Alkitab Mobile SABDA
[VER] : [ARALLE]     [PL]  [PB] 
 <<  Markus 3 >> 

1Yato Puang Yesus tama bung di pa'sambayangang. Ullambi'mi mesa tau di hao ang mate sambali teyyena.

2Aha toe' di hao to Farisi ang inang pemala la umpeäng kasalaanna Puang Yesus. Lella' sika umpoimata Puang Yesus ke la umpabono'i tau doneto di allo katohhoang, aka' ponna nababe noa, ya' aha sika napolalang nasalla.

3Naoate Puang Yesus pano yato di tau ang mate sambali teyyena, "Maio done di olo ke'de'!"

4Mane ungkutanaii yato ingkänna tau ang di hao, naoatee, "Situhu' ada'ta, aka ang mala la dibabe di allo katohhoang: kamapiaandaka, kakarakeandaka; ungkalemuiraka tau sola, la dipateiraka?" Ampo' sika mahtang supu aka' dai aha pa'kalemunna.

5Keaha' liung Puang Yesus, mapi'di' inahanna ungngita dai aha pa'kalemunna inde mai tau. Naoante pano yato di to makorong, "Tandoingkä' teyyemu!" Napentando si'daming teyyena. Ya' bono' siang donetoo.

6Sika le'ba' siang yato sangngaka-sangngaka to Farisi, umpellei pa'sambayangang anna sipahtuyu-tuyui yato to pentindo'na Tomaraya Herodes pemala la sika umpatei Puang Yesus.

7Puang Yesus sibaha to pentindo'na sika lunaung di Le'bo' Galilea. Ya' mai'di liung to Galilea umpentindo'i Puang Yesus. Anna mai'di toe' tau luyaho mai di Yudea,

8luyaho mai di Yerusalem, luhao mai di Idumea, luhipe mai di Yordan anna luhao mai di Tirus anna Sidon sika sulei ullumba Puang Yesus aka' sika napelele aka ang puha nababe.

9Yatoo tau mai'di liu, lambi' Puang Yesus unsuo to pentindo'na ungngala mesa lopi ang la naongei ke sihpi' mahong ongeanna.

10Mai'di liung tau puha nabono'i, lambi' sibuhsu'-buhsu' kaleng yato ingkänna to makorong aka' pemala mendungku' anna naantii.

11Anna tau ang napentamai setang ungngita boito Puang Yesus, suyu' bumi anna mekohai naoatee, "Äi, Dio liunto ne Änä'na Puang Alataala!"

12Ampo' dai napabei Puang Yesus napepainsangnging yato setang didiona menna si'da setonganna Kalaena Puang Yesus.

13Pihsananna dai'mi Puang Yesus di mesa tanete anna untambaii hupatau ang nakärä'i mendahi to pentindo'na. Sika suleing yatoo,

14mane napillei sampulo derua tau, ang la napadahi rasul, naoaintee, "Kupilleikoa' anna malai umposolaiä' la umpalele sau tama Kaheba Mapia sibaha la unghambai setang."

15(3:14)

16Dianto inde sanga-sanganna yato to dipillei: ta Simon, ang nasangai Puang Yesus: Petrus;

17ta Yakobus anna ta Yohanes ang sipoari, dianto änä'na Zebedeus, (nasangai Puang Yesus: Boanerges, bahtuanna: sinnoa kundäng);

18ta Andreas, ta Filipus, ta Bartolomeus, ta Matius, ta Tomas; ta Yakobus, änä'na Alfeus; ta Tadeus; ta Simon, (ang disanga: Zelot, bahtuanna: tau ang si umpabali to ma'pahenta);

19anna Yudas Iskariot ang umbalu' Puang Yesus.

20Pihsananna Puang Yesus sibaha pahsikolana mentama di mesa dasang. Dai sika hali mande aka' mai'di sule tau tihimpung. Aha tau mangngoatee, "Umbai tahta'mi aka' dai si naaku mande."

21Nahingnginna inde solasohonna Puang Yesus, yaho siang mai di bohtona la naala.

22Donetoo sule tunne' sangngaka-sangngaka to pampakuhu ada' yaho mai di Yerusalem ma'kara naoatee, "Napentamai Beelzebul, dianto anna malai ullaba'i setang, aka' Beelzebul, dianto Pongkahana setang, ang mambea kakuasaang."

23Natimba'mi yaling di pepakuhunna umpake pohapangang naoatee, "Mesa tau ang napentamai Pongkahana setang inang dai mala la unghambai pesuona Pongkahana setang ang umpentamai tau senga'.

24Hapanganna ke ahai mesa kapahentaang ang dai mesa inaha, inang dai la mala masae kamesaanna, ampo' la maromi' sisähä'-sähä'.

25Anna noa tunne' ke ahai to sanghapu ang dai mesa inaha, inang dai la tuho masannang, ampo' la madihhi' sisähä'-sähä'.

26Dahi ponna ke ahai Pongkahana setang ullaba'i solana, inang dai aha ang la mampentindo'i.

27Ampo' malake' dilaba'i setang ke ma'kuasa puha nei' tau. Hapanganna: dai aha mesa tau la mala mentama di dasanna to matoho, ang dipasihapang Pongkahana setang, anna mabokoi yaling ke dai matoho puha nei' unsangke' dolu yato to matoho, mane napabokoii."

28Katämpä'ang tula'na Puang Yesus naoatee, "Kutula'ingkoa' setonganna ingkänna kasalaang ang nababe hupatau, moi petändo tahuhu, mala diampungngi.

29Ampo' ponna mesa tau ma'tula' tahuhu umpa'bali Inaha Masero, tau yatoo dante' mala la diampungngi lambi' sapano-panona."

30(Inde natula' Puang Yesus aka' aha ang mangngoaintee, "Napentamai setang.")

31Puhanna yatoo, suleng indona anna ullu'na Puang Yesus. Sika naempeing yaling di aneang anna unsuoi tau nabahaiing.

32Donetoo mai'di tau mohko' mangkulilingngi. Naoamintee, "O Tuang, napeängngo indomu sibaha ullu'mu yaling di aneang."

33Natimba'mi naoatee, "Mennaraka Ko setonganna indoku anna ullu'ku?"

34Mane nanenne'i yato ingkänna tau ang mohko' di behinna anna ma'karai naoatee, "Diante' inde mai indoku anna ullu'ku,

35aka' ingkänna ang umpembabeing pangngelo'na Puang Alataala, dianto ullu'ku ang si'danna."


  Share Facebook  |  Share Twitter

 <<  Markus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran