Dual Panel1Oa' ingkämmu pongkaha, beai pano di sabua'mu yato aka ang mahasa anna sihatang. Kalehaii aha tou dio Pongkahamu yaho di suruka.
2Pahallukoa' ma'sambayang lolo anna madaka, laona siamokoa' ma'kuhhu'sumanga' dai' di Puang Alataala.
3Sambayangngi touang kami' anna malai nabuhkeiingkang Puang Alataala mesa lalang ang la kiongei umpepainsangnging Kaheba Mapianna Kristus ang masaeng dai kainsangang. Aka' dianto indee nasuhung yalingngä' di tahungkung.
4Sambayangngiä' anna malai kupamaleso si'da-si'da umba noa ang la pahallunna.
5Ponna ke sitammukoa' tau ang dai mampetahpa', ya' pahallukoa' keaka' yaling di pembabemu pano, anna pakekunai yato tempomu membabe mapia, andana labu' kalei.
6Samai tula' ang sohong yaling mai di suamua', pahallu mepamasannang anna mala toe' tama di ahkalang. Anna pahallu toine' ungnginsang mentimba' pano di tau ang mangkutanaikoa'.
7Oa' solasohong, kusuoingkoa' mating ta Tikhikus ang la mampainsangngikoa' kahebaku. Dianto mesa solasohonta ang kikalemui liu, si tontong lolo mengkähäng anna si sibahaang untahiai Puang Alataala. Kusuo mating anna malai napakahangakoa' ke ungnginsammi umba noa kahebaki'.
8(4:7)
9La mating sibaha ta Onesimus, mesa toune' solasohonta ang takalemui, ang sule yaling mai di alla'-alla'mua'. Sika la napainsangngikoa' ingkänna ang dahi dinne.
10Salama'na ta Aristarkhus ang kusibahaing dinne di tahungkung. Noa toi ta Markus sampona ta Barnabas. (Didiona inde ta Markus puhang kupalau mating di dioa' la untammui manahpa ke matimmi.)
11Salama'na toi ta Yesus ang disangai toe' ta Yustus. Dianto inde supu tallu to Yahudi di alla'na solaku to mampetahpa' ang umpengkähängnging Kapahentaanna Puang Alataala. Sika napengkalambi'-lambi'i liu tora' napakahangaä'.
12Salama'na ta Epafras, mesa sabua'na Kristus Yesus ang sule toe' yaling mai di alla'mua'. Si nasambayangngi lolokoa' sitonda sangkalebu inahanna. Napalau dai' di Puang Alataala anna malai kapampetahpa'ammua' tontong matoho, noa toi la keaka'koa' yaling di ingkänna siamo lambi' mala umpembabe si'da-si'daing pa'elo'na Puang Alataala.
13Kusa'bii tung kodi' umba noa mengkähäng kahha' aka' dioa' sibaha to Laodikia anna to Hieropolis.
14Salama'na toe' are' Tuandohto' Lukas, ang takalemui, anna ta Demas.
15Palambi'ingkang salama'ki' mating di santosahaninta to Laodikia. Noa toi pano di ta Nimfa anna samai to mampetahpa' ang si ma'himpung di hao di dasanna.
16Ponna ke puhang umbata inde suha' tama di alla'-alla'mua', poinaha toine' papebahaing tama di to mampetahpa' yaling di Laodikia anna malai sika nabata. Noa tunne' suha' ang la napapebaha mating to Laodikia, pahallu umbata toe'.
17Oaintee ta Arkhipus, "Papuhai kähängammu ang nabeao Puang Alataala!"
18Salama'ku mating di dioa'. Teyyeku tobou kodi' ang kupake ungnguki' inde salama' mating. Anna kalehaiä'a' aka' yalingkä' di tahungkung. Pa'kalemunnarang Puang Alataala ang la mambehekoa'.