Alkitab Mobile SABDA
[VER] : [ARALLE]     [PL]  [PB] 
 <<  Matius 25 >> 

1Napatahhi' bumi tula'na Puang Yesus naoatee, "Ke donentoo ke sulemä' ma'pahenta, yato kasuleangku la sinnoa inde pohapangang: Aha sampulo änä' bahine ang si untindo' to kabeng, mao pano ungngempei kasuleanna muane, pantang umbaha lampunna.

2Di alla'na yato to sampulo, aha lima ang keaka' anna lima ang dai keaka'.

3Yato änä' bahine ang dai keaka' umbaha lampunna, ampo' daine' umpasadia minnä' ang la naminnä'ing yato lampunna ke puhang minnä'na.

4Yatone' änä' bahine ang keaka' inang umpasadiane' minnä' yaling di buli-buli ang la naminnä'ing lampunna ke puhang yato minnä'na ang inang aha yaling.

5Ampo' aka' yato muane ang la kabeng masaee' bengi daloloi aha sule, ya' sika situndung yato änä' bahine lambi' hahei.

6Tahpana tängngä bengi sika kohang tau naoatee, 'Suleng muane ang la kabeng! Maimokoa' tammuii!'

7Ya' kaleha asammi yato änä' bahine anna umpasadia manahpai lampunnaii.

8Yato änä' bahine ang dai keaka' malau pano di änä' bahine ang keaka' naoatee, 'Kalemuiang beaang sai'di' minnä'mu aka' la pi'deng kami' lampungki', puha minnä'na.'

9Mentimba'mi yato änä' bahine ang keaka' naoatee, 'Ya' daete' mala, aka' datoikang la kanna' kipake ke kibeakoa'. Dotang nei' maokoa' do ungngalli pano di to pa'balu' minnä'.'

10Ya' sika le'ba'ing do ungngalli minnä'. Di tempona sika le'ba' mangngalli, ya' suleng yato muane ang la kabeng anna le'ba'i pano di ongeang pa'tokabengang sibaha yato änä' bahine ang keaka' ang inang sadiang. Lambi'na pano, ya' ditutu'ing baba.

11Pihsananna sule tunne' yato änä' bahine ang dai keaka' anna sika tambai yaling di aneang naoatee, 'O Tuang, O Tuang, buhkeiingkang babamu!'

12Ampo' mentimba' yato muane ang menge kabeng naoatee, 'Dakoa' kuinsang, mennarakakoa' dio?'"

13Natämpä'ing pohapanganna Puang Yesus naoatee, "Dianto anna pahallukoa' madaka si'da-si'da, aka' inang darea'te' la ungnginsang allo anna tehte'na kasuleangku."

14Nalombungngi tula'na Puang Yesus naoatee, "Kasuleangku umpasundung Kapahentaanna Puang Alataala la sinnoa toe' inde pohapangang: Aha mesa pongkaha la mao pano di ongeang senga' ang makahao. Dolunna la mao untambai dolu sangngaka-sangngaka sabua'na anna nasusaii aka-akanna ang pahallu nadakaiing.

15Inde sabua' pantang nasusai doi' pera' anna malai naputa' situhu' kamanähänganna. Sabua' ang uhuna nabea limansa'bu doi' pera', ang kaderuanna nabea donsa'bu doi' pera', ang katallunna nabea sansa'bu doi' pera'. Puhai yatoo, ya' mane le'ba'i.

16Yato sabua' ang untahimbo limansa'bu doi' pera' tahpa mao siang do naputa' yato doi'na. Ya' ullambi'mi kauntungang limansa'bu sala doi' pera'.

17Noa tunne' yato sabua' ang kaderuanna ang untahimbo donsa'bu doi' pera' le'ba' toe' naputa'. Ya' ullambi'mi kauntungang donsa'bu sala doi' pera'.

18Ampo' yatone' sabua' ang untahimbo sansa'bu doi' pera', le'ba'ne' do umbombeng tampo anna nalamungngi yato doi' ang nabea pongkahana la naputa'.

19Tahpana masae puhanna yatoo, ya' sumuleng yato pongkahana anna sika nakutanaii didiona yato doi' ang puha sika dibea la naputa'.

20Suleng yato sabua' ang untahimbo limansa'bu doi' pera' umbaha yato doi'na sibaha yato kauntungang ang nalambi'. Naoante pano di pongkahana, 'O Tuang, yato doi' ang umbeaä' limansa'bu kuputa', ya' ullambi'mä' kauntungang limansa'bu sala doi' pera'.'

21Naoante yato pongkahana, 'Mapia liu ne babemu. Dionto inde sabua' ang tuhu'-tuhu'ang anna mala dipetahpa'. Dahi aka' malamo dipetahpa' yaling di kaha-kaha ang saohko', dinoa la kupetahpa' tumo nei' yaling di kaha-kaha ang käyyäng. Maimo anna ma'masannang-sannangngingke sibaha.'

22Sule tunne' yato sabua' ang untahimbo donsa'bu doi' pera' umbaha yato doi'na anna kauntungang ang nalambi'. Naoantee pano di pongkahana, 'O Tuang, yato doi' ang umbeaä' donsa'bu doi' pera' kuputa', ya' ullambi'mä' kauntungang donsa'bu sala doi' pera'.'

23Naoante yato pongkahana, 'Mapia liu ne babemu. Dionto inde sabua' ang tuhu'-tuhu'ang anna mala dipetahpa'. Dahi aka' malamo dipetahpa' yaling di kaha-kaha ang saohko', dinoa la kupetahpa' tumo nei' yaling di kaha-kaha ang käyyäng. Maimo anna ma'masannang-sannangngingke sibaha.'

24Pihsananna sule tunne' yato sabua' ang untahimbo sansa'bu doi' pera' anna naoaite pano di pongkahana, 'O Tuang, kuinsang kuoate masahhu'o. Anna aha tomande' aka-akammu dai mangki' ungkapahtui aka' ungkuasai asangngo ingkänna tau.

25Dianto anna mahea'mä' lambi' maoä' kulamung yato doi' ang umbeaä'. Indeeng yato doi'mu, alai.'

26Mentimba'mi yato pongkahana naoatee, 'Ahana inang dionto inde sabua' ang meinaha karake anna tengkong bosi! Dahi ungnginsammi ungngoate aha tomande' aka-akangku dai mangki' kukapahtui aka' ungkuasai asangngä' ingkänna tau?

27Ponna noae dio pihki'mu, ya' dotanne' umbea pano di tau senga' ne doi'ku ang la mala mambungai, lambi' ke sumulemä' mala kutahimbo ne doi'ku sibaha bunganna.'

28Naoante yato pongkaha pano di suoanna ang senga', 'Hampa'ine' ne doi'na anna umbeai pano di sabua' ang untokei doi' sampulo sa'bu doi' pera'.

29Aka' menna-menna ang inang ahang aka-akanna la dihängngängngiking lambi' la'bi kaleng, ampo' tau ang dai aha, moi sai'di' ang naampui bilang la dihampa'i asang nei'.

30Anna ne sabua' ang dai huhu pembabena anna dai aha kunanna, pensaleba'ing tama di ongeang kamalillingang ang handang mapähtäng, di haontoo ang la naongei tau sika umbu salamang ang kamateang.'"

31Nalombungngi bumi tula'na Puang Yesus naoatee, "Kodi' inde Änä' to Lino la suleä' dako' sitonda kamatandeang anna natindo'iä' ingkänna malaeka'. Ke donentoo la mohko'ä' yaho di ohko'ang ang matande anna ma'pahenta salamang tomaraya.

32Mane kuhimpungngi ingkänna tau di lino di hao di oloku. Yato ingkänna tau la kupasipataniang ang mapia pembabena anna ang tahuhu pembabena, sinnoa mesa to pangkambi' ang umpasipataniang domba anna beke.

33Tau ang membabe mapia situhu' pangngelo'na Puang Alataala la kupadihaone' di tando kuanangku, anna tau ang membabe karake la kupadihaone' di tando kaihingku.

34Pihsananna Kodi' inde Tomaraya la kupa'karai yato tau ang di hao di tando kuanangku kuoaintee, 'Maimokoa', ingkämmu ang nabehe Ambeku Puang Alataala. Pentamamokoa' anna ungngala tahakoa' yaling inde di katomarayaang ang inang napasadiaingkoa' mengkalao pampahandu'anna lino dipapia.

35Aka' naonge manonoä' umbeaä' andeang, naonge mahähängngä' umpaenu'ä', anna naonge liu lalangngä' umpalempängngä' tama di dasammu.

36Naonge dä' mekaya', umbeaä' kaya'; naonge makorongngä', undama manahpaä'; anna naonge yalingngä' di tahungkung, ungngeka'ä' anna ungkalemuiä'.'

37Yato tau ang kupa'karai la sika mekutana naoatee, 'O Puang, di pihhang anna ahao kiita manono anna kipakandeo? Bahtu' kiitao mahähäng anna kipaenu'o?

38Di pihhang anna ahao kiita liu lalang anna kipalempängngo tama di dasangki'? Bahtu' kiitao dai mekaya' anna kibeao kaya'?

39Di pihhang anna ahao kiita makorong anna kidama manahpao? Bahtu' kiitao yaling di tahungkung anna kieka'o tama di pantahungkungang?'

40Pihsananna Kodi' inde Tomaraya la mentimba'ä' kuoatee, 'Kutula'ingkoa' setonganna ingkänna pa'kalemu ang puha umbabe, moinnakato anna umbabei pano inde di solasohongku ang memase-mase anna dai sundung tuhona, ampo' setonganna Kodi'ete' yato ang puha ungkalemui.'

41Puhaitoo, ya' la kupa'karai tunne' yato tau ang mohko' di hao di tando kaihingku kuoatee, 'Palaikoa' di hao di oloku, ingkämmu tau karake ang puha natändo Puang Alataala. Palaikoa' anna tamakoa' di api nahaka ang inang puha dipasadia la naongei Pongkahana setang anna ingkänna to pentindo'na.

42Aka' naonge manonoä', dä' aha umpakande; anna naonge mahähängngä', dä' aha umpaenu'.

43Naonge liu lalangngä', dä' umpalempäng tama di dasammu; naonge dä' mekaya', dä' aha umbea kaya'; naonge makorongngä' anna yalingngä' di tahungkung, dao aha sule ungkandapaiä'.'

44Yato tau ang di hao di tando kaihingku la sika mekutana naoatee, 'O Puang, pihhang anna ahao kiita manono, bahtu' mahähäng, bahtu' liu lalang, bahtu' dao mekaya', bahtu' yalingngo di tahungkung anna dao kikalemui?'

45Pihsananna Kodi' inde Tomaraya la mentimba'ä' kuoatee, 'Kutula'ingkoa' setonganna naonge daia' ungngaku ungkalemui sala' umbannai inde di alla'na tau ang memase-mase anna dai sundung tuhona, tadiaete' dia yato ang daia' ungngaku ungkalemui ampo' setonganna Kodi'etee'.'

46Anna dianto inde mai tau ang la ditahungkung tama di api nahaka ang naongei kamadahhaang ang dai aha puhanna. Ampo' yatone' tau ang membabe mapia la tama nei' di ongeang kamasannangang ang dai aha puhanna."


  Share Facebook  |  Share Twitter

 <<  Matius 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel