Alkitab Mobile SABDA
[VER] : [ARALLE]     [PL]  [PB] 
 <<  Matius 15 >> 

1Pihsananna suleng sangngaka-sangngaka to Farisi anna to pampakuhu ada' yaho mai di Yerusalem umpellambi'i Puang Yesus anna mekutanai naoatee,

2"Akaboi pahsikolamu anna untehkaii atohang ada'na peneneanta? Aka' situhu' ada'na neneta ponna la mande tau, pahallu tau umbasei dolu teyye. Ampo' daine' umbasei teyyena pahsikolamu."

3Mentimba'mi Puang Yesus pano diii naoaintee, "Aka toua' dio anna untehkaikoa' pahentana Puang Alataala supung aka' pemalakoa' untuhu'i ada'na peneneammu?

4Aka' Kalaena Puang Alataala ma'tula' naoatee, 'Pakeangka'koa' to baha'mu.' anna 'Menna la untändoi to baha'na pahallu la dipatei.'

5Ampo' si aha ang mangngoatee, 'Moinnakato aha aka-akangku, dasiang la kubea to baha'ku aka' la kupopenomba dai' di Puang Alataala ke dako'mi.' Dahi situhu' ang ungngoa, yato tau ang ma'tula' noa dang mangki' umpakeangka' to baha'na. Dahi aka' umpanoaa' yatoo, ya' umpakekuna puharakoa'to dio disanga ada'na peneneammu andana Bahtakara Dehata aka' danne' umpakekuna.

6(15:5)

7Oa' ingkämmu to kalasi! Tahpa'mi pole' tula'na Puang Alataala ang puha natula' lohpo' Nabi Yesaya didiomua' ang naoatee,

8'Ingkänna inde mai tau tula'na kale anna dioaitee napamatandeä', ampo' yaling di inahanna nakahaoiä' nei'.

9Alla' sika napenombaiä' aka' pepakuhu ang sika napake dianto pepakuhunna hupatau, tadia pepakuhungku.'"

10Puhai ma'tula' noa yato Puang Yesus, ya' untambaing yato tau mai'di anna sika naoaintee, "Pehingngiia' anna malai ungnginsang inde pohapangang:

11Tadiaete' ang lutama di sua ang ungkärähko'i tau, ampo' ang sohongngete' yaling mai di sua dianto ang ungkärähko'i tau."

12Pihsananna suleing mendungku' yato pahsikolana anna sika mekutanai naoatee, "O Tuang, ungnginsandaka yato tula'mu umpatisiku ingkänna to Farisi ang manghingngi?"

13Mentimba'mi Puang Yesus naoatee, "Ingkänna pinamula ang tadia pampamulanna Ambeku la dihe'bu'i asang lambi' naung di uhaka'-haka'na.

14Pabei tomande'ia' ne mating to Farisi. Aka' diante' ne mating to buta ang umbahanang solana to buta, anna ponna to buta untehte santobutanna tantunte' anna sahing manahoi naung di kalo'."

15Ma'tula'mi Petrus pano di Puang Yesus naoatee, "Pakalesoingkang ne pohapangammu pano di kami'."

16Ampo' mentimba' Puang Yesus nakutanai sala naoatee, "O', datuke'a' dio umpähäng?

17Darakaa' dio ungnginsang ungngoate aka-aka siamo ang mentama di sua lunaung di kompeng mane dipasohongngi?

18Ampo' ang sohong yaling mai di sua, sule yaling mai di inaha anna dianto yatoo ang mekärähko'i.

19Aka' yaling mai di inaha dianto nakasohongngi ingkänna pihki' karake sinnoanna: papateang, ungngindä'-indä' pa'bannetauang, samangkamahoinna, bokoti, umpa'loseng-losengnging sola anna untändä' tahuhu sola.

20Ingkänna yatoo dianto ang ungkärähko'i tau. Ampo' ke mande tomande'i tau dai mangki' umbasei dolu teyye, daete'ne' mekärähko'i."

21Ya' le'ba'mi Puang Yesus umpellei yato ongeang anna tirendei pano di mesa ongeang ang sidungku' Bohto Tirus anna Sidon.

22Lambi'na pano, ya' suleng nalumba mesa bahine to Kanaan ang tohho yato di bohto anna kakoha-kohai naoatee, "O Puang, Änä'na Daud! Kalemuiä'! Pabono'ingkä' änä'ku aka' napentamai setang anna madahha si'da-si'da nasa'ding."

23Ampo' moi taahai natimba'i Puang Yesus yato aka ang naoa. Ya' sika mendungku'mi yato pahsikolana anna malaui pano naoatee, "Suoi indo le'ba' bahine, andana napotindo'-tindo'ingkea' sibaha kakoha-koha!"

24Mensaileng Puang Yesus pano yato di bahine anna ma'karai naoatee, "Disuoä' sule supung la umpeäng ingkänna to Israel ang sähsä' lalang."

25Ampo' yato bahine mendungku' anna menombai pano di Puang Yesus menge siang ma'tula' naoatee, "O Puang, kalemuiä'."

26Natimba'mi Puang Yesus yaling di pohapangang didiona to Yahudi ang sihapang 'änä'' anna ang tadia to Yahudi ang sihapang 'asu,' naoatee, "Dai sihatang andeang ang inang dipatoka toboinne' änä' la dibea pano di asu."

27Ma'tula' bumi yato bahine naoatee, "Inang tahpa'ete' ne ang ungngoa, Puang, ampo' yato asu malaete' ungngande tahu'bi' ang manahoi yaho mai di mejana puänna."

28Ya' ma'tula'mi Puang Yesus pano yato di bahine naoatee, "Ei, ahana inang mesao bahine ang mampetahpa' si'da-si'da. Dinoa la dahinte' yato aka ang umpemala." Ya' donetoo bono' siang yato änä'na.

29Umpelleing yato ongeang Puang Yesus sibaha pahsikolana anna maoi ungngundu' behing Le'bo' Galilea. Dai'mi di mesa tanete anna mohko'i yaho.

30Pihsananna suleirang mai'di liu tau umbaha to makoronnaii: aha ang makule, aha ang buta, aha ang hehpä', aha ang pepe anna mai'dike' to makorong ang senga', anna sika nabahai pano di behing bihti'na Puang Yesus. Lambi' ingkänna yato to makorong napabono' asang.

31Ya' pusa' asammi yato tau mai'di ungngita to pepe mala ma'kara-kara, to makule mala mellao, to hehpä' mala bono', to buta mala paita, anna sika umpamatandei Dehatanna to Israel.

32Donetoo untambaing pahsikolana Puang Yesus anna naoaitee, "Kukalemui liu kasi inde mai tau mai'di, aka' tallung allona sibahaä' ampo' dai sika keandeang. Dabure palla' inahangku la sika kusuo le'ba' ke manonoi, aka' daa-daa naala pali di tängngä lalang."

33Naoante yato pahsikolana, "Ya' umbanne' la dipangngalai roti dinne done di ongeang mahulla-hulla la dipakandeing indo pano tau sahsamanna?"

34Mekutanang Puang Yesus pano diii naoatee, "Sangngakake'a' rotimmu?" Sika mentimba'mi naoate, "Ahake' pitu roti anna aha tuke' sangngaka amo lisa'na bau sisaohko'."

35Ya' unsuong yato tau mai'di Puang Yesus sika mohko' naung di tampo.

36Mane ungngalai yato pitu roti sibaha bau anna ma'kuhhu'sumanga'i dai' di Puang Alataala. Puhai yatoo ya' umbika-bikang yato andeang mane nabeai pano di pahsikolana anna malai nasusa pano di tau mai'di.

37Ingkänna tau ang aha donetoo mampebohoi asang. Pihsananna nahimpummi yato pahsikolana la'binna ang dang napuha tau, ya' punno salake' pitu dakang käyyäng.

38Yato tau ang mande donetoo umbai uhpa' sa'bu mai'dinna muane, dake' diihsa' bahine anna änä'.

39Puhai, ya' unsuong yato tau mai'di sika sumule pano di bohtonaii, anna dai'ine' di lopi sibaha pahsikolana lubete' di mesa ongeang ang sidungku' Bohto Magadan.


  Share Facebook  |  Share Twitter

 <<  Matius 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran