Alkitab Mobile SABDA
[VER] : [ARALLE]     [PL]  [PB] 
 <<  Lukas 16 >> 

1Napatahhi' bumi tula'na Puang Yesus pano di pahsikolana naoatee, "Aha mesa to makaka ang ungngängkä' mesa tau ang la umbe'bei anna ungngäto' yato doi'na. Ampo' inde to pambe'be doi' ditanda' dioatee si umpake tasahua'-hua' yato doi' pongkahana.

2Ya' natambaing yato pongkaha anna naoaintee, 'Yakana ahae' ko kaheba tahuhu kuhingngi didiomu? Dahi dinoa beho asangngingkä' mai ne ingkänna doi'ku, aka' mengkalao dinoa damo mala kupopambe'be doi'.'

3Naoante yaling di inahanna yato to pambe'be doi', 'Ya' pake akang inde la kubabe aka' dämä' la napopengkähäng pongkahaku? La mobela', dai dibela; la mao tau mendahi to kapalau-lau, masili bure' tau!

4O' io, aha ahkalangku, anna malaä' aha mampadidasanna ke dämä' napopengkähäng pongkahaku.'

5Ya' le'ba'mi ullelengngi ingkänna tau ang moindang pano yato di pongkahana anna ungkutanaii yato tau ang uhuna nalambi' naoatee, 'Sangngaka dio indammu pano di pongkahaku?'

6Mentimba'mi yato tau naoatee, 'Sangngatu' buhso minnä' zaitun.' Ya' naoa salamintee, 'Indeng yato suha' buhtinna indammu, dahi dinoa penandaii uki' sala di mesa suha', pahoi'i supu limampulo buhso.'

7Pihsananna mao bung pano di tau ang senga' anna nakutanaii naoaintee, 'O ya' dio, sangngaka dio indammu?' Mentimba'mi yato tau naoatee, 'Sansa'bu kahung banne.' Naoa bumintee, 'Indeeng yato suha' buhtinna indammu, dahi dinoa penandaii uki' sala di mesa suha' pahoi'i supung kahua atu'na kahung banne indammu.'

8Meroho bilang napudi sala yato pongkahana yato to pambe'be doi' aka' moinnakato anna dai maroho pembabena, ampo' malae' tahpa madihhi' umpeängnging lalang kalaena. Ahana inang hupatau yaling inde di lino manähäng puhane' napihki' aka ang la nababe pano di solana andana hupatau ang tuho yaling di kamabayaang.

9Dahi kutula'ingkoa': Pakekunaia' aka ang aha yaling inde di lino anna malai undului solamu. Ponna umpanoai, ke dang kekuna aka-aka ang aha yaling inde di lino, ya' la sika natammui manahpao yaling di ongeang tohho sapano-panona."

10Napatahhi'mi tula'na Puang Yesus naoatee, "Menna-menna ang mala dipetahpa' yaling di kaha-kaha ang saohko', ya' mala toete' dipetahpa' yaling di kaha-kaha ang käyyäng. Ampo' menna-menna ang dai mala dipetahpa' yaling di kaha-kaha ang saohko', ya' datoete' mala dipetahpa' yaling di kaha-kaha ang käyyäng.

11Dahi ponna moia' dio kaha-kaha yaling inde di lino damo dipetahpa', ya' londonanne' kaha-kaha yaho di suruka.

12Noa tunne' ke dai aha tau mampetahpa'koa' la undakaiing aka-akanna, ya' daa umpemitai la aha tau naaku mambeao aka-aka ang la mala ungngampui tobou dio.

13Daete' aha mesa sabua' la derua pongkahana, aka' ponna noa, ya' tantunte' anna ungkahi'di'i pongkahana ang mesa anna umpakamayaine' yato pongkahana ang senga', bahtu' untuhu'i liu yato pongkahana ang mesa ampo' daine' natuhu'i liu yato ang mesa. Noa tungnga' dio, dakoa' mala la menge siamokoa' untuhu'i Puang Alataala ampo' menge sia tumokoa'ne' umpengkalambi'-lambi'i umpeäng katomakakaang yaling inde di lino."

14Ingkänna yato tula'na Puang Yesus napehingngii yato to Farisi ang doi' supu yaling di pihki'na, lambi' sika ungkembai Puang Yesus.

15Ya' napa'tula'ing Puang Yesus, sika naoaintee, "Akana inang kalasikoa', pemalakoa' supu unsanga tahpa' kalaemu di olona hupatau, ampo' setonganna nalosa Puang Alataala aka ang yalingnga' di ihsi inahammu. Aka' aka ang napudi hupatau nakahi'di'ete'ne' Puang Alataala."

16Napatahhi'ke' tula'na Puang Yesus naoatee, "Pahentana Puang Alataala ang napepainsangnging Nabi Musa anna napepakuhuing ingkänna nabi, lambi' supu di tempona Yohanes to Pantero'. Napahandu' donetoo Kaheba Mapia didiona Kapahentaanna Puang Alataala dipepainsangnging, anna mai'di tau mampengkabela-belai mentama yato di kapahentaang.

17Maromi' puhane' langi' anna lino pa'da andana moi poro la mesa titi' ihsinna Bahtakaranna Puang Alataala dai dipasundungngi.

18Menna-menna untibe bahinena, mane ungkabengngii bahine senga', inang ungngindä'-indä' pa'bannetauang. Anna menna-menna ang umpobahine yato bahinena ang natibe muanena, inang ungngindä'-indä' pa'bannetauang."

19Napatahhi'mi tula'na Puang Yesus untula' mesa pohapangang naoatee, "Aha mesa to makaka ang si mampake mahasa lolo allo-allo anna masuli' allinna yato pakeanna, anna allo-allo supung nainsang ma'mahoa'-hoa' aka' katomakakaanna.

20Di hao di behing babana aha mesa to pemase-mase moohko'-ohko' disanga Lazarus. Inde to pemase-mase mekoa'-koa' ate diita aka' punno bila'.

21Pemala undohe'i yato tahu'bi'na to makaka ang dondongngi yaho mai di mejana naihsiing kompenna. Anna si sule asu nalepa'ing bila'na ang punno kalaena.

22Pihsananna mateng yato to pemase-mase. Ya' nasiängkä'-ängkä'ing malaeka' nabaha dai' di behinna Abraham. Dai masae mate tunne' yato to makaka anna diku'bu'mi.

23Lella' ungngolai yato kamadahhaang yato to makaka, ya' mentongang anna ungngita makahaoi Abraham ungngahing yato ta Lazarus.

24Ya' mekohang yato tau naoatee, 'O Abraham, ambeku, kalemuiä' suoingkä' ne Lazarus untu'do teyyena naung di uhai anna bonä'ingkä' inde pote' lilaku aka' madahha liung kusa'ding yaling inde di api nahaka.'

25Ampo' napa'tula'i Abraham naoaintee, 'O änä'ku, kalehaii puhamo dio umpehasai kamasannangang selama tuho yaling di lino, anna ta Lazarus nei' madahha liu nei' nasa'ding. Dahi dinoa ullambi'ne' kamasannangang anna dio-dio ullambi'o dio kamadahhaang.

26Dia tuke' aka' naalla'ingkea' kahoäng ang dai mala dilambang anna malai tau ang dinne done dai tau mala mating, noa tunne' ang diting dai mala mai.'

27Naoante yato to makaka, 'Ponna noa yatoo, ambe', ya' kupalau mating ke la malai unsuoingkä' mao umpellambi'i hapunna ambeku,

28aka' ahake' lima ullu'ku. Suoi mao anna malai napakaenga' manahpa lambi' dai sika mentama di ongeang kamadahhaang sinnoa inde ang kuongei dinoa.'

29Ampo' natimba' Abraham naoaintee, 'Aka' hali sianne' sika unghingngi atohanna Puang Alataala ang napalambi' Musa anna ingkänna nabi; mahasante' ke sika napehingngii manahpai anna natuhu'i.'

30Naoa bunte yato to makaka, 'Dai, Abraham ambeku, kusanga ke ahai ang sule di hoi' mai di kamateang mampellambi'i, ya' umbai la mala sika mengkatoba'.'

31Naoa salaminte Abraham, 'Daete' noa nee. Ponna ke inang dai sika naaku umpehingngii kahebana Puang Alataala ang napalambi' Musa anna ingkänna nabi, inang daete' aha lalang la sika dipaturu pano di lalang maroho, moinnakato napellambi'i tau ang tuho sumule di hoi' mai di kamateang.'"


  Share Facebook  |  Share Twitter

 <<  Lukas 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran