Alkitab Mobile SABDA
[VER] : [ARALLE]     [PL]  [PB] 
 <<  Lukas 15 >> 

1Ingkänna to pahsinga' sima anna ingkänna tau diangka' madosa si mao ullumba Puang Yesus anna malai napehingngii pepakuhunna.

2Ya' sika momämmämmi yato to Farisi anna to pampakuhu ada' naoatee, "Pake naakue' sibaha-baha to madosa anna mande sibaha-baha."

3Ya' ma'tula'mi Puang Yesus pano diii yaling di mesa pohapangang naoaintee,

4"Ponna ahaa' di alla'mu ang ungngampuang sangngatu' domba anna pa'dai mesa di alla'na, ya' tantunte' anna la napelleii yato dombana ang kamehsa pulona kamehsa di hao di päsäng anna maoi do umpeäng yato domba ang pa'da lambi' nalambi'.

5Anna ponna nalambi'mi yato dombana, ya' kahsi liuetee' lambi' nasompo sasira sumule tandana kahsi.

6Lambi'ito sumule pano di dasanna, ya' untambaing yato ingkänna solana ang pa'solasohonganna sibaha ingkänna sola bohtona anna naoaitee pano diii, 'Maikoa' posolaiä' ma'masannang-sannang aka' mala mammi kulambi' sumule yato dombaku.'

7Kupainsangngikoa', la noa tunto nei' yaho di suruka la aha pa'rame-rameang ang käyyäng puha ke ahai mesa to madosa ang mengkatoba' andana ke ahai kamehsa pulona kamehsa tau ang danne' pahallu mengkatoba'."

8Napatahhi'ke' tula'na Puang Yesus naoatee, "Ponna aha mesa bahine ang untokei sampulo doi' pera' anna dondongngi mesa, ya' tantunte' anna la umpau'i lampunna, unsapui dasanna anna nadaka' lelengngi lambi' nalambi'.

9Anna ponna mala sia nalambi' yato doi'na, ya' la untambai sambahinena anna sola bohtona anna naoaitee, 'Maikoa' posolaiä' ma'masannang-sannang aka' mala siare' kudohe' sumule doi'ku ang pa'da.'

10Kutula'ingkoa', la noa tunto nei' pa'kahsi-kahsinna malaeka'na Puang Alataala yaho di suruka aka' mesa to madosa mengkatoba'."

11Napatahhi' bumi tula'na Puang Yesus untula' pohapangang naoatee, "Aha mesa tau derua änä'na, sahing muane.

12Ma'tula'mi yato ang tämpä' pano di ambena naoatee, 'O Papa', beamä' kodi' mana'ku ang inang baheku tubung kodi'.' Ya' nabahe si'daming ambena yato mana'na.

13Tahpana sangngaka allona, ya' nabalu' asammine' tahana yato änä' tämpä' anna maoi pano di bohto makahao. Yato doi'na napopa'kainaha-naha di hao lambi' puha.

14Tahpana puha asang yato doi'na, ya' sipatu tunne' di hao yato di bohto ang naongei sule tempo kabuhohangang, lambi' luipano katuhoanna yato änä'.

15Ya' maong pano di mesa pongkaha umpeäng kähängang di hao yato di bohto. Nasuong nadaka'ing bahinna di hao di bela'na.

16Manono liung nasa'ding yato änä' lambi' moi andeang bahi pemalang naande ahsala' ahang naihsiing kompenna, ampo' dai aha mambea.

17Mane pa'kalehai pole' anna naoaite yaling di inahanna, 'Ketaladara mai'di liu sabua'na ambeku anna tanapuha-puha andeanna, anna dinnemä'ko done inde la mate naala pali.

18La umpatamarä'ne' inaha anna sumuleä' pano di ambeku kuoaintee: O Papa', ahana inang madosamä' pano di dio, londonang dai' di Puang Alataala.

19Dämä' sihatang la umpoänä', dahi padahiä' sabua'mu.'

20Ya' umpatama si'dang inaha anna maoi pano sumule umpellambi'i ambena. Makahaoke' anna naitang yato ambena, lambi' kende' pa'kalemu yaling di inahanna. Tahpa lumumpa' siang yato ambena natammui anna nakalihpi'ii napa'urung-urung.

21Ma'tula'mi yato änä' naoatee, 'O Papa', ahana inang madosamä' pano di dio londonang dai' di Puang Alataala. Dämä' sihatang la umpoänä'.'

22Ampo' ma'tula' yato ambena pano yato di sabua'na naoatee, 'Laokoa' do penandaii do ala kaya' kalambe' ang handang malehke' anna ungkaya'iing. Ala toine' sinsing anna umbeai napesinsing, anna ala toinne' sapatu napesapatu.

23Mane unghepoia' mesa saping lundaha ang handang malompo anna ma'rame-rameingkea' sibaha-baha.

24Aka' inde änä'ku sihapang tubunte' puha mate ampo' tuho sumule; sihapang pa'da ampo' dilambi' sumule!' Ya' sika napahandu'mi ma'rame-rame.

25Ampo' yatone' änä' uluana di haoke'ne' di bela'na. Tahpana di lalang sumule pano di dasanna, ya' mane kahao anna nahingnging yato poni-poniang moni di hao di dasanna noa ang la ma'mahoa'-hoa' anna noa ang aha to sumayo.

26Untambaing mesa di alla'na sabua'na ambena anna nakutanaii didiona akaboi anna ma'mahoa'-hoa'i.

27Mentimba'mi yato sabua' naoatee, 'Yato arimmu mane sumule, lambi' metunu ambemu mesa saping lundaha ang handang malompo aka' mala mammi kasi silambi' sumule änä'na sitonda kasalama'ang.'

28Ya' keaha'mi yato änä' uluana anna dai naaku mentama di huäng dasanna. Sohommi ambena napellambi'i anna napa'karai manahpai.

29Ampo' untimba' supu ambena naoatee, 'Sangngakang pahiamanna kupengkähängngingko, Ambe', anna dakangko aha kubali-bali, ampo' lambi' allo dinoa dake' aha la umbeaä' moi poro la mesa beke kutunu anna kupopa'mahoa'-hoa'i sibaha ingkänna solaku.

30Ampo' tahpana sumule änä' pakamayammu ang setonganna puhanne' ungkaleäng-leängngi mana'na sibaha pahsundala' pano di bohto mahoa', ya' bilang untunuinne' mesa saping ang handang malompo.'

31Naoa salaminte ambena, 'Dio dio sibaha loloingke anna ingkänna ahtasa'ku dio asang mangngampui.

32Ampo' pahalluingke kahsi liu aka' mala mammi kasi indo arimmu ang setonganna mala dioate mateng ampo' tuho sumule, puhang pa'da ampo' mala mammi sumule.'"


  Share Facebook  |  Share Twitter

 <<  Lukas 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran