Dual Panel1Napatahhi' bumi tula'na Puang Yesus pano di pahsikolana umpake pohapangang naoatee, "Didiona Kapahentaanna Puang Alataala, sihapang puänna sallimbo bela' angkoro', ang le'ba' kalao-lao mebengngi'-bengngi' umpeäng tau ang la nasahoi mengkähäng yaling yato di bela'na.
2Ponna ke puhang sibohtu umba sama sahona yaling di sangngallona situhu' pa'pesaho ang si biasa, ya' nasuong sika mao mengkähäng pano di bela'na.
3Tahpana dai'-dai'mi allo, ya' kalao-lao bumi yato puäng bela'. Ungngitang sangngaka-sangngaka tau di hao di pasa' ang si kalao supu dai aha kähänganna.
4Ya' napa'karaing naoaintee, 'Lao toukoa' dio pengkähäng pano di bela'ku anna kusahoikoa' ang la sihatang sahomu, andamu si kalao kale supu.'
5Ya' sika maong yatoii. Tahpana tängngä allo umbai tehte' sampulo derua, ya' kalao-lao bumi yato puänna bela' umpeäng bou tau ang la napopengkähäng pano di bela'na. Ya' noa tunne' tahpana tehte' tallu le'ba' bumi.
6Umbai tehte' lima di maloe kalao-lao bumi, ya' ullambi' bumi tau ang dai aha kähänganna. Ya' nakutanaing naoaintee, 'Akana tohhorakoa' dio supu umpesangngalloi?'
7Sika mentimba'mi yatoii naoatee, 'Aka' daang aha mansahoi.' Naoa bumintee, 'Ya' lao toukoa' dio pano di bela'ku pengkähäng anna kusahoikoa'.'
8Tahpana lambi'mi tempona la napasoho', umbai tehte' unnung, ya' untambaing to pandaka to pengkähänna yato puänna bela' anna nasuoi naoaintee, 'Tambai asangngi indo pano to pengkähäng anna unsusaing sahona mengkalao ang handang di hundi tama lambi' ang handang uhuna mentama.'
9Ya' suleing yato to pengkähäng ang tama tehte' lima di maloe, ya' nabeang sahona pa'sangngalloang.
10Pihsananna suleing yato to pengkähäng ang handang dolu mentama. Yaling di pihki'naii nasanga la mai'di puhane' nabea yato puäng bela' aka' masaenne' mengkähäng. Ampo' sinnoa sianne' sahona yato tau ang mane tamane' di maloe.
11Natahimbona yato sahonaii, ya' sika unsallang yato puänna bela' anna sika momämmängngi naoatee,
12'Umpasinnoa siangka sahoki' inde mai tau ang mane santehte'ne' mengkähäng anna kami'-kami' mengkähängngang mengkalao di mebengngi' nadä'dängngang allo?'
13Mentimba'mi yato puänna bela' pano yato di mesa to pengkähäng naoaintee, 'O solasohong, darakate' para-parang pa'pesahoku mating di dioa' aka' inang puha lohpo' dibohtu ang sihatang saho yaling di sangngallona, i?
14Dahi ala tungnga' dio ne sahomu anna umbahai, aka' pemala tukä'ne' la kusahoi inde mai tau ang di hundi tama sinnoa siang sahomu.
15Mennaraka kodi' la mansängkäiä' ke kupopa'inaha-nahai inde aka-akangku situhu' pampemalangku? Bahtu' ma'kasueherakakotoo aka' marota'ä'?'"
16Natämpä'ing tula'na Puang Yesus naoatee, "Mai'di tau ang dipadihoi'ang dinoa la dipakeangka' ke dako'mi, anna noa toi mai'di tau ang dipakeangka' dinoa la dipadihoi'ang ke dako'mi."
17Donetoo sika mengkalaong ludai' di Yerusalem Puang Yesus sibaha pahsikolana. Tahpana dang aha tau senga' manghingngi, ya' untambaing pahsikolana Puang Yesus anna napa'tula'ii lella' sika mellao naoaintee,
18"Dinoa la dai'ingkea' di Yerusalem anna la lambi'mi tempona Kodi' inde Änä' to Lino dibehoä' pano di kapala-kapala imang anna to pampakuhu ada' anna la sika natahungkung mateä',
19mane dibehoä' pano di tau ang dai ungnginsang Puang Alataala, anna malai napakauho-uhoä' anna nadahha tuhoä' anna sika napateiä' yaho di kayu sitambeng, ampo' la tuhoä' sumule di allo katallunna."
20Donetoo suleng bahinena ta Zebedeus sibaha derua änä'na, dianto ta Yakobus anna ta Yohanes, anna mengkuntu'i di olona Puang Yesus anna malaui.
21Nakutanaing Puang Yesus naoaintee, "Aka ang umpemala la kubabeingko?" Mentimba'mi naoatee, "Kupalau ke la malai ponna ke ma'pahentamo yaling di katomarayaammu la umpaohko' touingkä'ne' inde derua änä'ku mesa tando di kuanammu anna mesa tando di kaihimmu."
22Ampo' mentimba' Puang Yesus naoatee, "Dai ne ungnginsang aka ang menge umpalau." Mane nakutanaii naoatee, "La untuaraka ungngolai kamasuhsaang lambi' mate ang pahallu kuolai?" Sika mentimba'mi naoatee, "Io, kitua kiolai."
23Naoa bunte Puang Yesus pano diii, "Ahana inang la ungngolairea'te' yato kamadahhaang ang la kuolai, ampo' didionane' menna ang la mohko' di hao di tando kuanangku anna tando kaihingku tadiaete'ne' Kodi' ang mampama'tantu, ampo' Ambekuete'ne' mampama'tantu pano di si mesa-mesa tau ang la sihatang nabea."
24Nahingnginna yato sampulo pahsikolana Puang Yesus ang senga', ya' sika keaha'mi pano yato di derua to sipoari.
25Ampo' sika natambai Puang Yesus anna napa'karaii naoaintee, "Ungnginsammia' umba noa to pa'pahenta yaling inde di lino ma'pahenta sitonda kamakahha'anna, anna ingkänna to kepangka' umpalao kakuasaanna sitonda kamasahhu'ang pano di petauanna.
26Ampo' daia' dio mala noa yaling di alla'-alla'mu. Menna ang pemala mendahi ang handang keangka' yaling di alla'mua' pahallu mendahi to pantahiainna solana,
27anna menna-menna ang pemala mendahi tau ang handang dipa'käyyängngi pahallu mendahi sabua'mu.
28Sinnoaä' Kodi' inde Änä' to Lino, suleä' mentama inde di lino, dä' la ditahiai, ampo' suleä' la mantahiai anna la umbehoä' sungnga'ku unsulängngi hupatau."
29Tempo donetoo umpelleing Bohto Yerikho Puang Yesus sibaha pahsikolana, ya' mai'di liung tau mampentindo'i.
30Aha derua to buta ang mohko' di hao di behing lalang unghingngi tula'na yato tau mai'di naoatee Puang Yesus liu. Ya' kakoha-kohang yato to derua naoatee, "O Puang, Peänä'anna Tomaraya Daud, kalemuiang kasi."
31Ampo' yato tau mai'di ang untindo'i Puang Yesus sika unsängkäi yato to deruai anna dai kakoha-koha, ampo' yato to buta tuhtuang napekäyyängngi mekoha naoatee, "O Puang, Peänä'anna Tomaraya Daud, kalemuiang kasi!"
32Pihsananna tohhong Puang Yesus anna untambaii yato to derua mane nakutanaii naoaintee, "Aka ang umpemala kubabeingkoa'?"
33Sika mentimba'mi naoatee, "O Puang, pemalaang paita."
34Ya' kende'mi yaling di inahanna Puang Yesus pa'kalemu pano yato di to buta, ya' naantiming yato matannaii lambi' donetoo mala siang paita anna untindo'i Puang Yesus.