Alkitab Mobile SABDA
[VER] : [ARALLE]     [PL]  [PB] 
 <<  Matius 26 >> 

1Tahpana puha asang yato ingkänna pepakuhunna Puang Yesus, ya' ma'tula'mi pano di pahsikolana naoatee,

2"Ungnginsangnga' dongngallorang supu anna lambi'mi tempo pa'rame-rameang Paskana to Yahudi. Donetoo Kodi' inde Änä' to Lino la nabehoä' mesa tau pano di tau ang la mantoke'ä' dai' di kayu sitambeng."

3Donetoo sangngaka-sangngaka kapala imang anna setobaha'anna to Yahudi ma'limbo di hao di dasanna handang pongkahana imang ang disanga Kayafas.

4Sika untula' umba la napanoa unsahka Puang Yesus situhu' pihki' karakenaii, anna malai ditahungkung mate.

5Ampo' sika naoatee, "Dai mala disahka di tempona pa'rame-rameang aka' umbai la umpasiba'di-ba'di tau mai'di."

6Donetoo le'ba'mi Puang Yesus naung di Bohto Betania anna tohhoi di hoi' di dasanna mesa tau ang hali bosi lollo'na napobua' korong. Yato tau disanga ta Simon.

7Menge mohko' Puang Yesus mande, suleng mesa bahine umbaha mesa buli-buli maleke ang keihsi minnä'-minnä' bomammi' ang masu'li' allinna. Mane natolloi mapia-pia dai' di bää'na Puang Yesus.

8Ingkänna pahsikolana Puang Yesus ungngita yato aka ang dahi. Lambi' sika keaha' anna sika sioa-oaintee, "Akakae' indo kunanna anna ungkaleäng-leängngii yatoo?

9Indo minnä'-minnä'na mala nabalu' masu'li' liu, anna nasusai allinna pano di to pemase-mase."

10Ampo' nainsang Puang Yesus pihki'naii. Naoante pano diii, "Akana ungkambahoringkoa' dio inde bahine? Aka' inde ang nababe mapia liu toe' pano di Kalaeku.

11To pemase-mase nei' dakoa' lengka' la sibaha lolo, ampo' Kodi' daingkea' la sibaha lolo.

12Setonganna inde ang nababe, dianto untollo minnä' bomammi' pano di Kalaeku, bahtuanna napasadiaä' la diku'bu'.

13Kutula'ingkoa' setonganna diamoto ang naongei dipepainsangnging Kaheba Mapianna Puang Alataala yaling di lino indee, ya' dia tuntone' la dipantula'i inde aka ang puha nababe bahine anna dikalehai loloi."

14Pihsananna mesa di alla'na yato sampulo derua pahsikolana Puang Yesus ang disanga Yudas Iskariot le'ba' do umpellambi'i kapala-kapala imang.

15Lambi'na pano mekutanang naoatee, "Aka la unsahoiingkä'a' ke kuduluikoa' unsahka yato Yesus?" Ya' naihsa' siaming tallumpulo doi' pera' anna nabeai.

16Napahandu' siang inde ta Yudas semata umpeäng lalang ang la naonge umbeho Puang Yesus pano diii.

17Tahpana lambi' allo ang uhuna pa'rame-rameang 'Roti Takeragi,' ya' suleng mengngolo pahsikolana Puang Yesus anna mekutanai naoatee, "Umba naongei ongeang ang ungkärä'i ang la taongeia' umpaaha pa'rame-rameang Paska? Tuhoingkang anna maoang kipasadia ang la dipake."

18Mentimba'mi Puang Yesus naoatee, "Laokoa' dai' di dasanna ta Anu yaho di bohto mahoa' anna ungngoaintee: Nasuoang sule Tuangkuhu naoaingkantee, 'Sämpäi'ke' are' anna lambi'mi tempona la mepellei. Dahi dinne are' di dasammu la sihatang naongei umpaaha pa'rame-rameang Paska sibaha-bahaang.'"

19Ya' le'ba' si'dang yato pahsikolana anna nababei aka ang nasuoing Puang Yesus anna umpasadiai ang pahallu sika napake ma'rame-rame.

20Benginna yatoo mohko'mi Puang Yesus sibaha sampulo derua pahsikolana mande.

21Menge sika mande, ya' ma'karang Puang Yesus pano diii naoatee, "Kutula'ingkoa' setonganna aha mesa di alla'mua' ang la mambalu'ä' dako' pano di tau ang la mampateiä'."

22Masuhsa asang liu nasa'ding yato ingkänna pahsikolana unghingngi yato tula'na Puang Yesus. Ya' sika mekutana simesang pano naoatee, "Tadiane' kodi' ne ang ungngoaing, Puang?"

23Natimba'mi naoatee, "Diamoto ang kusibahaing untomme' roti naung inde di piring, dianto yato ang la mambehoä' pano di tau ang la mampateiä'.

24Inang la materä'tee', Kodi' inde Änä' to Lino, situhu' aka ang tiuki' yaling di Suha' Masero, ampo' la tilakane' yato tau ang mambalu'ä'. Malae' ke la danne' dipadahi tama di lino indee yato tau ang noa."

25Mekutana tunne' yato Yudas ang inang la umbeho Puang Yesus pano di tau ang la mampatei naoatee, "Tadiane' ne kodi' ang ungngoaing, Tuang?" Naoante Puang Yesus, "Io, dionto nee, sinnoa ne ang untula'."

26Mengeke' sika mande, ya' ungngalang roti Puang Yesus anna umpalaui behe dai' di Puang Alataala anna umbika-bikai yato dehpa, mane nasusai pano di pahsikolana anna naoaitee, "Alai indee anna ungngandeia', dianto inde bätäng kalaeku."

27Puhai yatoo, ya' ungngala bung enu'ang ang keihsi angkoro' anna umpalaui behe dai' di Puang Alataala, mane nabeai pano diii naoatee, "Enu' asangkoa' inde angkoro'.

28Aka' inde angkoro' dianto hahaku ang napake Puang Alataala umpasundung pa'dandianna. Inde hahaku la titollo anna malai diampungngi dosanna ingkänna tau ang mampetahpa'."

29Ampo' kutula'ingkoa', mengkalao dinoa dämä' aha la ungngenu' sala angkoro'. Diake' kuenu' salai ke sibaha-bahamingkea' ungngenu' angkoro' bakahu yaling di Kapahentaanna Ambeku."

30Puhanna Puang Yesus sibaha pahsikolana umpenanii mesa penaniang pampudiang, ya' sika le'ba'mi bete' di Tanete Zaitun.

31Ma'tula'mi Puang Yesus pano di pahsikolana naoatee, "Bengi dinoa dangnga' la aha kapampetahpa'ammu mai di Kodi', aka' yaling di Suha' Masero aha tiuki' tula'na Puang Alataala ang naoatee, 'Yato to pangkambi' la kupatei, lambi' ingkänna yato domba ang nakambi' la le'ba'i sisähä'-sähä'.'

32Ampo' ponna ke tuhomä' sumule dako', ya' la kupendoluirakoa'tee' lambi' naung di Galilea."

33Mentimba'mi Petrus naoatee, "Moinnakato ingkänna inde mai solaku la pa'da asang kapampetahpa'anna ke ungngitang aka ang la dahi pano di Kalaemu, ampo' inang daeto ko la pa'da kapampetahpa'angku mating."

34Naoaminte Puang Yesus,"Kutula'ingko setonganna bengi dinoa dolunna la mentuhturuu' mane', ya' puhamä' umbahoi pentallung."

35Mentimba'mi Petrus naoatee, "Moinnakato anna la mate touä' kodi' sibahaingke, inang daete' aha lalang la kubahoio." Ingkänna yato pahsikolana ang senga' ma'tula' toe' noa.

36Donetoo, lambi'mi Puang Yesus sibaha pahsikolana bete' di mesa ongeang ang disanga Getsemani. Umpa'karaing pahsikolana naoatee, "Ohko'mokoa' done indee anna maokä' pano dono indoo ma'sambayang."

37Umposolang ta Petrus sibaha derua änä'na ta Zebedeus mao sibaha. Ya' masuhsa liung nasa'ding inde Puang Yesus anna masaha inahanna.

38Ma'karang pano yato di tallu pahsikolana ang nasibahaing naoatee, "Masuhsa si'da-si'da kusa'ding yaling di inahangku, noa kusa'ding ang la mate. Dahi tohhomokoa' done indee anna madakaingkea' sibaha-baha."

39Ya' le'ba'mi sau-sau sai'di' Puang Yesus mane malimuntu'i ma'sambayang. Yaling di sambayanna naoatee, "O Ambeku, ke la malai anna umpakahaoi inde kamadahhaang ang la kuolai. Ampo' tadia pangngelo'ku la dahi, supung pangngelo'mu ang la dahi."

40Puhai ma'sambayang, ya' sumuleng umpellambi'i yato tallu pahsikolana, ampo' sika hahe nalambi'. Ma'karang pano di Petrus naoatee, "Daraka dio untähäng moi poro santehte' madakaingke sibaha?

41Madakakoa' anna pa'sambayangkoa' anna malai tähäng kapampetahpa'ammu ke disändä'i. Kuinsang inang pemalakoa' mepaihang, ampo' dasiang mala aka' inang noa tubunne' sipa'na hupatau malamma."

42Puhai ma'kara, ya' le'ba' bumi ma'sambayang kapendoanna. Naoate yaling di sambayanna, "O Ambe', ponna inang pahallu kuolai inde kamadahhaang anna dai mala umpakahao, ya' pabeing dahi situhu' pangngelo'mu."

43Puhai, sumule bumi umpellambi'i yato tallu pahsikolana. Ampo' yato pahsikolana hahe bou nalambi' aka' situndu liung.

44Napabei tomande'mi sika hahe, anna mao bouine' ma'sambayang kapentallunna. Yaling di sambayanna, noa lolo siang yato ang natula'.

45Puhanna ma'sambayang, sumuleng umpellambi'i pahsikolana anna naoaintee, "Akana mohahe-hahe lolorakoa' dio? Itai, la lambi'mi tempona Kodi', inde Änä' to Lino, dibeho pano di tau ang umpa'bali Puang Alataala.

46Ke'de'mokoa'! Suleng yato tau ang la mambehoä'. Maimokoa' talao tapellambi'i."

47Donetoo, mengeke' ma'kara Puang Yesus, suleng yato ta Yudas sibaha sangkombongang käyyäng tau ang nasuo kapala-kapala imang anna setobaha'ang: aha ang umbaha pa'dang, aha ang umbaha sumämbu. (Inde Yudas mesa di alla'na sampulo derua pahsikolana Puang Yesus.)

48Inang puhang nabea Yudas tanda pano di tau ang nasibahaing naoaintee, "Diamoto tau ang kuurung dako', ya' Dianto ang la unsahkaa'."

49Umpellambi'i siang Puang Yesus inde ta Yudas anna naoaitee, "Sitammu bung tau, Tuang." mane naurungngi.

50Ampo' napa'karai Puang Yesus naoaintee, "O sammuane, babe tomande'i yato ang puha umpahtuyu." Ya' tahpa sika pano siang yato tau mai'di ang nasibahaing la unsahka Puang Yesus anna nasahkai.

51Aha mesa di alla'na pahsikolana ang unsintä' pa'danna mane natepä'ing talinganna mesa sabua'na handang pongkahana imang.

52Ma'karang Puang Yesus pano naoatee, "Patamai sumule di banuanna ne pa'dammu, aka' menna ang si umpopanaka pa'dang la mate toete' nahoa pa'dang.

53Unsangaraka dio dä' la nasuo siaming sule la'bike' anna pitumpulo sa'bu malaeka'na Ambeku naduluiä' ke malau maseä' dai'?

54Ampo' ponna napanoa Ambeku, ya' dante' la sundung aka ang tiuki' yaling di Suha' Masero ang naoatee pahallu la dahi ingkänna indee."

55Donetoo ma'karang Puang Yesus pano yato di tau mai'di naoatee, "To pabokorakakä' indee anna sulekoa' umpesele'ingkä' anna umbaha sumämbu la unsahkaä'? Allo-allo si mampakuhuä' di hipe di Dasang Ada'na Puang Alataala di tingngayomua', ampo' akana dä' unsahka?

56Ampo' ingkänna inde dahi anna malai sundung aka ang puha nauki' ingkänna nabi yaling di Suha' Masero." Pihsananna yato ingkänna pahsikolana le'ba'ing sika lumpa' umpellei Puang Yesus.

57Puhanna sika unsahka Puang Yesus, ya' sika nabahang mengngolo pano di handang pongkahana imang ang disanga Kayafas. Di hao yatoo, inang tihimpummi ingkänna to pampakuhu ada' anna setobaha'ang.

58Yato Petrus mentindo' malamba' nei' di kebo'na Puang Yesus lambi' tama di tahämpä' dasanna handang pongkaha imang anna mohko'i tama di alla'-alla'na yato to pandaka Dasang Ada', aka' pemala naita umba noa katämpä'anna yato panghohto'ang.

59Ingkänna kapala imang anna to Mahkeada' Yahudi umpeäng si'da-si'da lalang anna malai ullambi' mesa tau ang la mala untula' kalosengang didiona aka ang hali nababe Puang Yesus anna malai ditahungkung mate.

60Ampo' daloloke' aha nalambi' sa'bi ang maleso, moinnakato anna mai'ding tau untula' kalosenganna didiona Puang Yesus. Pihsananna ahang derua tau mengngolo pano di to panghohto',

61naoatee, "Inde tau hali ma'tula' naoatee, 'Malaä' Kodi' untalei Dasang Ada' anna kupake'de'i sumule yaling di tallu allona.'"

62Ke'de'mi yato handang pongkahana imang anna mekutanai pano di Puang Yesus naoatee, "Ahanaraka inang dai ungngaku untimba'i inde mai petanda'na tau ang natanda'ingko?"

63Ampo' mahta-mahta supu Puang Yesus. Ma'kara bumi yato handang pongkahana imang pano naoatee, "Yaling di sanganna Puang Alataala ang tuho, tula'ingkang dinoa: Dioraka inde To Dilanti' la Mepasalama', dianto Änä'na Puang Alataala, bahtu' tadiarakako?"

64Mentimba'mi Puang Yesus naoatee, "Noanto ne ang untula'. Ampo' kutula'ingkoa': la aha tempona la ungngitakoa' Kodi' inde Änä' to Lino mohko' yaho di ongeang kakeangka'ang, tando kuananna Puang Alataala ang handang ma'kuasa, anna la suleä' yaho mai di langi' di hahona salehu'."

65Nahingnginna yatoo, keaha' liung yato handang pongkahana imang lambi' unseu'-seu' kaya'na anna naoaitee, "Dante' tau pahallu umpeäng sala to pansa'bii. Aka' unghingngingnga'ne' tula'na: ungngangka' kalaena, pemala sinnoa Puang Alataala!

66Umbaa' dio noa kabohtuammu?" Sika mentimba'mi naoatee, "Pahallu ditahungkung mate!"

67Ya' sika untingkuruing lindona Puang Yesus anna nasidangku'-dangku'ii. Aha toe' piha ang mantampiling.

68Anna sika umpakainu'-inu'i Puang Yesus naoaintee, "Ponna inang To Dilanti' la Mepasalama' si'dao, ya' lähpä'i, anna untula'ingkang menna kahang ang mantampilingngo!"

69Lella' mohko' Petrus di aneang di tähämpä' dasang, ya' suleng mesa sabua' bahine mekutana pano naoatee, "Ponna dä' sala dio inde mesa ang si nasibahaing indo Yesus to Galilea?"

70Ampo' ma'baho Petrus di olona tau mai'di naoatee, "Dai kuinsang aka ne ang ungngoaing."

71Le'ba'mi pano di baba hala anna ke'de'i di hao. Aha bung mesa sabua' bahine ang senga' ungngita Petrus. Ya' ma'karang pano di solana ang nasibahaing naoatee, "Inde tau kuita di langngena' sibaha toe' indo Yesus to Nazaret."

72Ma'baho bumi Petrus naoatee, "Malaä' mopinda ke la kuinsang lelengngi ne tau ang ungngoaing."

73Dai masae, yato sangngaka-sangngaka tau ang sika ke'de' di hao, ullumba Petrus anna naoaintee, "Ahana inang dio inde mesa ang si nasibahaing indo Yesus, tandaang pa'tula'mu sinnoa pa'tula'na to Galilea."

74Ya' napahandu'mi pole' Petrus untändo kalaena anna mopindai naoatee, "Madosaä' ke la kuinsang lelengngi ne tau." Donetoo ya' mentuhturuu' siang mane'.

75Mane pa'kalehai pole' Petrus yato aka ang puha natula'ing Puang Yesus naoaintee, "Dolunna la mentuhturuu' mane', ya' puhamä' umbahoi pentallung." Le'ba'mi inde Petrus tama di aneang anna ma'duseng-dusengngi aka' masuhsa liu nasa'ding.


  Share Facebook  |  Share Twitter

 <<  Matius 26 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran