Alkitab Mobile SABDA
[VER] : [ARALLE]     [PL]  [PB] 
 <<  Lukas 14 >> 

1Pihsang tempo di allo katohhoang Puang Yesus mao pano di dasanna mesa to pambahananna to Farisi anna mandei di hao. Ingkänna tau ang aha di hao yato di dasang sika umpoimata asang aka ang nababe Puang Yesus.

2Pihsananna, ya' suleng mesa tau ang bängkä' teyyena anna bihti'na sibali ke'de' pano di olona Puang Yesus.

3Ya' mekutanang Puang Yesus pano di ingkänna to pampakuhu ada' anna to Farisi naoatee, "Situhu' atohang ada'taa', malaraka tau mampabono' di allo katohhoang, bahtu' daraka?"

4Ampo' sangka' sika mahtang supu yato tau mai'di. Ya' natokeing teyyena Puang Yesus yato to makorong anna napabono'i mane nasuoi le'ba'.

5Mane umpatahhi' boi pekutananna pano diii naoatee, "Aharakaa' tau di alla'mu ang dai la tahpa unghui' sumule änä'na bahtu' patuhoanna ke manahoi naung di kahoäng sipatu allo katohhoang?"

6Ampo' yato ingkänna tau dai sika nainsang aka ang la naoa mentimba'.

7Donetoo Puang Yesus ungngita ingkänna to sule pemala asang mohko' pano di ongeanna to dipa'käyyängngi, ya' ma'tula'mi pano diii yaling di pohapangang naoatee,

8"Ponna ke naundangngo solamu pano di pehta kakabengang, ya' daa ungngohko' pano di ohko'anna to dipa'käyyängngi, aka' daa-daa yato ohko'ang la napasadia toboinne' to sulena ang handang napa'käyyängngi.

9Andana ke mohko'mo di hao anna ke suleng yato to sulena ang dipa'käyyängngi, ya' la naoamingkotee, 'Kalemuiä' tirendeo dio done aka' inde ohko'ang dipatoka toboinne' to sule ang dipa'käyyängngi.' Ya' donetoo la tirendeo sitonda masili anna maoo mohko' pano di ongeang ang handang tahuhu.

10Ampo' diarea' nei' ponna naundangngo solamu, ya' dotang nei' ohko'o di hao di ohko'ang ang handang di kebo' aka' umbai suleete' yato ang umpuängang pehta la naoaingkotee, 'O sammuane, ohko' panoo di olo.' Ponna noa yatoo, ya' napa'käyyängngio yato ang umpaaha pehta di olona tau mai'di.

11Aka' menna-menna unsanga kalaena mayahoang la mendahi handang madihoi'ang, ampo' ang unsanga kalaena madihoi'ang la mendahi mayahoang."

12Puhanna ma'tula' pano yato di to sule, ya' ma'tula' salang Puang Yesus pano yato di tau ang mangngundang naoatee, "Ponna ke umpaahao pa'rame-rameang di allo bahtu' di bengi, ya' daa ungngundang solamu, solasohommu, kasanghapuammu bahtu' tau ang di behing dasammu ang to makaka, aka' la sika naundang touo dio ke sika umpaahai pa'rame-rameang, lambi' la unsa'ding siang bala'na yato pangngundammu.

13Ampo' diare' ke umpaahao pa'rame-rameang, undangngo to pemase-mase, to tasundung kalaena, to makule anna to buta.

14Anna inang la dibeheo aka' dai sika aha aka-akanna la nabala'ing yato undangammu. Dahi la ullambi' bala'na ke tuho asammi to mate ang untuhu'i Puang Alataala."

15Donetoo aha mesa tau ang menge mande sibaha Puang Yesus anna lella' siang umpamapehingngii yato aka ang natula' Puang Yesus. Lambi' ma'tula' yato tau naoatee, "La kahsine' tau ang la mande sibaha Puang Alataala yaling di kapahentaanna."

16Ya' naoaminte Puang Yesus yaling di pohapangang, "Aha mesa tau umpaaha pa'rame-rameang käyyäng anna ungngundangngi mai'di tau.

17Dolunna la dipahandu' yato pa'rame-rameang, yato pongkaha dasang unsuo sabua'na do umpakaenga' sala yato ingkänna undanganna napasang naoatee, 'Maimokoa' are' aka' sadia asammi.'

18Ampo' yato ingkänna ang puha naundang sangka' sika malau mase. Aha ang mangngoatee, 'Mane haliä' ungngalli pobela'ang, dahi pahallu do kueka'. Kuhannuang dä' umpatumpui.'

19Aha ang mangngoatee, 'Mane haliä' ungngalli lima pasang saping anna pahallu kuaya'i. Daa umpatumpuiä'.'

20Ang senga' naoatee, 'Mane haliä' kabeng, dahi dä' hali mao.'

21Ya' sumuleing yato suoang anna napalambi'i pano di pongkahana yato ingkänna ang naoa yato undanganna. Ya' keaha' si'da-si'dang yato pongkahana anna umpahentai yato suoanna naoaintee, 'Laoo pebatahta leleng pano di lalang käyyäng anna pano di lalang saohko' yaling inde di bohto mahoa' anna untambaii sule ingkänna to pemase-mase, to tasundung tuhona, to buta anna to makule.'

22Tahpana sumuleng yato suoanna di hao mai yato ang napansuoi, ya' naoante pano di pongkahana, 'O Tuang, puhang kubabe asang yato pahentamu. Ampo' dake' keihsi asang yato ohko'ang ang dipatokaing.'

23Ya' naoa salante yato pongkaha pano di suoanna, 'Laoo pebatahta leleng pano di aneanna bohto mahoa' anna unsuoi tau sulei, anna malai punno tau yaling inde di dasangku.

24Aka' kutula'mingkoa'tee', inang dai la aha moi poro la mesa tau ang puha diundang dolu la sule umpehasai inde aka ang puha dipatoka.'"

25Pihsang tempo mai'di si'da-si'da tau umpentindo'i Puang Yesus lella' sika mellao. Ya' sika nasaileng Puang Yesus anna naoaintee,

26"Ponna aha tau mampentindo'iä' ampo' umpakamaya puhane' ambena, indona, bahinena, änä'na, solasohonna bahtu' sungnga'na, ya' yato tau dai sihatang dahi to pentindo'ku.

27Menna-menna ang dai sadia madahha bahtu' mate aka' natindo'ä' dai sihatang napentindo'iä'.

28Aka' hapanganna aha mesa di alla'mua' mopahtuyu la umpake'de' mesa dasang käyyäng, ya' tantunte' anna napihki' manahpai dolu ke nabelai napake'de' bahtu' daraka.

29Andana ke puhang nalaka' bätänna ampo' dabure' nabela napatahhi', ya' umbai la napetaha-tahai ingkänna tau ang mangngita,

30lella' siang sika naoatee, 'Tilaka'mi kasi bätänna indo tau, ampo' la bosi kalentoo aka' dasiang nabela napatahhi'.'

31Bahtu' hapanganna mesa tomaraya ang la mao la untolla' katomarayaang senga' tantunte' anna napihki' manahpai dolu ke nabelai petauanna ang supung sampulo sa'bu la umbali balinna ang dompulone' sa'bu.

32Ponna ke inang dai la nabela nabali, ya' la nadotainte' tahpa unsuo änä' buana do untammui yato balinna naonge anna makahaoke' anna sikapiaii.

33Noa tunne' ingkänna tau di alla'mua': ke dai naaku ullahpa' asang dolu ingkänna aka-akanna siamo, ya' dai sihatang la mendahi to pentindo'ku.

34Sia inang kekuna si'da-si'da, ampo' ponna ke dang mäsing, ya' dante' aha lalang la dipamäsing sala.

35Lambi' dang aha kunanna, tala malang dipupu'ing bela', tala malang diande, supurante' ditibe. Menna pemala mangnginsang, pamapehingngiingnga'too!"


  Share Facebook  |  Share Twitter

 <<  Lukas 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel