Alkitab Mobile SABDA
[VER] : [ARALLE]     [PL]  [PB] 
 <<  Markus 1 >> 

1Dianto indee Kaheba Mapia didiona Puang Yesus, To Dilanti' la Mepasalama', Änä'na Puang Alataala.

2Kaheba Mapia indee dipahandu' naonge mampakuhui Yohanes to Pantero' di hao di ongeang makä'däng. Katuhoanna inde Yohanes sinnoa sangngaka-sangngaka nabi ang dolu. Si umpake kaya' ang bulu onta dipapia, anna mesalipi lollo'. Andeanna dianto kakombäng anna duho pangngala'. Didiona inde Yohanes aha tiuki' yaling di Suha' Masero ang natula' Puang Alataala pano di Änä'na, naoatee, "Itai, kusuo mesa tau napendoluio, anna dianto ang la mampatokaingko lalammu." "Aha tau kakoha-koha di hao di ongeang makä'däng, naoatee, 'Patokaingnga' lalang ang la naola Dehata, pamarohoing lalanna.'" Si ma'tula' inde Yohanes naoatee, "Pengkatoba'koa' anna behoi kalaemu ditero' anna malai naampungngi kasalaammu Puang Alataala." Suleing mai'di tau di hao mai di Yudea anna yaho mai di Yerusalem mellambi' pano di Yohanes. Sika ungngakui dosanna dai' di Dehata di olona tau mai'di. Puhai, ya' natero'mi Yohanes di hoi' di Salu Uhai Yordan. Dianto indee ang sika napainsangngi naoatee, "Ke puhang pengkähängangku la aha sule mesa Tau ang ma'kuasa puha nei' andana kodi'. Tandana keangka' yato Tau, moi la mensabua' pälli'ä' di olona datukä' sihatang.

3(1:2)

4(1:2)

5(1:2)

6(1:2)

7(1:2)

8Puhamokoa' kutero' umpakeä' uhai, ampo' la natero'koa' nei' umpake Inaha Masero."

9Donetoo suleng Puang Yesus yaling mai di Bohto Nazaret di Galilea anna natero'i ta Yohanes di lau' di Salu Uhai Yordan.

10Menge kende' Puang Yesus di hoi' mai di uhai, tahpa ungngita langi' tibilläng mane naolai yaho mai Inaha Masero ang sinnoa hupanna dangang-dangang sule yaho di hahona.

11Pihsananna kahingngiammi kamahanna Puang Alataala yaho mai di langi', naoatee, "Dionto ne Änä'ku ang kupakamaya anna ang umpamasannang Inahangku."

12Puhanna yatoo naposolaing Inaha Masero pano di ongeang makä'däng ang malua'.

13Uhpa' pulo allona tohho di lau' Puang Yesus lella' nasändä'i Pongkahana setang di mesa ongeang ang naongei aha olo'-olo' mahaila. Anna nakandapaii malaeka'.

14Naonge puhai ditahungkung ta Yohanes, maong Puang Yesus tama di Galilea, umpepainsangnging Kaheba Mapianna Puang Alataala.

15Naoatee, "La lambi'mi tempona Kalaena Puang Alataala ma'pahenta sihapang tomaraya. Pengkatoba'mokoa' anna umpetahpa'i inde Kaheba Mapia."

16Pihsang tempo menge mellao di behing Le'bo' Galilea, inde Puang Yesus ungngita derua tau to sipoari ang disanga ta Simon anna ta Andreas. Menge sika modala yaling di le'bo' aka' inang to podala bau.

17Naoamintee, "Maikoa' tindo'ä' anna kupadahikoa' to podala tau, dianto la umpakuhukoa' hupatau ang la napanoa untindo' Kapahentaanna Puang Alataala."

18Ya' tahpa sika umpellei siang dalana anna mentindo'i.

19Umpatahhi' bung sai'di' pellaoanna Puang Yesus, ya' ungngita burang derua to podala ang sipoari, dianto änä'na ta Zebedeus ang disanga ta Yakobus anna ta Yohanes. Lella' sika umpapia dalana yaling di lopi.

20Nabahaing mendahi pahsikolana. Ya' tahpa sika umpellei siang ambena sibaha sahoanna yaho di lopi anna mentindo'i.

21Puang Yesus sibaha to pentindo'na lambi' pano di mesa bohto mahoa' disanga Kapernaum. Pihsananna lambi'mi allo katohhoang, tahpa sika tamang di pa'sambayangang anna mampakuhui yaling inde Puang Yesus.

22Sika pusa'mi yato ingkänna tau unghingngi umba noa pepakuhunna, aka' mampakuhu sinnoa ang ma'kuasa si'da-si'da, dai sinnoa to pampakuhu ada'na to Yahudi.

23Donetoo yaling di pa'sambayangang aha mesa tau ang napentamai setang. Pihsa' mekoha, naoatee,

24"Eh, Dio ne Puang Yesus to Nazaret, aka suhunna anna ullumbaang? Suleo la unghopuiang? Kuinsang mennao setonganna: Dionto to Masero, pesuona Puang Alataala."

25Nakarahta'mi Puang Yesus naoatee, "Mahtangngo! Anna palaio mai done ne di tau!"

26Menge kaingngi'-ingngi', yato setang unghoro-horo yato tau, mane sohongngi yaling mai di kalaena.

27Anna ingkänna tau pusa' si'da-si'da anna situla'-tula'i naoatee, "Ahana inang bakahu inde pepakuhunna! Aka' sitonda kakuasaang umpahenta setang lambi' tuhu'-tuhu'ang."

28Pihsananna tisembu'mi madihhi' kaheba didiona Puang Yesus pano di ingkänna bohto di Galilea.

29Puang Yesus anna sangngaka-sangngaka to pentindo'na luhao mai di pa'sambayangang, lupano di dasanna ta Simon anna ta Andreas. Ta Yakobus anna ta Yohanes mao toe' sibaha-baha.

30Pasananna ta Simon matindo aka' maluhsu lambi' malla'. Ya' tahpa sika natula'ming yato Puang Yesus, naoaintee, "Makorong maho pasananna ta Simon."

31Ya' le'ba'mi nalumba tama di patindoanna inde bahine anna natokeii teyyena, napakaleha. Ya' malang mohko' anna tahpa bono' siang donetoo. Inde bahine tahpa le'ba' anna umposahai yatoii.

32Tahpana tempu' allo, ya' suleng mai'di tau umbaha to makorong anna ang napentamai setang.

33Mai'di tau yato ang di hao di bohto mahoa' sule mokalipumpung pano di olona dasang.

34Ya' mai'ding tau napabono' Puang Yesus yaling mai di ma'kahupa-hupa korong anna unghambai toine' yato ingkänna setang ang umpentamai tau. Ampo' dai napabei yato setang la ma'kara-kara, aka' sika nainsang siang menna yatoo anna sule umba kakuasaanna.

35Mebuhka' baya kaleha Puang Yesus anna le'ba'i tama di aneang lupano di ongeang mahulla-hulla anna ma'sambayangngi.

36Ampo' napelolai ta Simon sibaha sola-solana.

37Nalambi'na yatoo sika naoamintee, "Mai'di tau mampeängngo."

38Natimba'mi naoatee, "Maio talao pano di bohto-bohto mahoa' ang marungku' anna malaä' umpepainsangnging Kaheba Mapia aka' inang dia ang kutuäng sule."

39Ya' le'ba'mi Puang Yesus ullelengngi bohto-bohto Galilea umpepainsangnging Kaheba Mapia tama di pa'sambayangang anna unghambai toine' mai'di setang.

40Aha pihsang tempo mesa tau nahoa mesa korong tahuhu, diantoo bosi lollo'na. Sule malimuntu' di tingngayona Puang Yesus anna naoaitee, "O Puang, ponna ungngaku umpabono'ä', ya' la bono' siamä'te' dinoa."

41Ya' nakalemuing Puang Yesus, lambi' ungngehte' siang teyyena naanti anna naoaintee, "Kuaku kupabono'o, dinoa la bono'motee'!"

42Donetoo bono' siang yato tau.

43Ya', tahpa nasuong le'ba' ampo' naoaintee,

44"Kalehaii daa umpepainsangnging pano di tau senga' inde aka ang dahi pano di kalaemu, ampo' laomo dinoa do pepaitaing kalaemu pano di imang anna malai nainsang naoatee bono' si'damo. Anna umbahai penombaang ang la napenombaingko dai' di Puang Alataala situhu' aka ang puha mepahentaing Musa, ang la mendahi sa'bi kabono'ammu pano di ingkänna tau."

45Ampo' indee tau menge mellao, menge siang untohodoluing tau yatoo kabono'anna. Lambi' Puang Yesus dang mala satamanna di bohto mahoa'. Tohho supu di aneanna bohto, ongeang mahulla-hulla. Ampo' moi napanoa, laona siang sulei tau napellambi'i luhao mai di ma'kahupa-hupa bohto.


  Share Facebook  |  Share Twitter

 <<  Markus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel