Alkitab Mobile SABDA
[VER] : [ARALLE]     [PL]  [PB] 
 <<  Lukas 4 >> 

1Puang Yesus sumule di hoi' mai di Salu Uhai Yordan napunnoi Inaha Masero lambi' natehte pano di ongeang makä'däng.

2Di haonto naongei tohho uhpa'pulo allona masaena lella' nasändä'i Pongkahana setang. Selama di hao dai aha naande moi la aka, dahi tahpana uhpa'pulo allona manonong nasa'ding.

3Ma'tula'mi Pongkahana setang pano naoatee, "Ponna inang tahpa' si'dao Änä'na Puang Alataala, ya' pahentai ne mating batu anna malai membali dehpa anna malai ungngande."

4Natimba'mi Puang Yesus naoatee, "Aha tiuki' bahtakara ang naoatee, 'Ang napotuho tau tadiaete' supu andeang.'"

5Puhai yatoo, ya' umbaha bumi Puang Yesus dai' di mesa ongeang ang malängkä' anna napaitai asangngi samai katomarayaang di lino yaling di sangkapiri mata supu.

6Ma'tula'mi Pongkahana setang pano naoatee, "Inde sau ingkänna kakuasaang anna kamatandeang la kubeho asang mating di Dio, aka' ingkänna ne sau kuampui asammi anna mala kubeho tomande' pano di menna-menna ang kuelo'i.

7Dahi ponna ke malimuntu'o di oloku menomba, ya' ingkänna ne sau la kubea asangngo mendahi ampuammu."

8Ampo' natimba' Puang Yesus naoatee, "Aha tiuki' yaling di Suha' Masero naoatee, 'Pahalluo umpenombai Puang Alataala Dehatammu anna Dianto supu ang la pahallu untuhu'i.'"

9Ya' umposola bumi Puang Yesus dai' di Yerusalem anna naposolai dai' di ongeang ang handang malängkä' yaho di hahona Dasang Ada'na Puang Alataala mane ma'tula'i pano naoatee, "Ponna inang Änä'na si'dao Puang Alataala, ya' sändä'ke' pengkanahoo naung indo di tampo,

10aka' aha tiuki' yaling di Suha' Masero naoatee, "La napahentaingko malaeka'na anna malai sika nadakaio,

11lambi' la namäntä'io anna malai dai tihahi' bihti'mu naung di batu.'"

12Natimba'mi Puang Yesus naoatee, "Aha tiuki' bahtakara ang naoatee, 'Daa unsändä'i Puang Alataala Dehatammu.'"

13Tahpana yato setang puha unsändä'i Puang Yesus ungngolai ma'kahupa-hupa pesändä', ya' le'ba'mi ungkahaoi Puang Yesus anna ungngempeii tempo ang la naonge nasändä'i sala bou.

14Ya' sumuleng Puang Yesus pano di Galilea sitonda kakuasaanna Inaha Masero lambi' kaheba didiona Kalaena kahingngiang di ingkänna Poropensi Galilea.

15Donetoo menge siang mampakuhu tama di pa'sambayangang, anna napudi asangngi ingkänna tau.

16Le'ba'mi Puang Yesus pano di Nazaret ang naongei lobo' anna, situhu' kabiasaanna, ponna lambi' bumi allo katohhoang, ya' mao bung tama di pa'sambayangang anna ke'de'i yaling umbata Suha' Masero.

17Donetoo nabeang suha' to pambahananna pa'sambayangang ang nauki' Nabi Yesaya. Tahpana nabuhkei, ya' nalambi'mi mesa baheang ang naongei tiuki' naoatee,

18"Inaha Maserona Puang Alataala tohho yaling di Kalaeku, aka' puhamä' nalanti' la umpalambi' Kaheba Mapia pano di to pemase-mase. Nasuoä' sule anna malaä' umpainsangngi to ditahungkung kuoatee, 'Lahpa'mokoa'!' anna pano di to buta kuoatee, 'Paitamokoa'!' anna pano di tau ang didahha kupabeba' toe'.

19La kupakaheba kuoatee, 'La lambi'mi tempona Puang Alataala la umpasalama' petauanna.'"

20Puhai yatoo, ya' nalolommi sumule yato suha' anna nabeai sumule pano di to pambe'bei suha', mane mohko'i. Ya' sika nenne' asammi ingkänna tau pano.

21Napahandu'mi mampakuhu pano diii naoatee, "Allo dinoa dipasundummi inde baheang Suha' Masero di tempona anna unghingngiia'."

22Ingkänna yato tau ungngangka' tahpa' asang yato Puang Yesus anna sika pusa' unghingngi yato kara ang napasohong ang mepakahanga si'da-si'da. Lambi' sika situla'-tula' naoatee, "Tadiarakae' inde änä'na Yusuf?"

23Ma'tula' bung Puang Yesus pano diii naoatee, "Tantunte' anna umpahingngi-hingngiä'a' sinnoa ang si natula' to baha' dolu ungngoatee, 'O to pa'pakuli, pakulii dolu kalaemu tobou dio! Babe toine' dinne di bohto kalaemu ingkänna kadahiang ang kihingngi dahi di hoi' di Kapernaum!'"

24Napasilombung tula'na naoatee, "Kutula'ingkoa' setonganna daete' aha mesa nabi ang dipakeangka' yaling di bohtona toboe'.

25Anna kutula'ingkoa', di tempona Nabi Elia naonge anna dai aha kene' tallu setangnga taung masaena, lambi' dahi kabuhohangang ang dai aha mantondong, ya' donetoo aha mai'di liu balu bahine dinne di Israel.

26Ampo' dai disuo Nabi Elia la ungkalemui mesa di alla'naii, ampo' panoe' di mesa balu bahine ang tadia to Yahudi, ang tohho di hoi' di bohto senga' dianto Bohto Sarfat, ang sidungku' Sidon.

27Noa tunne' di tempona Nabi Elisa mai'di to Israel ang nahoa korong tamahamu', dianto bosi lollo'na, anna dai aha moi poro la mesa ang napabono' sehalinna mesa to Siria ang disanga Naaman."

28Ingkänna yato tau yaling di pa'sambayangang keaha' asang unghingngi yato tula'na Puang Yesus.

29Tahpa sika ke'de' anna unghambaii Puang Yesus malai yaling mai di bohto. Di hao yato di bohto aha karakeang di behinna. Ya' inde Puang Yesus sika nabaha pano yato di karakeang aka' pemala sika nasumbäng naung.

30Ampo' napealla' supu Puang Yesus yato ingkänna tau anna le'ba'i napellei.

31Puhai yatoo, ya' le'ba'mi Puang Yesus naung di mesa bohto mahoa'na Poropensi Galilea ang disanga Kapernaum, anna mampakuhui di hoi' ke allo katohhoang bumi.

32Sika pusa'mi yato ingkänna tau unghingngi umba noa pepakuhunna, aka' ingkänna tula'na punno kakuasaang.

33Yaling yato di pa'sambayangang aha mesa tau ang napentamai setang kakoha-koha napekäyyängngi naoatee,

34"Eh, Dio ne Puang Yesus to Nazaret, aka suhunna anna ullumbaang? Suleo la unghopuiang? Kuinsang mennao setonganna: Dionto to Masero, pesuona Puang Alataala."

35Ampo' nakarahta' Puang Yesus naoaintee, "Mahtangngo! Anna palaio mai done ne di tau!" Yato setang tahpa umpensaleba'ing yato tau pano di alla'-alla'na tau mai'di anna malaii yaling mai, dai aha ungngaka-aka yato tau.

36Anna ingkänna tau pusa' si'da-si'da anna situla'-tula'i naoatee, "Ahana inang bakahu inde pepakuhunna! Aka' sitonda kakuasaang umpahenta setang lambi' malai si'da."

37Donetoo kaheba didiona Puang Yesus tisembu' sau tama di ingkänna bohto di hao di Galilea.

38Puhai yatoo, ya' le'ba'mi Puang Yesus umpellei yato pa'sambayangang anna maoi pano di dasanna ta Simon. Yato pasananna Simon ang bahine nahoa luhsu tamahamu', lambi' sika malau pano di Puang Yesus ke la malai napabono'.

39Ke'de'mi Puang Yesus di hao di behinna yato bahine anna umpahentai yato korong malai, lambi' malai si'da. Yato bahine tahpa kaleha anna umposahai yatoii.

40Tahpana solo' allo, ya' suleing mai'di tau umbahai ingkänna to makoronna ang nahoa ma'kahupa-hupa korong. Ya' pantammi nasahpa Puang Yesus anna napabono'.

41Aha toe' mai'di tau ang napentamai setang. Yato setang malai yaling mai di tau anna kakoha-kohai naoatee, "Dionto ne Änä'na Puang Alataala." Ya' sika nalahammi Puang Yesus anna dai sika napabei natula' yato aka ang sika nainsang, aka' sika nainsang naoatee, Dianto To Dilanti' la Mepasalama'.

42Tahpana lelle'mi allo, le'ba'mi Puang Yesus umpellei yato bohto lupano di mesa ongeang ang mahulla-hulla. Ampo' nasipeäng-peängngi yato ingkänna tau. Tahpana sika nalambi', ya' napalau liung pano ke la malai anna dai le'ba' umpellei yatoii.

43Ampo' ma'tula' pano diii naoatee, "Kaheba Mapia didiona Kapahentaanna Puang Alataala pahallu toe' kupepainsangnging pano di bohto senga' aka' dianto suhunna anna nasuoä' sule."

44Dahi le'ba' Puang Yesus unsamba ingkänna bohtona Yudea umpepainsangnging Kaheba Mapia tama di pa'sambayangang.


  Share Facebook  |  Share Twitter

 <<  Lukas 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel