Alkitab Mobile SABDA
[VER] : [ARALLE]     [PL]  [PB] 
 <<  Matius 23 >> 

1Pihsananna ma'karang Puang Yesus pano di pahsikolana anna pano di tau mai'di ang tihimpung di hao naoatee,

2"Ingkänna to pampakuhu ada' anna ingkänna to Farisi ma'kuasa umpakaleso Atohanna Musa.

3Dianto anna tuhu'iia' anna pembabeing dia siamo ang napakuhuingkoa', ampo' dane' umponialaii pembabenaii. Aka' supung sika nainsang natula' anna napepakuhuing umba noa Atohanna Musa, ampo' daine' nainsang napembabeing yato aka ang napepakuhuing.

4Sika umpahsa tau untuhu'i atohang ang mapahhi', sihapang napabullei bahaang ang handang matingngi, ampo' daine' sika naaku undului tau umpembabeing yato atohang, sihapang dai naaku undului tau umbaha yato bahaang ang handang matingngi.

5Ingkänna aka siamo ang nababe supung aka' pemala naita tau. Hapanganna sika naangka'i umpakäyyäng pahti-pahti sambayannaii anna umpakalambe' maho pesangke' kaya' kalambe'na.

6Anna ponna ke ahai pa'rame-rameang, ya' si nakärä'i mohko' di hao di ongeang ang dipasadiaing to dipakeangka'. Noa tunne' ke maoi ma'sambayang si umpeäng ohko'ang ang handang mahasa.

7Sika nakärä'i liu ponna natabe'ii ingkänna tau di hao di pasa', anna ke natambaii ingkänna tau naoainte, 'O Tuangkuhu.'

8Ampo' dioa' dio daa umpabeii ingkänna tau naoaingkotee, 'O Tuangkuhu,' aka' supung mesaa' ang umpotuangkuhu, anna sisolasohong asangkoa' dio yaling di kasahaniang.

9Anna daa unsändä'i la unsangai moi poro la mesa tau yaling inde di lino ungngoainte, 'Ambe'' tandana umpakeangka'. Aka' supung mesa Ambemu dianto ang yaho di suruka.

10Anna datoune' umpabeii tau la nasangaio, 'Pongkaha,' aka' supung mesa pongkahamua' dianto Kodi' inde To Dilanti' la Mepasalama'.

11Menna ang handang keangka' di alla'mua' la pahallu mendahi to pantahiainna solana.

12Anna menna-menna unsanga kalaena mayahoang la napadahi madihoi'ang Puang Alataala, ampo' ang unsanga kalaena madihoi'ang la napadahi mayahoang Puang Alataala."

13Mane umpa'karaii to pampakuhu ada' anna ingkänna to Farisi Puang Yesus naoatee, "Tilakakoa' ingkämmu to pampakuhu ada' anna ingkämmu to Farisi. Diongnga'to to kalasi. Dakoa' umpabei tau la mendahi petauanna Puang Alataala, anna dio siangnga' dai ungngaku mendahi petauanna Puang Alataala. Anna tau ang pemala mendahi petauanna Puang Alataala si unsarapa'ia'.

14[Tilakakoa' ingkämmu to pampakuhu ada' anna ingkämmu to Farisi. Diongnga'to to kalasi. Si umbulitu'koa' balu bahine lambi' unghampa'i aka-akanna. Si ma'sambayang kalambe'koa' aka' pemalakoa' dioaintee, 'Ei, meimäng si'da-si'da!' Dio asammia'to indee ang la untahimbo tahungkung ang handang matingngi ke lambi'mi tempona nahohto' Puang Alataala.]

15Tilakakoa' ingkämmu to pampakuhu ada' anna ingkämmu to Farisi. Diongnga'to to kalasi. Le'ba'koa' unsamba lino kalao-lao supung aka' pemalakoa' umpatama di ada'mu moi poro mesa tau ang tadia to Yahudi anna malai napensinnoaikoa'. Ampo' ponna ke mampetahpa'mi yato tau, ya' umpadahingnga' mesa tau ang la sihatang tama di api nahaka liba' puhane' andana kalaemua'.

16Tilakakoa' ingkämmu to pambahanang ang buta. Noaa' inde ang umpepakuhuing: Ponna aha mesa tau mopinda dai' di Puang Alataala umpake Dasang Ada' mendahi sa'binna, ya' dai aha suhunna yato popindana lambi' dai maaka ke dai napembabeing. Ampo' ponna mopinda umpake aka-aka bulahang ang aha yaling di Dasang Ada' mendahi sa'binna, ya' hoa liu yato popindana anna pahallu napembabe si'daing.

17Oa' ingkämmu semahoang to buta pihkihang, darakaa' dio ungnginsang ungngoate keangka' tubunte' Dasang Ada' andana bulahang ang aha yaling? Aka' Dasang Ada'ete' ang umpamasero bulahang ang aha yaling.

18Mampakuhu toukoa'ne' ungngoatee: Ponna mesa tau mopinda dai' di Puang Alataala umpake pantunuang penombaang mendahi sa'bi, ya' dai aha suhunna yato popindana lambi' dai maaka ke dai napembabeing. Ampo' ponna mesa tau mopinda umpake penombaang ang aha yaho di pantunuang penombaang mendahi sa'binna, ya' hoa liu yato popindana anna pahallu napembabe si'daing.

19Ahana inang buta si'da-si'daa' pihkihammu. Darakaa' dio ungnginsang ungngoate keangka' tubunte' pantunuang penombaang andana penombaang ang aha yaho di hahona? Aka' pantunuang penombaangngete' ang umpamasero yato penombaang.

20Dahi ponna mesa tau mopinda umpake pantunuang penombaang mendahi sa'bi, ya' naposa'bi asammite' mengkalao di pantunuang penombaang lambi' ingkänna penombaang ang aha yaho di hahona.

21Anna ponna mesa tau mopinda umpake Dasang Ada' mendahi sa'bi, ya' naposa'bi asammitee' moi Dasang Ada' noa tunne' Puang Alataala ang tohho yaling.

22Anna ponna mesa tau mopinda umpake suruka mendahi sa'binna, ya' bahtuanna yato tau umposa'bi toe' Kapahentaanna Puang Alataala noa tunne' Kalaena Puang Alataala ang mohko' ma'pahenta yaho.

23Tilakakoa' ingkämmu to pampakuhu ada' anna ingkämmu to Farisi. Diongnga'to to kalasi. Umpenombaingnga' dai' di Puang Alataala bahe sampulona ingkänna rampa-rampa ang bomammi' anna lohpo ang si dipopakuli. Ampo' ang setonganna handang pahallua' la umbabe situhu' Atohanna Musa, sinnoanna mampapara-para, ma'kalemu pano di tau senga' anna tuho maroho ang la mala dipetahpa', bilang daia'ne' umbabe. Ponna untuhu'ikoa' atohang, ya' pahallu untuhu'i asang; dai mala untuhu'i piha anna daine' piha.

24Oa' ingkämmu to pambahanang ang buta. Umpihki'a' supu kaha-kaha ang saohko' sinnoa mesa tau ang bilang naita nei' ungngalai kampihsi' ang mentama di enu'anna, ampo' daia'ne' umpihki' kaha-kaha ang käyyäng puha nei'. Sinnoakoa' mesa tau ang tahhi' umpasienu' onta ang aha yaling di enu'anna.

25Tilakakoa' ingkämmu to pampakuhu ada' anna ingkämmu to Farisi. Diongnga'to to kalasi. Sihapangkoa' enu'ang bahtu' kahti ang supung di aneanna dipamabasei. Ampo' setonganna yalingnga' di inahammu supung punno kamakahha'ang anna kakarakeang.

26Oa' to Farisi buta, pamabaseiia' dolu ang tando yaling di huänna, anna malai mabahahsi toe' tando di aneanna.

27Tilakakoa' ingkämmu to pampakuhu ada' anna ingkämmu to Farisi. Diongnga'to to kalasi. Sinnoakoa' mesa ku'bu' ang dimabusai anna malai mahasa diita di aneanna, ampo' setonganna tando yalinna punno karähko' ang bobohsi' anna punno bukunna to mate.

28Noa tumokoa'to dio, di aneang noakoa' ang mapia anna meimäng naita tau, ampo' yalingnga' di inahammu punno kalosengang anna kamahoang.

29Tilakakoa' ingkämmu to pampakuhu ada' anna ingkämmu to Farisi. Diongnga'to to kalasi. Umpapiakoa' ku'bu'na ingkänna nabi, anna umpamalehke'koa' tanda pengkakalehaanna pano di tau ang maroho katuhoanna.

30Anna ungngoaa'tee, 'Ke la inang ahamang di tempona to baha' dolu, ya' dai kami' la kiaku sika kiponialai umpatei ingkänna nabi.'

31Ampo' dimangngakanna anna dio siangnga' umpatandaang kalaemu, anna diongnga'to peänä'anna yato to umpatei ingkänna nabi.

32Dahi bilang patahhi'ke'a' lambi' puha yato ingkänna dosa ang napahandu'ingkoa' peneneammu.

33Diongnga'to to karake anna peänä'anna to karake! Daia' aha lalang la lahpa'koa' di hao mai di tahungkunna Puang Alataala, dianto api nahaka.

34Dahi pehingngii manahpaia' indee: La kusuoingkoa' mating sangngaka-sangngaka nabi, sangngaka-sangngaka tau ang manähäng anna sangngaka-sangngaka tuangkuhu. Ingkänna indee aha ang la umpateia', anna senga'nake' la untoke' dai' di kayu sitambeng anna ang senga' la undahhaa' yaling di pa'sambayangang anna la ullola lelengnga' pano di ingkänna bohto.

35Dianto anna la natahungkungkoa' Puang Alataala. Anna la nahoa toukoa' nei' tahungkunna ingkänna to papateang ang umpatei tau ang dai kekasalaang dolu, napahandu' kamateanna Habel ang dai aha kasalaanna lambi' kamateanna Zakharia änä'na ta Berekia ang napateia' peneneammu di alla'na Dasang Ada' anna pantunuang penombaang.

36Kutula'ingkoa' setonganna tahungkunna yato ingkänna ang puha membabe noa la natangkung tau ang aha tempo dinoa."

37Natämpä'ing tula'na Puang Yesus umpihki' yato ihsinna Bohto Yerusalem naoatee, "O ihsinna Yerusalem, palla'e dio inahammu umpatei ingkänna nabi anna unsaleba'i piha batu ang setonganna disuoingkoa' sule! Masae allong pemala liuä' la unghimpung ingkänna petauammu, sihapang indo mane' ang unsalohko'i änä'na di hoi' di pani'na, ampo' daia' ungngaku.

38Dianto anna napelleimokoa' Puang Alataala lambi' mahulla-hulla Dasang Ada'na.

39Pengkakalehaiia', mengkalao dinoa inang dämä' aha la ungngita lambi' ma'tula'koa' ungngoatee, 'Dibehene' tau ang sule yaling di sanganna Dehata.'"


  Share Facebook  |  Share Twitter

 <<  Matius 23 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel