Dual Panel1Puhanna yato allo katohhoang, ungngalling minnä'-minnä' inde derua bahine sibaha ta Salome ang la naminnä'ing bahkena Puang Yesus pano di ku'bu'na.
2Mebengngi'-bengngi' naonge le'ba' pano.
3Tahpana yato di tängngä lalang situla'-tula'mi naoatee, "Menna ang la mala manduluiingkea' ungkisu' indo pelapa'na baba ku'bu'? Aka' käyyäng liu." Ampo' lambi'na pano sika ungngitang yato batu pelapa' ku'bu' puha dikisu' lambi' titungka'mi.
4(16:3)
5Sika mentamang yato di ku'bu', tahpa ungngita mesa to mahäti' ang mekaya' kalambe' mabusa mohko' di tando kuanang. Sika tingke'du'mi mahea'.
6Ampo' ma'kara yato tau, naoatee, "Daummahea'a' aka' kuinsang sulekoa' umpeäng Puang Yesus, to Nazaret ang hali ditoke'. Ampo' dang aha dinne. Tuhong sumule. Itake' dianto inde ang dipampaongei.
7Dahi dinoa sumulemokoa', painsangngiia' pano di ingkänna pahsikolana londo-londona Petrus. Oaintee: Napendoluimokoa' are' naung di Galilea, ne. Di hoi'ke' mane ungngitaia' sinnoa yato ang puha naoaingkoa'."
8Sika sohommi yaling mai yato di ku'bu', mane le'ba'i sika lumpa' aka' sikadindi' mahea'. Daliu sika nasaha napepainsangnging, tandana mahea'.
9[Tahpana tuho sumule Puang Yesus yato di mebengngi', uhu-uhuna umpepaitaing Kalaena pano di ta Maria Magdalena, (ang dolu puha nahambaiing pitu setang yaling mai di kalaena).
10Puhanna naita, le'ba'mi inde bahine napepainsangnging pano di ingkänna ang si biasa naposola Puang Yesus. Donetoo lella' kamasuhsaang.
11Tahpana nahingngi kahebana tuho sumule ang naita ta Maria, dai sika napetahpa'.
12Puhai yatoo, umpepaita buming Kalaena pano di derua to pentindo'na umpake ang la dai mala tahpa nainsang, naonge lella'i mellao pano di bohto senga'.
13Puhanna naita, sika sumuleng inde to deruai anna do umpainsangngii yato solana ang senga'. Ampo' datoine' napetahpa' yato solana.
14Katämpä'anna umpepaitaing Kalaena pano yato di sampulo mesa pahsikolana naonge lella'i mande. Nakambahoming Puang Yesus aka' dai sika umpetahpa' tula'na yato tau ang hali mangngita.
15Sika naoaminte Puang Yesus, "Laomokoa' lelengngi lino, anna umpopepainsangnging Kaheba Mapianna Puang Alataala pano di ingkänna hupatau.
16Menna-menna ang mampetahpa' anna umpebeaing kalaena la ditero' la salama'; ampo' menna ang dai mampetahpa' la ditahungkung nei'.
17Dianto inde tandana tau ang mampetahpa'. Sika la ullaba'i mai'di setang yaling di sangangku; sika la ma'tula' umpake basa ang dai aha sika napellaya'i;
18moi untokei ile bahtu' ungngenu' hasung datoi la sika maaka; ponna unsahpa to makorong la bono'."
19Puhanna yato sika napa'karai Puang Yesus, tahpa tiängkä' siang dai' di suruka anna mohko'i yaho di tando kuananna Puang Alataala, dianto ongeang kakeangka'ang.
20Sika le'ba'i siang inde pahsikolana umpepainsangnging Kaheba Mapia di umba-umba naongei. Tontong naposolai Inaha Maserona Puang Alataala yaling di pengkähänganna si umpake tanda ang mepusa'-pusa' anna malai nainsang to pa'pehingngi naoate, "Tahpa' si'da ang natula'."]