sanganna Puang.
29Si sipa'tula' anna si siteläng yato to Yahudi ang ma'basa Yunani, lambi' sika umpeäng lalang anna malai napatei.
30Ampo' tahpana sika nainsang solana Saulus yato pahtuyunnaii, naposolang le'ba' naung di Kaisarea mane tahhi'i pano di Tarsus.
31Donetoo ingkänna to mampetahpa' di hao di Yudea, Galilea anna Samaria sika masannang asang anna malino yaling di katuhoanna. Matoto' yaling di kapampetahpa'ang aka' naposolai Inaha Masero anna napunnoi kamahea'ang dai' di olona Puang Alataala. Lambi' tuhtuang kehängngäng mai'dinna anna unsa'ding liu pepakahanganna Inaha Masero.
32Le'ba'mi Petrus ullelengngi bohto umpellambi'i ingkänna to mampetahpa'. Lempäng toi di hao di Lida.
33Di hao inde di bohto ullambi' mesa tau ang disanga Eneas, kahuang pahiamanna makorong anna matindo lolo aka' makule.
34Tahpa ma'karang Petrus pano naoatee, "O Eneas, napabono'o Puang Yesus, To Dilanti' la Mepasalama'. Kalehamo, anna ullolongngii ne alemu." Ya' kaleha siang inde Eneas.
35Tahpana naita ihsinna Bohto Lida anna Bohto Saron kabono'anna ta Eneas, ya' sika mengkatoba'mi di hao di olona Puang Alataala.
36Donetoo aha toi mesa bahine to mampetahpa' di hao di Bohto Yope disanga ta Tabita, bahtu' ta Dorkas (aka' sinnoa bahtuanna yaling di basa Yunani, diantoo: donga). Yato bahine mesa ang si membabe mapia anna mai'ding to pemase-mase si nakalemui.
37Pihsananna ke nahoae' korong, lambi' napobaha mate. Puha didio' bahkena, dipapatindong di mesa tambing yaho di loteng.
38Inde Bohto Yope anna Bohto Lida sirungku' siang. Dahi tahpana napelele ingkänna to mampetahpa' ang di hao di Yope naoatee Petrus di hao di Bohto Lida, sika unsuong derua tau do natambai. Nalambi'na naoamintee, "La mao siamo are' madihhi'!"
39Ya' mengkalao siang Petrus sibaha yato to metamba. Tahpana lambi' pano, diposola siang dai' yato di tambing ang naonge yato to mate. Sika dusemmi samai balu bahine ullebo Petrus. Ya' sika umpaitaing Petrus yato ingkänna kaya' kalambe' sibaha poreha senga'na ang pandai' kalaenake' ta Dorkas naonge tuhoke'.
40Ya' nasuo asammi Petrus mensohong mane malimuntu'i ma'sambayang. Puha ma'sambayang, mengkolimmi ungngolo yato to mate anna ma'karai naoatee, "O Tabita, kalehao!" Tahpa tibuhke siang matanna ta Tabita. Ungngitanna ta Petrus, kalehang anna mohko'i.
41Tahpa natokei siang teyyena anna naduluii ke'de'. Mane untambai asangngi yato ingkänna to mampetahpa' sibaha yato ingkänna balu bahine anna naoaintee, "Tuhong sumule ta Tabita!"
42Tahpana napelele to pa'bohto Yope kaha-kaha yatoo, ya' tuhtuang mai'ding tau umpetahpa' Puang Yesus.
43Donetoo tohhoke' di hao Petrus sangngaka-sangngaka allona di dasanna mesa to ma'dama lollo' ang disanga Simon.