Dual Panel1Dai masae puhanna yatoo, le'ba'mi Puang Yesus ullelengngi leleng mai'di bohto, moi ang mahoa' moi ang saohko' umpepainsangnging Kaheba Mapia didiona Kapahentaanna Puang Alataala. Mao toe' yato sampulo derua pahsikolana sibaha-baha.
2Mempola toe' yato sangngaka-sangngaka bahine ang puha dipabono' di hao mai di ma'kahupa-hupa korong bahtu' ang puha dihambaiing yaling mai di kalaena setang ang mampentamai, sinnoanna Maria ang si disanga toe' Magdalena ang puha dialaiing yaling mai di kalaena pitu setang.
3Noa tunne' ta Yohana bahinena ta Khuza, to pambe'bei doi'na Herodes, ta Susana anna mai'dike' bahine senga'. Sika mempola asang anna untahiai Puang Yesus sibaha pahsikolana umpake katomakakaanna toboe'.
4Tahpana sulei tau mai'di' di hao mai di mobohto-bohtoang ullebo Puang Yesus, ya' napahtummi mampakuhu yaling di pohapangang naoatee,
5"Pihsang tempo aha mesa petani la mao mangngambo'. Menge ungngambo' yato bannena, aha piha ang manaho pano di lalang, ya' nasiindä'-indä'ing tau anna sulei toine' sedansiang anna naandei lambi' puha.
6Aha toe' piha ang manaho naung di tampo di haho batu, ampo' tahpana napahandu' mengnguhaka', ya' malahso siang lala'na anna matei aka' mabangi yato tampo.
7Yato banne aha toe' piha ang manaho tama di alla' lohpo ang kedui, lambi' lobo' sibaha yato lohpo kedui anna nakapupu'i lambi' mate.
8Ampo' aha toe' piha banne ang manaho naung di tampo malambu, lambi' mala tuho manahpa anna keboai pensangngatu' luhpi'." Puhai natula' inde pohapangang, ya' ma'tula'mi napekäyyängngi naoatee, "Menna pemala mangnginsang, pamapehingngiingnga'too!"
9Sika mekutanang yato pahsikolana naoatee, "Akae' bahtuanna ne pohapangang ang untula'?"
10Natimba'mi Puang Yesus naoatee, "Pano di dioa' dibeakoa' dio kapainsangang anna malakoa' ungnginsang umba noa Kapahentaanna Puang Alataala ang masaeng tibuni. Ampo' panone' di tau senga' dipakahebaine' umpake pohapangang, anna malai 'moinnakato sika naitai, ampo' setonganna daete' naita anna dai nakaleso; anna moinnakato sika nahingngi, ampo' setonganna daete' tama di talinganna anna datoi napebahtuang aka yato ang sika nahingngi.'
11Noa inde bahtuanna yato pohapangang: Setonganna banne yatoo dianto Bahtakara Dehata.
12Yato ang manahoi pano di behing lalang dianto tau ang unghingnging yato Bahtakara Dehata, ampo' sule Pongkahana setang nahampa'i anna naalai yaling mai di inahanna anna malai dai sika mampetahpa' lambi' dai la dipasalama'.
13Ang manaho pano di tampo di haho batu dianto tau ang tahpana unghingngi yato bahtakara, ya' napatamang di inahanna sitonda kakahsiang, ampo' dasiang mengnguhaka' yaling di inahanna lambi' sämpäi' supu napetahpa', aka' tahpana ullambi'i pesändä', ya' ungkebo'ing Puang Alataala.
14Ang dondong tama di alla' lohpo ang kedui dianto tau ang unghingnging yato bahtakara, ampo' dai mala lobo' anna dai mala keboa manahpa aka' bata-bata didiona katuhoanna, noa tunne' pemala supu katomakakaang anna pemala supu untuhu'i pampemala tahuhunna.
15Yatone' ang manaho pano di tampo malambu dianto tau ang mapia inaha ang tahpana unghingngi yato bahtakara, ya' napatamang di inahanna anna membabei situhu' yato aka ang nahingngi, dai aha namali'-mali'ang membabe mapia.
16Nalombungngi bung tula'na Puang Yesus umpake pohapangang naoatee, "Daete' aha mesa tau la umpau' lampunna mane nasalohko'i baki, bahtu' napatoko naung di hoi' langka'na. Ampo' napatokoete' dai' di ongeang ang malängkä' anna malai ingkänna tau ang mentama yato di dasang la naballoi pesilona.
17Aka' daete' aha mesa kaha-kaha ang tibuni la tibuni lolo, anna daete' aha mesa kaha-kaha ang dai dipepainsangnging la daloloi dipepainsangnging. Ampo' la ahaete' tempona ang dibuni la dipalanda' anna ang dai dipepainsangnging la kainsangang.
18Dahi, dianto anna pekaleso manahpaia' yato Bahtakaranna Dehata ang unghingngi, aka' menna ang inang ahang ang nainsang, inang la dihängngängngiking, ampo' menna ang dai ma'pehingngi, ingkänna yato ang nasanga nainsang la dialai yaling mai di pihki'na.
19Indona anna ullu'na Puang Yesus sule yato di ongeang ang naonge menge mampakuhu Puang Yesus, ampo' dai sika mala mendungku' aka' mai'di liu tau sisihpi'-sihpi'.
20Ya' ahang mesa tau umpainsangngi Puang Yesus naoaintee, "Indomu anna ullu'mu sika yaling di aneang pemala la napellambi'io."
21Ampo' natimba' supu Puang Yesus naoaintee, "Ang mendahi indoku anna ullu'ku dianto ingkänna tau ang umpehingngii Bahtakaranna Puang Alataala anna napembabeing yaling di salu katuhoanna."
22Pihsang tempo ma'karang Puang Yesus pano di pahsikolana naoatee, "Talaoa' bete' inde di tando bete'na le'bo'." Ya' sika le'ba'mi bete' molopi.
23Lella' sika molopi lella'ne' Puang Yesus hanne. Pihsananna pihsa'mi sule pepahi käyyäng, lambi' mendai' bombanna le'bo' anna sai'di'i tala sika limmi' yato lopinna aka' naonängnging uhai.
24Ya' ullumbang Puang Yesus yato pahsikolana anna sika nahekei naoaintee, "O Tuang, kalemuiang, la limmi'mi tau!" Tahpa tipahteng siang Puang Yesus di hoi' mai di patindoanna anna ungkohaii yato pepahi käyyäng sibaha bombang tamahamu'. Ya' tahpa naboli siang yato pepahi anna bombang anna mahtai sumule yato le'bo'.
25Mane ma'tula'i pano diii naoaintee, "Umbarea' dio naola kapampetahpa'ammu?" Ya' sika sangka' mahea'mi anna pusa', anna sioa-oainte, "Menna sakalirakae' inde tau anna pake moine' pepahi anna uhai tuhu'-tuhu'ammi pano di pahentana?"
26Ya' sika lambi'mi Puang Yesus sibaha pahsikolana molopi bete' di tando bete'na Galilea di bohtona to Gerasa.
27Tahpana mengngindä'mi Puang Yesus dai' di kalantanang, tahpa suleng natammui mesa muane ang sule di hao mai yato di bohto mahoa'. Yato tau masaeng dai aha siita pakeang, mao mohobeläng leleng anna datoi tohho di dasang ampo' tohho di hao di ku'bu' aka' napentamai setang.
28Tahpana ungngita Puang Yesus, ya' kakilla-killang anna malimuntu'i pano di olona, lella' ma'kara napekäyyängngi naoatee, "O Puang Yesus, Änä'na Dehata ang Handang Matande, aka la umbabe pano di kodi'? Kupalau mating ke la malai dä' undahha."
29Nasuhung ma'tula' noa yatoo, aka' menge Puang Yesus nahambaiing yato setang yaling mai di kalaena. Yato tau si dipungo bihti'na anna teyyena hante bahsi anna malai dai natilakai yato setang ang yaling di kalaena, ampo' dai masae si nabohtu-bohtu yato hante bahsi ang disangke'ing anna nabahai yato setang pano di ongeang ang mahulla-hulla.
30Nakutanaing Puang Yesus naoaintee, "Menna sangammu?" Mentimba'mi naoatee, "Sambahanang." Disanga noa aka' mai'di setang ang mampentama.
31Ya' sika malaung yato setang pano di Puang Yesus anna malai dai napalutama di kahoänna kamateang ang la naongei ditahungkung.
32Di hao di ongeang donetoo sipatu aha mai'di liu bahi lella' sika mambuang yaho di ahe tanete. Ya' sika malaung yato setang ke la malai napabei mentama yato di bahi mai'di. Ya' napabei si'dang Puang Yesus.
33Sohongnging yato setang yaling mai di kalaena yato tau anna mentamai yato di bahi. Ya' bungka' siang yato bahi anna sika tibei naung di behing karakeang lutama di le'bo' lambi' limmi'i.
34Tahpana yato ingkänna tau ang menge sika undakai bahinna ungngita kaha-kaha ang dahi, ya' tahpa sika lumpa'mi le'ba' do napalele pano di bohto mahoa' anna sangngaka-sangngaka bohto ang nasidungku'ing.
35Sohongnging yato tau mai'di yaling mai di bohtona anna maoi ullumba yato ongeang ang naongei Puang Yesus, pemala la sika naita yato kaha-kaha ang mane puha dahi. Sika ungngitang yato tau ang mane puha naalaiing Puang Yesus yato setang yaling mai di kalaena lella' malinong mohko' di behing bihti'na Puang Yesus. Yato tau mampake manahpang aka' marohong sumule pihki'na. Sika mahea' asammi yato tau mai'di ungngita umba noa kakuasaanna Puang Alataala.
36Yato ingkänna tau ang ungngita yato aka ang dahi sika umpainsangngi yato tau mai'di didiona umba noa dipasalama' yato tau di hao mai di kakuasaanna setang.
37Ampo' yato ingkänna to Gerasa sangka' mahea' liu lambi' malau pano di Puang Yesus anna malai baha' mao umpellei yato ongeang. Ya' dai'mi di lopinna Puang Yesus sibaha pahsikolana anna sika sumulei.
38Yato tau ang puha nalahpa' di hao mai di kakuasaanna setang hali toe' malau pano di Puang Yesus ke la malai mempola. Ampo' nasuo sumule Puang Yesus naoaintee,
39"Sumuleo pano di dasammu anna untohodolui aka ang puha nababe Puang Alataala pano di kalaemu." Ya' le'ba'mi yato tau unsamba bohto mahoa' anna napalele lelengngi yato aka ang hali nababe Puang Yesus pano di kalaena.
40Tahpana sumuleng Puang Yesus lubete' yato di bohto ang napengkalaoi, ya' natammuing mai'di liu tau ang inang sika napemitai kasuleanna.
41Donetoo suleng mesa tau ang disanga Yairus, mesa kapala pa'sambayangang yato di bohto. Sule malimuntu' di olona Puang Yesus malau pano anna malai mao pano di dasanna,
42aka' änä' samboana ang mane sampulo derua pahiamanna makorong kahha' anna la mateng. Lella' Puang Yesus mellao lupano yato di dasanna ta Yairus, mai'di liu sule tau sisihpi'-sihpi' mampentindo'i di hao mai di ma'kahupa-hupa bohto.
43Yaling di alla'na aha toe' mesa bahine ang unsa'ding korong mallambi' ang daloloi aha nabolinna yaling di sampulo derua pahiamanna. Dai aha mesa to pa'pakuli ang mala mampabono'.
44Ya' mendungku' di kebo'na Puang Yesus anna naantii pote' kaya' kalambe'na. Ya' bono' siang yato korong ang nasa'ding.
45Mekutanang Puang Yesus naoatee, "Menna inde mai tau ang mane hali ungnganti kaya'ku?" Ampo' dai aha tau donetoo ang bahani mangngaku. Lambi' naoante Petrus, "O Tuang, mai'di liu tau ang mangkulimboio anna ang mansihpi'o."
46Ampo' ma'tula' Puang Yesus naoatee, "Aha mesa tau ang mangngantiä' aka' kusa'ding aha sohong yaling mai di Kalaeku kakuasaang."
47Tahpana nainsang yato bahine naoate yato ang mane nababe dai mala nabuni, ya' tahpa sikalalla'mi mao malimuntu' pano di olona Puang Yesus anna ma'tula'i pano yato di tau mai'di aka suhunna anna ungngantii Puang Yesus anna umba noa tahpa bono' yato koronna puhanna naanti.
48Ma'tula'mi Puang Yesus pano yato di bahine naoatee, "O änä'ku, napabono'o kapampetahpa'ammu. Paela'i, mahasante' inahammu le'ba'."
49Mengeke' Puang Yesus ma'tula', ya' suleng mesa tau luhao mai di dasanna ta Yairus, anna ungngoainte pongkahana, "Mateng änä'mu, Tuang! Damong unsaha-saha inde tuangkuhu."
50Nahingnginna Puang Yesus, ma'tula'mi pano di ta Yairus naoatee, "Daa ummahea', ampo' diare' pamatohoi kapampetahpa'ammu aka' inang la bono'ete' änä'mu."
51Tahpana lambi' Puang Yesus pano yato di dasanna Yairus, ya' ullahang asammi yato ingkänna tau mempola tama yato di tambing ang naonge yato änä' tilampa'. Supung to baha'na sibaha ta Petrus, ta Yohanes anna ta Yakobus ang napabei mempola tama.
52Ingkänna tau di hao yato di dasang sika ungngumbui yato änä', ampo' sika naoainte supu Puang Yesus, "Daa ungngumbua' aka' inde änä' daete' mate, ahana kaleete' hahe."
53Ampo' sika napetaha-tahai supu aka' nainsang naoatee mate si'dang yato änä'.
54Ampo' inde Puang Yesus untokei teyyena yato änä' anna naoaitee, "O Äi', kalehamo!"
55Ya' sumule siang sungnga'na yato änä' anna tahpa ke'de'i. Pihsananna Puang Yesus unsuo tau umpakande yato änä'.
56Aka toiro pusa' ta mengkasilling yato to baha'na änä', ampo' sika nalahang Puang Yesus anna dai napepainsangnging pano di tau senga' yato aka ang mane puha dahi.