Alkitab Mobile SABDA
[VER] : [ARALLE]     [PL]  [PB] 
 <<  Kolose 1 >> 

1Pano di ingkänna solasohongku ang masero diting di Kolose, ang tontong mampetahpa' pano di Kristus. Hao mai di Paulus ang naängkä' Puang Alataala mendahi rasulna Kristus Yesus. Anna di hao toi mai di ta Timotius, solasohonta. Ambetarang Puang Alataala ang la mambehekoa' anna mampamasahkekoa'.

2(1:1)

3Puha kihingngi umba noa kapampetahpa'ammua' pano di Kristus Yesus anna pa'kalemummu pano di solata to mampetahpa'. Dianto anna naonge si kisambayangngikoa', ya' si ma'kuhhu'sumanga' loloang dai' di Puang Alataala, Ambena Puang Yesus Kristus ang tapodehata.

4(1:3)

5Malakoa' mampetahpa' anna ma'kalemu aka' unghannuang yato ang napatokaingkoa' Puang Alataala yaho di suruka. Puhangnga' unghingngi didiona yatoo naonge dipainsangngikoa' yato Kaheba Mapia ang tahpa'.

6Inde Kaheba Mapia puha dipepainsangnging pano di siku-sikunna lino lambi' tuhtuang mai'di tau mampetahpa' pano di Puang Yesus anna membabe mapia. Noa tumokoa' dio, solasohong. Tahpana unghingngi yato Kaheba Mapia, ya' umpetahpa'mokoa' Puang Yesus lambi' unsa'ding si'da-si'dakoa' mana' pa'kalemunna Puang Alataala.

7Kaheba yatoo puhangnga' unghingngi di hao mai di ta Epafras, solaki' mengkähäng ang kikalemui. Dianto mesa sabua'na Kristus ang mala dipetahpa' yaling di pengkähänganna aka' kapahalluammua'.

8Dianto ang mampainsangngiang naoatee, ungkalemuikoa' solata to mampetahpa' aka' kakuasaanna Inaha Masero yaling di kalaemua'.

9Dianto anna si kisambayangngi lolokoa', tahpana kihingngi didiomua'. Kipalau dai' di Puang Alataala anna malai nabeakoa' kapainsangang ang sundung lambi' mala ungnginsang si'da-si'da aka pangngelo'na.

10Ponna noang, malamokoa'to tuho situhu' pangngelo'na Puang Alataala anna umpamasannang lolo Inahanna, yaling umbabe ma'kahupa-hupa kamapiaang anna la tuhtuang kehängngäng kapainsangammua' dai' di Puang Alataala.

11Kipalau anna malai Puang Alataala umpamatoho inahammu umpake kakuasaanna ang matande lambi' malakoa' tontong lolo sa'bara' ungngolai moi aka ang manghoakoa'.

12Ma'sambayangngang anna malai inahammua' tontong lolo ma'kuhhu'sumanga' dai' di Ambeta Puang Alataala. Aka' Diaete' ang mampasihatangngikoa' untahimbo mana' yaling di kapahentaanna sibaha ingkänna solamu to pentindo'na ang tuho yaling di kamabayaang.

13Puhamingkea' nalahpa' yaling mai di kakuasaanna kamalillingang anna naparendeingkea' tama di kapahentaanna Änä' samboana ang napakamaya.

14Ungngolai yato Änä'na malaingkea' nasulängngi anna ungngampungngi dosanta.

15Puang Alataala dai landa'. Ampo' yaling di pengkerona anna kakuasaanna Änä'na, ya' taita tou nei' pengkerona anna kakuasaanna Puang Alataala. Inde Änä'na mala disangai Änä' Ulua, aka' mayahoang di ingkänna siamo ang puha napadahi Puang Alataala.

16Aka' Dianto ang napake Puang Alataala umpadahi samai ang aha, noa yaho di suruka, noa inde di lino; noa ingkänna ang landa', noa ang dai landa'; moi setomarayaang ang ma'pahenta, moi ma'kahupa-hupa malaeka' ang ma'kuasa. Ingkänna yatoo napapia ungngolai Änä'na, anna yato ang napapia supung napapiaing Änä'na.

17Dolu naonge dake' aha aka-aka, ya' inang ahanne' Puang Yesus. Anna ingkänna ang aha dinoa naäto' anna nadakai yaling di kakuasaanna.

18Kita' ang mampetahpa' mala dipasihapang mesa kalae anna Puang Yesus dipasihapang bää'na. Sinnoa bää' ungkapalai kalae, noa tuntone' Puang Yesus ungkapalai ingkänna to pentindo'na. Dianto Änä' Ulua, bahtuanna: ang handang dolu tuho di hoi' mai di alla'na to mate, lambi' ungkapalaing ingkänna siamo.

19Aka' Puang Alataala toboe' mambohtu anna malai samai pengkerona anna kakuasaanna la sundung toe' yaling yato di Änä'na.

20Anna ungngolai inde Änä'na nabohtu Puang Alataala umpasikapiai sumule Kalaena anna ingkänna ang napadahi, noa ang yaling di lino, noa toi ang yaho di suruka. Napanoa indee ungngolai hahana Änä'na ang titoke' yaho di kayu sitambeng.

21Dolu sikahaoangkoa' Puang Alataala, umpa'bali aka' pembabe anna pihki' karakemua'.

22Ampo' dinoa aka' kamateanna Kristus, lambi' mala mapia sumule kasikenteammua' sibaha Puang Alataala. Dinoa napamarohomokoa' lambi' maserokoa' anna dang aha kasalaammu di hao di olona.

23Ampo' pahallu la tontong lolokoa' umpamatoho kapampetahpa'ammua'. Daa-daa ungkebo'i sumule panghannuammua' ang puha untahimbo naonge anna unghingngii Kaheba Mapianna Puang Alataala. Yato kaheba puhang dipepainsangnging lambi' pano di siku-sikunna lino. Anna Kodi' Paulus puhamä' ko napadahi mesa sabua'na ang la mampalele sau tama.

24Dinoa masannangngä' umbulle kamasuhsaang aka' kuduluikoa'. Aka' inang ahake' kamasuhsaang ang la pahallu kuolai yaling di pengkähänna Kristus. Anna yato kamasuhsaang ang menge kuolai dinoa, kuolai aka' umpengkähängngingkä' ingkänna tau ang mampetahpa' pano di Puang Yesus Kristus, dianto ingkännaingkea' ang dipasihapang bätäng kalaena.

25Nasuoä' Puang Alataala mendahi sabua' pano di petauanna anna malai kupepainsangnging ingkänna bahtakaranna mating di dioa'.

26Dianto kaheba ang masae liung dai napabei Puang Alataala la nainsang tau bahtuanna, ampo' dinoa napakalesoming pano di petauanna.

27Nasuhung napanoa Puang Alataala anna mala toukoa' dio ang tadia to Yahudi ungnginsang pole' umba noa kamapiaanna anna kamatandeanna inde kaheba ang masaeng dai dipepainsangnging bahtuanna. Yato kaheba dianto indee: Kristus tuho yaling di kalaemua' lambi' ungnginsang ungngoatee inang la ullambi' katuhoang matande sibaha Puang Alataala lambi' sapano-panona.

28Dahi Puang Yesusmitoo ang kipepainsangnging pano di ingkänna tau sitonda kakeaka'ang. Kipakaleha anna kipakuhu ingkänna tau anna malai yatoii kipadiolona Puang Alataala sihapang tau ang sundung kapampetahpa'anna anna tuho yaling di Kristus.

29Dianto anna kupengkabela-belaii mengkähäng umpake kamatohoang ang nabeaä', aka' inang matoho yato kakuasaanna yaling di katuhoangku.


  Share Facebook  |  Share Twitter

 <<  Kolose 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran