Alkitab Mobile SABDA
[VER] : [ARALLE]     [PL]  [PB] 
 <<  Lukas 2 >> 

1Donetoo naonge ma'pahentai Kaisar Agustus, ya' umpasohong mesa pahenta la dipaaha pantekengang ingkänna tau di umba-umba naonge yaling di kapahentaanna.

2Dianto inde uhu-uhuna la dipaaha pantekengang, suka' diängkä'na Kirenius mendahi Tuambahsa' di hao di Poropensi Siria.

3Ya' le'ba'i asammi ingkänna hupatau umpapetekeng kalaena pano di bohtona simesa-mesa.

4Noa tunne' Yusuf le'ba' toe' umpellei Bohto Nazaret di hao di Galilea, lupano di Yudea, meroho pano di Bohto Betlehem, ongeang kadahianna Tomaraya Daud. Aka' inde Yusuf dianto peänä'anna Daud.

5Napanoa anna malai ditekeng toe' di hao sibaha tunanganna Maria ang menge kehähtäng.

6Tahpana sika lambi' pano, ya' lambi'mi tempona Maria la keänä'.

7Ya' ungkeänä'ing mesa muane-ane, änä' uluana. Nasapu'mi sahedoro, situhu' kabiasaanna tau donetoo, anna nalolingngi naung di pahahang, aka' dang aha dasang ang lo'bäng ang la mala sika naongei.

8Donetoo di bengi di hao yato di bohto, aha sangngaka-sangngaka to pangkambi' ang menge undakai pangkambi'na di hao di päsäng.

9Pihsananna ke pihsa'e' aha mesa malaeka'na Puang Alataala ke'de' di alla'-alla'naii anna landa'i kamatandeanna Puang Alataala lambi' sika mahea' liu.

10Ya' ma'tula'mi yato malaeka' pano diii naoatee, "Daa ummahea'a' aka' setonganna la kupainsangngikoa' Kaheba Mapia ang la napomasannang ingkänna tau di lino:

11Allo dinoa dinne di bohtona Tomaraya Daud dipadahimingkoa' To Pepasalama', dianto Dehatanta, To Dilanti' la Mepasalama'.

12Anna malaia' umpetahpa' inde aka ang kutula'ingkoa', la noa indee tandana: la ullambi'koa' mesa änä' malea disapu' kaing, anna diloling di hoi' di pahahang."

13Yato malaeka' pihsa' halie' mai'di anna umpudii sanganna Puang Alataala naoatee,

14"Diängkä' kamatandeang dai' di Puang Alataala yaho di ongeang kamatandeanna, anna kamasahkeang yaling di lino pano di tau ang unsa'ding pa'kalemunna."

15Tahpana le'ba'i yato sumule malaeka' dai' di suruka umpellei yato sangngaka-sangngaka to pangkambi', ya' sika situla'-tula'mi naoatee, "Maikoa' talao pano di Betlehem anna malai taitaa' aka ang dahi di hao situhu' ang napainsangngiingkea' Dehata."

16Ya' sika napenandai siang mengkalao. Sika ullambi'mi Maria anna Yusuf anna yato änä'na ang diloling di hoi' di pahahang.

17Tahpana sika naita, ya' sika natula'mi aka ang hali sika nahingngi didiona yato änä',

18anna ingkänna tau ang unghingngi yato aka ang natula' yato sangngaka-sangngaka to pangkambi' sangka' pusa' asang.

19Ampo' napadiinahanna supu Maria ingkänna yatoo, laona siang napihki'.

20Ya' sika sumuleng yato sangngaka-sangngaka to pangkambi' sitonda kakahsiang anna umpudi sanganna Puang Alataala, aka' samai ang sika nahingngi anna naita noa si'da-si'da yato ang hali sika natula'ing malaeka'na Puang Alataala.

21Tahpana sundummi kahua allona suka' dahinna anna lambi'mi tempona la ditille, ya' sika nasangaing yato Änä' 'Yesus,' situhu' ang inang hali natula' malaeka' dolunna anna nakehähtängnging indona.

22Puhanna uhpa'pulo allona, ya' lambi'mi tempona Yusuf anna Maria la dai' di Dasang Ada'na Puang Alataala anna umpamasero kalaenaii situhu' pepakuhunna Musa. Ya' sika maong dai' di Yerusalem umbaha yato Änä' anna malai nabeho dai' di Puang Alataala.

23Aka' situhu' pahentana Puang Alataala tiuki' naoatee, "Ingkänna änä' ang ulua ang muane pahallu dipamasero di olona Puang Alataala."

24Anna sika mao toi umpenombaing tunuang situhu' pahentana Puang Alataala sahpasang buhku' bahtu' dangang-dangang mahäti' derua.

25Yaho yato di Yerusalem aha mesa tau disanga Simeon. Inde tau maroho anna mampetahpa' si'da-si'da di olona Puang Alataala, lella' ungngempei to pepakahanganna to Israel, dianto To Dilanti' la Mepasalama'. Inde Simeon napunnoi Inaha Masero,

26anna inang nadandi Inaha Masero naoatee dai la mate dolunna ungngita To Dilanti' la Mepasalama'.

27Sule toe' yaho di Dasang Ada'na Puang Alataala situhu' petehtena Inaha Masero. Yato Änä' ang disangai Yesus nabaha to baha'na tama di Dasang Ada' anna malai dibabe-babeangngi situhu' pahentana Dehata.

28Ya' donetoo inde Simeon untammui manahpang yato Änä' anna naahingngi, lella' umpudi sanganna Puang Alataala naoatee,

29"O Puang To Handang Ma'kuasa, dinoa malante' pole' inde sabua'mu untambai yaling di kamalinoang situhu' tula'mu,

30aka' kuitanne' To Pepasalama' ang sule yaho mai di Dio,

31ang umpatokaing di olona ingkänna hupatau di lino,

32ang sihapang kamabayaang ang la umballoi lalanna ingkänna tau ang tadia to Yahudi anna malai sika sule mengngolo di Dio, dianto kamabayaang ang la umpalanda' kakeangka'ang pano di petauammu to Israel."

33Yato ambena anna indona Änä' pusa' liu nahingngi yato aka ang natula' didiona yato Änä'.

34Ya' sika napalauming behe Simeon yatoii anna ma'tula'i pano di Maria indona yato Änä' naoatee, "Inde Änä' inang napillei Puang Alataala la untallangngi anna la umpasalama' mai'di to Israel. La mendahi toi tanda yaho mai di Puang Alataala ang napa'bali mai'di tau,

35anna yato tau la umpalanda'ing ihsi inahannaii. Anna la masuhsa liu tou dio unsa'ding, sihapangngo natobo' pa'dang ang pahe'la'."

36Di hao toi aha mesa bahine disanga Hana, änä'na Fanuel, peänä'anna Asyer. Indee bahine dianto mesa nabi, matua liung. Pitu supu taunna la'bi tohho sibaha sangkolunna puhanna kabeng,

37ya' mateng muanena lambi' mendahing balu bahine inde Hana, anna dinoa kahuang pulona uhpa' pahiamanna. Motohho-tohho lolo yaling di Dasang Ada' ma'sambayang anna ma'puasa.

38Donetoo sule tunne' mendungku' pano di Yusuf, Maria anna yato Änä' anna ma'kuhhu'sumanga'i dai' di Puang Alataala anna ma'tula'i didiona yato Änä' pano di ingkänna tau ang menge ungngempei Yato ang la unsulängngi Yerusalem.

39Puhanna inde Yusuf, Maria anna yato Änä' umbabe asang yato aka ang situhu' pahentana Puang Alataala, ya' sika sumuleng pano di bohtona, dianto pano di Nazaret di hao di Poropensi Galilea.

40Yato Änä' tuhtuang lobo' anna tuhtuang matoho, napunnoi kapainsangang anna mana' pebehena Puang Alataala.

41Yaling di taung boi anna taung boi, ke lambi' bumi pa'rame-rameang Paskana to Yahudi, yato to baha'na Puang Yesus si mao dai' di Yerusalem.

42Di tempona anna sundungngi sampulo derua pahiamanna Puang Yesus, ya' sika mao bumi dai' situhu' ang inang sika napanoa.

43Tahpana puha yato pa'rame-rameang, ya' sika sumuleng ampo' tohhoke'ne' Puang Yesus yaho, ampo' dai umpainsangngi to baha'na.

44Inde to baha'na nasanga mempola tung nei' yaling di alla'na tau mai'di lambi' napatahhi' lolo pellaoannaii. Ampo' tahpana sangngallo puhpu' sika mellao daloloi aha naita, ya' nadaka' lelemmi tama di alla'na solasohonna anna insananna.

45Ampo' aka' dai aha sika nalambi', ya' sumuleng dai' di Yerusalem napeäng.

46Tahpana katallunna allona napeäng, ya' sika nalambi'mi yaling di Dasang Ada' mohko' yaling di tängngä-tängngäna to pampakuhu ada', lella' ma'pehingngi laona siang mekutana pano diii.

47Anna ingkänna tau ang manghingngi pusa' asang unghingngi kamanähänganna anna ingkänna pentimba'na Puang Yesus.

48Tahpana naita to baha'na, ya' pihsa' pusa' liung, mane ma'tula'i yato indona pano naoaintee, "O änä'ku, akana palla'e Dio inahammu umpanoaang? Masaemo kipeäng sibahaang ambemu sitonda kamahea'ang."

49Mentimba' pano diii naoatee, "Aka' akae Kodi' anna pake la umpeängngä'? Darakaa' dio ungnginsang ungngoatee, Kodi' indee inang pahalluä' tohho yaling di dasanna Ambeku?"

50Ampo' dai sika napähäng aka yato bahtuanna tula'na pano diii.

51Ya' sika sumuleng sibaha-baha pano di Bohto Nazaret, anna tohhoi sibaha to baha'na. Anna yato ingkänna ang mane puha dahi napayaling supu di inahanna indona.

52Anna yato Puang Yesus tuhtuang lobo' anna tuhtuang kehängngäng kakeaka'anna anna tuhtuang napakamaya Puang Alataala anna ingkänna hupatau.


  Share Facebook  |  Share Twitter

 <<  Lukas 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran