Dual Panel1Puhai yatoo napilleing Puang Yesus pitumpulo to pentindo'na ang senga' anna nasuoi mao moderua-ruaang do mendolu pano di ingkänna bohto ang inang la naolai dako' Puang Yesus.
2Naoatee pano diii, "Itaia' inde mai tau masoo liu ang la dibaha tama di Kapahentaanna Puang Alataala. Kupasihapang boa kayu ang la pahallu dipupu, ampo' dai kanna' tau ang la mampupu. Dahi palauia' pano di puänna inde pinamula anna malai nahängngängngike' tau ang la umpupu inde boa kayu.
3Pehingngiia'! Kusuokoa' do umpepainsangnging Kaheba Mapia. La sihapangkoa' domba ang tama di alla'-alla'na olo'-olo' peande.
4Dakoa' mala umbaha doi'. Datoukoa' mala umbaha tas, moi sapatu. Anna daa umpa'lempäng-lempängnga' unsalama'i solamu di behing lalang.
5Ponna mendai'koa' di mesa dasang, ya' tahpa oaia'te dolu, 'Salama' mating! La nabehekoa' Puang Alataala yaling di hapummu!'
6Anna ponna aha tau tohho yaling yato di dasang ang sihatang untahimbo yato tula' pebehemua', ya' la kabeheanto yato tau. Ampo' ponna dai aha, ya' la sumuleete' tama di kalaemua' yato tula' pebehemua'.
7Tohhokoa' yaling di dasanna ang mantahimbokoa', andei anna enu'i aka ang nasohengngiingko, aka' inang noaete' mesa to pengkähäng sihatangngete' untahimbo saho pengkähänna. Daa untirende leleng ampo' tohhokoa' di mesa dasang.
8Anna ponna tamakoa' di mesa bohto anna natahimbo manahpakoa' tau yaling, ya' andeia' anna enu'ia' aka ang nasohengngiingko.
9Pabono'i yato ingkänna to makorong ang aha yaling yato di bohto anna tula'i pano diii oaite, 'Dang masae anna Kalaenang Puang Alataala ma'pahenta sihapang tomaraya.'
10Ampo' ponna mentamakoa' di mesa bohto anna dakoa' natahimbo tau yaling, ya' panokoa' di batahta anna sika kakohakoa' ungngoatee,
11'Moia' ähäng tampomu ang mendehke' di bihti'ki' kipentalahpi' toinne' di olomua'. Ampo' pahallua' ungnginsang: dang masae anna Kalaenang Puang Alataala ma'pahenta sihapang tomaraya.'
12Kutula'ingkoa' setonganna ponna lambi'mi tempona dihohto' inde lino, la mahingang puhaete'ne' tahungkunna Bohto Sodom andana bohto yatoo."
13Mane naoate Puang Yesus, "Tilakakoa' Bohto Khorazim! Tilakakoa' Bohto Betsaida! Aka' ke la inang aha toine' dahi di hao di Bohto Tirus anna Sidon yato tanda ang mepusa'-pusa' ang puha dahi yaling di alla'-alla'mua', ya' la masaente' mengkatoba' lambi' umpekaya' kahung sibaha ulluläng täi hapu bää'na tandana unsohso yato kasalaanna.
14Ampo' ponna lambi'mi tempona dihohto' inde lino, ya' inang la mahingang puhaete'ne' tahungkunna to Tirus anna to Sidon andana dioa'.
15Noa tungnga' dio Bohto Kapernaum umbai pake unsangaa' la naängkä'koa' dai' di suruka Dehata, i? Setonganna dakoa' la naängkä' ampo' la natibekoa' naung di nahaka!"
16Napatahhi' tula'na Puang Yesus pano yato di to nasuo naoatee, "Kutula'ingkoa', menna ang mampehingngiia' tula'mu, ya' sihapangngete' Kodi' napehingngii. Ampo' menna ang dakoa' mantahimbo, ya' sihapangngete' Kodi' ang dai natahimbo, anna menna ang dä' mantahimbo, ya' sihapangngete' dai untahimbo Ambeku ang mansuoä' sule."
17Puhanna ungkulilingngi ingkänna yato bohto saohko', sika sumuleing yato pitumpulo to pentindo'na sitonda kamasannangang anna ma'tula'i pano di Puang Yesus naoatee, "O Puang, ingkänna setang tuhu'-tuhu'ang asang pano di kami' ahsala' kihambaii yaling di sangammu."
18Ma'tula'mi Puang Yesus pano diii naoatee, "Kuita Pongkahana setang manaho yaho mai di langi' salamang kila'.
19Setonganna puhang kupatamaingkoa' di kalaemu kakuasaang lambi' malakoa' umpealla' leleng ile keipo anna alipang dakoa' aha maaka, anna mala toukoa' untalo kamatohoanna Pongkahana setang ang mampa'balikoa'. Lambi' dai aha moi aka siamo ang la mantilakaikoa'.
20Ampo' moinnakato noa yatoo, daa umpa'kahsi-kahsi aka' malakoa' untalo setang, ampo' diare' kahsikoa' aka' titekeng sangammua' yaho di suruka."
21Done siantoo ya' masannang liung Puang Yesus aka' nakuasai Inaha Masero anna naoaitee, "O Ambe', ma'kuhhu'sumanga'ä' mating di Dio, Dehatanna langi' anna lino, aka' dai umpabei tau ang unsanga kalaena manähäng si'da-si'da la umpähäng didiona kapahentaammu, ampo' umbeane' pepähängang pano di tau ang mahempo' inaha ang sinnoa inahanna änä'-änä'. O Ambe', dianto yato pa'elo'mu anna ang umpemapiaing."
22Puhanna ma'sambayang, ya' ma'tula'mi pano yato di tau mai'di naoatee, "Ingkänna-ingkänna siamo hali asammä' nabehoing Ambeku, anna dai aha moi la mesa tau ang mangnginsang mennaä' setonganna sehalinna Ambeku, anna datoe' aha ang mangnginsang menna setonganna Ambeku sehalinna Kodi'. Anna menna ang kupasihatangngi, dianto ang kupakalesoing didiona Yatoo."
23Puhai yatoo, ya' mensaileng Puang Yesus pano di pahsikolana, anna napa'karaii dai napahingngii tau senga' naoatee, "Kehongko'ne' tau ang menge ungngita aka ang ungngitaa'.
24Aka' kutula'ingkoa' setonganna, mai'di nabi anna tomaraya pemala toe' sika naita aka ang ungngitaa' ampo' dang hali sika naita, anna pemala toe' sika nahingngi aka ang unghingngia' ampo' dang hali sika nahingngi."
25Pihsang tempo aha mesa to pampakuhu ada' mopahtuyu la unsändä'i Puang Yesus, ke'de' di olona anna mekutanai naoatee, "O Tuang, aka ang pahallu kubabe anna malaä' ullambi' katuhoang sapano-panona?"
26Natimba'mi Puang Yesus nakutanai sala naoaintee, "Aka yato ang tiuki' yaling di Suha' Masero? Anna umba noa pihki'mu didiona yatoo?"
27Mentimba' salang yato tau naoatee, "Kalemuikoa' Puang Alataala, Dehata ang umpenombai, penumpuii yaling di inahammu, yaling di pihki'mu, yaling di kamatohoammu anna yaling di pembabemu. Anna kalemuikoa' para-parammu hupatau sinnoa ungkalemuikoa' kalaemu."
28Naoaminte Puang Yesus, "Ahana inang tahpa' ne tula'mu. Dahi pembabeing anna malao ullambi' katuhoang."
29Ampo' yato tau pemala unsanga kalaena tahpa' pembabena, dianto anna ungkutanai salang Puang Yesus naoatee, "Menna setonganna yato solaku ang pahallu kukalemui?"
30Natimba'mi Puang Yesus umpake pohapangang naoaintee, "Aha mesa tau ang sule yaho mai di Yerusalem la lunaung di Yerikho. Yaling di tängngä lalang natammui to pa'maho-maho anna dai supung nahampa'i kaya'na anna aka-akanna ampo' sika nasibamba-bambai lambi' sai'di' tala mate, mane sika napellei tomande'i tilampa' di tängngä lalang.
31Donetoo sipatu aha mesa imang liu, ya' ungngitang yato tau ampo' nalombongngi supu mangngola behing lalang.
32Noa tunne' mesa to Lewi liu toe' donetoo. Tahpana ungngita yato tau, ya' tahpa nalombongngi tunne' mangngola behing lalang.
33Pihsananna liung mesa to Samaria, mangngola yato di lalang. Tahpana ungngita yato tau, ya' kende'mi pa'kalemu yaling di inahanna.
34Maong ullumba yato tau anna nabahahsiing yato bila'na umpake minnä' anna angkoro', mane nasapu' manahpaing anna napapensakei dai' di keledai kalaena, mane naposolai pano di mesa dasang ang si diseba anna nauhu' manahpai di hao.
35Tahpana marondonnai, ya' umbeang doi' pano yato di puänna dasang ang la sihoang naalliing kapahalluanna yato tau, anna naoaitee, 'Dama manahpai inde to makorong, anna ponna ke ahake' kapahalluang senga' ang dang nalambi' inde doi', ya' daa ummalaya' kubaya'rang ke liu salamä'.'"
36Natämpä'ing yato tula'na Puang Yesus mekutana naoatee, "Dahi situhu' pihki'mu, menna di alla'na yato tallu tau ang mendahi solana yato to makorong?"
37Mentimba'mi yato to pampakuhu ada' naoatee, "Tantunte' anna yatoi ang ma'kalemu pano!" Naoa salaminte Puang Yesus, "Ya' laomotoo anna pembabeing sinnoa yatoo."
38Donetoo naonge anna sibahai pahsikolana Puang Yesus, yaling di pellaoanna sika ullambi'mi mesa bohto saohko'. Yaling yato di bohto aha mesa bahine disanga Marta, untambaing Puang Yesus ma'saleo pano di dasanna.
39Inde Marta tohho sibaha ullu'na ang disanga Maria. Inde ta Maria nakärä'i moohko'-ohko' di behinna Puang Yesus umpehingngii pepakuhunna.
40Yatone' ta Marta mengene' tapakali-kali yaling di hapu mantahiai, undungku'ing Puang Yesus anna ma'tula'i naoatee, "O Puang, akana umpabeie Dio ne supu ta Maria moohko-ohko' diting? Suoi naduluiä'."
41Ampo' natimba' Puang Yesus naoaintee, "O Marta, supung dio umpihki' ang tasanda-sanda anna malaya' di ingkänna-ingkänna siamo.
42Ampo' setonganna mesaete' supu kaha-kaha ang pahallu, dianto umpehingngii Bahtakara Dehata. Dianto ang napilleine' ta Maria ang inang dai la dialai di hao mai."