Alkitab Mobile SABDA
[VER] : [ARALLE]     [PL]  [PB] 
 <<  Markus 14 >> 

1Dongngalloke' mane temponai pa'rame-rameang Paskana to Yahudi anna pa'rame-rameang Ungngande Roti ang Dai Keragi. Kapala-kapala imang anna to pampakuhu ada' menge umpeäng lalang ang situhu' pihki' karakenaii, umba la napanoa unsahka Puang Yesus anna malai ditahungkung mate.

2Ampo' sika naoatee, "Dai mala disahka di tempona pa'rame-rameang aka' umbai la umpasiba'di-ba'di tau mai'di."

3Donetoo Puang Yesus di hoi' di Betania di dasanna ta Simon ang puha bosi lollo'na. Lella' mande suleng mesa bahine umbaha mesa buli-buli maleke ang keihsi minnä'-minnä' bomammi' ang masu'li' allinna. Mane natolloi mapia-pia dai' di bää'na Puang Yesus.

4Aha sangngaka tau keaha' sipa'kara-kara, naoatee, "Akakae' indo kunanna anna ungkaleäng-leängngii yato minnä'?

5Aka' ke la nabalu'itoo umbai la sahtaung nasaho mesa tau allinna! Anna noa toi ke dibalu'i, ya' inde allinna mala disusaing pano di to pemase-mase." Mane sika ungkeaha'i yato bahine.

6Ampo' ma'kara Puang Yesus, naoatee, "Akana unsuhsairakoa' dio inde bahine? Aka' inde ang nababe mapia liu toe' pano di Kalaeku.

7To pemase-mase nei' dakoa' lengka' la sibaha lolo, lambi' mala ungkalemui ke ungngakuia', ampo' Kodi' daingkea' la sibaha lolo.

8Inde bahine umbabe aka ang la mala napapia. Dianto untollo lohpo' minnä' bomammi' pano di Kalaeku, bahtuanna napasadiaä' la diku'bu'.

9Kutula'ingkoa' setonganna diamoto ang naongei dipepainsangnging Kaheba Mapianna Puang Alataala yaling di lino indee, ya' dia tuntone' la dipantula'i inde aka ang puha nababe bahine anna dikalehai loloi."

10Pihsananna le'ba'mi ta Yudas Iskariot, mesa tunne' pahsikolana ang sampulo derua, pano di kapala-kapala imang, pahtuyunna la umbulitu' Puang Yesus.

11Tahpana sika nahingngi pahtuyunna, sika kahsi liung lambi' ma'dandi la nabea doi'. Napahandu' siang inde ta Yudas semata umpeäng lalang ang la naonge umbeho Puang Yesus pano diii.

12Lambi'mi allo pampahandu'anna pa'rame-rameang 'Roti Takeragi.' Donetoo tau si untunu änä' domba, aka' la umpakahoa' Paska. Ya' mekutanang pahsikolana pano di Puang Yesus, naoatee, "Umba naongei ongeang ang ungkärä'i ang la taongeia' umpaaha pa'rame-rameang Paska? Tuhoingkang anna maoang kipasadia ang la dipake."

13Unsuong derua pahsikolana anna napasangngi naoaintee, "Laomokoa' dai' di Yerusalem. Yaho la sitammukoa' mesa muane sule tumimba. Tindo'i yato tau lambi' tama di dasang ang la napentamai,

14anna ungngoaintee yato puäng dasang, 'Nakutanaio Tuangkuhu didiona umba are' ongeang ang la naonge ungngande andeang pa'rame-rameang Paska sibaha pahsikolana.'

15Yato puäng dasang la natuhoingkoa' mesa tambing malua' yaho di loteng ang toka asammi yaho ingkänna pangkahka' ang la dipahallu. Diangnga'to ang la ungngonge umpatoka ang la taandea'."

16Le'ba'mi yato to deruai dai'. Tahpana yaho, nalambi' si'dang yato aka ang puha naoaing Puang Yesus. Ya' sika napasadiang ang sika napahallu ma'rame-rame.

17Benginna yatoo, dai'mi inde Puang Yesus sibaha yato sampulo derua pahsikolana.

18Tahpana sika lella' mande, ma'karang Puang Yesus, naoatee, "Kutula'ingkoa' setonganna aha mesa di alla'mua', ang lella' mande sibahaingke, ang la mambalu'ä' dako' pano di tau ang la mampateiä'."

19Sika nahingnginna yatoo, sika mapi'di' liung inahanna lambi' mekutana simesa-mesang naoatee, "Tadiane' kodi' ne ang ungngoaing?"

20Natimba'mi Puang Yesus naoatee, "Inang ahanna mesa di ingkämmua' ang tapansolaiingnga' untomme' roti naung inde di piring.

21Inang la materä'tee', Kodi' inde Änä' to Lino, situhu' aka ang tiuki' yaling di Suha' Masero, ampo' la tilakane' yato tau ang mambalu'ä'. Malae' ke la danne' dipadahi tama di lino indee yato tau ang noa."

22Mengeke' sika mande, ya' ungngalang roti Puang Yesus anna umpalaui behe dai' di Puang Alataala anna umbika-bikai yato roti, mane nasusai pano di pahsikolana anna naoaitee, "Alai indee, dianto inde bätäng kalaeku."

23Puhai yatoo, ya' ungngala bung enu'ang ang keihsi angkoro' anna umpalaui behe dai' di Puang Alataala, mane nabeai pano diii, naenu' nasibala'-bala'i.

24Ma'karang Puang Yesus, naoatee, "Inde angkoro' dianto hahaku ang napake Puang Alataala umpasundung pa'dandianna. Inde hahaku la titollo unsulängngi ingkänna tau ang mampetahpa'.

25Kutula'ingkoa' setonganna dang aha la kuenu' sala angkoro'. Diake' kuenu' salai ke ungngenu'ä' angkoro' bakahu yaling di Kapahentaanna Puang Alataala."

26Puhanna Puang Yesus sibaha pahsikolana umpenanii mesa penaniang pampudiang, ya' sika le'ba'mi bete' di Tanete Zaitun.

27Ma'tula'mi Puang Yesus pano di pahsikolana naoatee, "Dangnga' la aha kapampetahpa'ammu, aka' yaling di Suha' Masero aha tiuki' tula'na Puang Alataala ang naoatee, 'Yato to pangkambi' la kupatei, lambi' ingkänna yato domba ang nakambi' la le'ba'i sisähä'-sähä'.'

28Ampo' ponna ke tuhomä' sumule dako', ya' la kupendoluirakoa'tee' lambi' naung di Galilea."

29Mentimba'mi Petrus naoatee, "Moinnakato ingkänna inde mai solaku la pa'da asang kapampetahpa'anna, ampo' inang daeto ko la pa'da kapampetahpa'angku mating."

30Naoaminte Puang Yesus, "Kutula'ingko setonganna bengi dinoa dolunna mane' mentuhturuu' kapendoanna, inang puhamä' umbahoi pentallung."

31Mentimba'mi Petrus naoatee, "Moinnakato anna la mate touä' kodi' sibahaingke, inang daete' aha lalang la kubahoio." Ingkänna yato pahsikolana ang senga' ma'tula' toe' noa.

32Lambi'mi Puang Yesus sibaha pahsikolana bete' di mesa ongeang ang disanga Getsemani. Ya' ma'karang Puang Yesus pano diii naoatee, "Ohko'mokoa' done indee aka' la ma'sambayangkä'."

33Umposolang Petrus, Yakobus anna Yohanes mao sibaha. Ya' unsa'dimmi kamasuhsaang inde Puang Yesus anna datung hapa' inahanna.

34Ungngoaminte yatoii, "Masuhsa liu inahangku dinoa, sinnoa yato ang la mate kusa'ding. Tohhomokoa' dinne anna madakakoa'."

35Ya' le'ba'mi sau-sau sai'di' Puang Yesus, mane mengkuntu'i ma'sambayang. Yaling di sambayanna napalau ke malai dai naolai yato kamadahhaang,

36naoatee, "O Ambe', Ambeku, dai aha mesa ang tala mala umpadahi. Ke la malai anna umpakahaoingkä' inde kamadahhaang di hao mai di Kalaeku; ampo' tadia pangngelo'ku la dahi, supung pangngelo'mu ang la dahi."

37Puhanna yatoo, sumuleng Puang Yesus umpellambi'i yato tallu pahsikolana ang lella' hahe. Ma'karang pano di Simon Petrus, naoatee, "Haherakako nee Simon? Daraka dio untähäng moi poro santehte' madaka?

38Madakakoa' anna pa'sambayangkoa' anna malai tähäng kapampetahpa'ammu ke disändä'i. Kuinsang inang pemalakoa' mepaihang, ampo' dasiang mala aka' inang noa tubunne' sipa'na hupatau malamma."

39Le'ba' bumi do ma'sambayang inde Puang Yesus umpalau bou yato ang puha nasambayangngi langngena'.

40Puhai, sumule bumi umpellambi'i yato tallu pahsikolana. Ampo' yato pahsikolana hahe bou nalambi' aka' situndu liung. Lambi' dai sika nainsang aka la naoa pano di Puang Yesus.

41Puhanna ma'sambayang kapentallunna, sumule bumi anna ma'kara boi, naoatee, "Akana mohahe-hahe lolorakoa' dio? Itai, la lambi'mi tempona Kodi', inde Änä' to Lino, la dibeho pano di tau ang umpa'bali Puang Alataala.

42Ke'de'mokoa'! Suleng yato tau ang la mambehoä'. Maimokoa' talao tapellambi'i."

43Donetoo, mengeke' ma'kara Puang Yesus, suleng yato ta Yudas sibaha sangkombongang käyyäng tau ang nasuo kapala-kapala imang, to pampakuhu ada' anna setobaha'ang: aha ang umbaha pa'dang, aha ang umbaha sumämbu. (Inde Yudas mesa di alla'na sampulo derua pahsikolana Puang Yesus.)

44Yato ta Yudas inang puhang umbea tanda pano di tau ang nasibahaing naoaintee, "Diamoto tau ang kuurung dako', ya' dianto ang la unsahkaa'!"

45Umpellambi'i siang Puang Yesus inde ta Yudas anna naoaitee, "O Tuang!" mane naurungngi.

46Ya' tahpa sika pano siang yato tau mai'di ang nasibahaing unsahka Puang Yesus anna nasahkai.

47Aha mesa di alla'na pahsikolana ang unsintä' pa'danna, mane natepä'ing talinganna mesa sabua'na handang pongkahana imang.

48Ma'karang Puang Yesus, naoatee, "To pabokorakakä' indee anna sulekoa' umpesele'ingkä' anna umbaha sumämbu la unsahkaä'?

49Allo-allo si mampakuhuä' di hipe di Dasang Ada'na Puang Alataala di tingngayomua', ampo' akana dä' unsahka? Ampo' inang la noaete' anna malai situhu' aka ang diuki' yaling di Suha' Masero."

50Ingkänna yato to pentindo'na sika lumpa' umpellei Puang Yesus.

51Donetoo aha mesa änä' muane ang mekundai supu handu' umpentindo'i Puang Yesus. Pemala la sika nasahka yato tau, ampo' supung mala nahondongngi handu'na,

52lambi' le'ba' ma'lumpa'-lumpa' mohobeläng.

53Puang Yesus dibaha bete' di dasanna handang pongkahana imang. Di hipe aha ingkänna kapala-kapala imang, to pampakuhu ada' anna setobaha'ang tihimpung.

54Yato Petrus mentindo' malamba' di kebo'na Puang Yesus lambi' mentama di tähämpä' dasanna handang pongkahana imang. Mohko'mi yaling sibaha to pandaka dasang mamindu di behing api.

55Ingkänna kapala imang anna to Mahkeada' Yahudi umpeäng si'da-si'da lalang anna malai ullambi' mesa tau ang la mala untula' didiona aka ang hali nababe Puang Yesus anna malai ditahungkung mate. Ampo' dasiang mala nalambi' sa'bi ang maleso;

56ingkänna ang nalambi' dai sinnoa-noa pansa'biinna.

57Aha sangngaka to pansa'bii ang mangngoatee,

58"Puha kihingngi inde tau ma'kara la untalei are' Dasang Ada'na Puang Alataala ang napapia hupatau, mane la napake'de' salai are' ang tadia pambabena hupatau yaling di tallu allona."

59Ampo' moi indee pansa'biinna dinoa sisala-sala tula' toi.

60Ke'de'mi yato handang pongkahana imang di olona to Mahkeada' anna ma'karai pano di Puang Yesus naoatee, "Ahanaraka inang dai ungngaku untimba'i inde mai petanda'na tau ang natanda'ingko?"

61Ampo' mahta-mahta supu Puang Yesus; dai aha natimba'i. Mekutana sala bumi yato handang pongkahana imang, naoatee, "Diongka ne To Dilanti' la Mepasalama', dianto Änä'na Puang Alataala?"

62Natimba'mi Puang Yesus, naoatee, "Io, Kodi'mito indee. Ampo' kutula'ingkoa': la aha tempona la ungngitakoa' Kodi' inde Änä' to Lino mohko' yaho di ongeang kakeangka'ang, tando kuananna Puang Alataala ang handang ma'kuasa, anna la suleä' yaho mai di langi' di hahona salehu'."

63Nahingnginna yatoo keaha' liung yato handang pongkahana imang lambi' unseu'-seu' kaya'na anna naoaitee, "Dante' tau pahallu umpeäng sala to pansa'bii.

64Aka' unghingngingnga'ne' tula'na: ungngangka' kalaena, pemala sinnoa Puang Alataala! Umbaa' dio noa kabohtuammu?" Sika kohang, naoatee, "Tapateiia'!"

65Natingkurui siang anna nasampungngi matanna, mane nadangku'i sibaha naoatee, "Lähpä'ii: menna ang mandangku'o?" Pano tunne' yato to pandaka padangku'.

66Yalingke' Puang Yesus di To Mahkeada'. Donetoo inde Petrus yalingke' di tähämpä'. Suleng mesa änä' bahine, sabua'na handang pongkahana imang.

67Ungngitang ta Petrus mamindu, napamapekaleso lindona anna naoaintee, "Darakae' dio tung dio nee ang si nasibahaing Yesus to Nazaret?"

68Ampo' nabahoi, naoatee, "Daeto ko kuinsang aka ne ang ungngoaing." Mane mendendei pano di baba hala. [Donetoo mentuhturuu'mi mane'.]

69Ungngita sala bumi Petrus yato bahine, ma'karang pano di tau senga' ang sidungku' baba, naoatee, "Inang diante' indee mesa solana yatoii!"

70Naoate, "Kodi'? Akana la ahae'?" Dai masae sika ma'karang yatoii pano di Petrus, naoatee, "Damong umpa'baho. Inang dionnang mesa, aka' to Galileao!"

71Naoantee, "Naitaä' ko Dehata, ke la kodi'i! Dai ne kuinsang tau ang ungngoaingnga'!"

72Tahpa mentuhturuu' bumi mane' kapendoanna. Ya' nakalehaing Petrus yato ang puha naoaing Puang Yesus, naoatee, "Dolunna la mentuhturuu' mane' kapendoanna, la umbahoiä' pentallung." Musemmi Petrus kasungngu'-sungngu'.


  Share Facebook  |  Share Twitter

 <<  Markus 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran