Alkitab Mobile SABDA
[VER] : [ARALLE]     [PL]  [PB] 
 <<  Markus 4 >> 

1Donetoo mampakuhu bumi Puang Yesus di hao di behing Le'bo' Galilea. Suleng tau mai'di anna naleboi lambi' mendai' Puang Yesus di mesa lopi ang tohho sirungku' kalantanang anna mohko'i yaho. Yatone' tau mai'di sika ke'de' nei' di hipe di behing uhai.

2Mane mampakuhui Puang Yesus umpake ma'kahupa-hupa pepaturu umpake pohapangang, naoatee,

3"Pehingngiia'! Pihsang tempo aha mesa petani la mao mangngambo'.

4Menge ungngambo' yato bannena, aha piha ang manaho pano di lalang. Ya' sule siang sedansiang naandei lambi' puha.

5Aha toe' piha ang manaho naung di tampo di haho batu. Ya' tuhong yato banne. Ampo' aka' manipi' yato tampo ang naongei tuho,

6ya' tahpana naalloi, ya' laonang malahso, anna mabangii lambi' mate aka' dai manaung uhaka'na.

7Yato banne aha toe' piha ang manaho tama di alla' lohpo ang kedui. Inde lohpo kedui tuhtuang mahombo lambi' ungkapupu' yato ang tuhong, lambi' dai mala keboa.

8Ampo' aha toe' piha banne ang manaho naung di tampo malambu. Tuho manahpa nei' lambi' keboa. Boana yatoo aha pentallumpulo luhpi', aha pengngunnumpulo luhpi', aha pensangngatu' luhpi'."

9Puhanna yato mopohapangang, naoantee, "Menna pemala mangnginsang, pamapehingngiingnga'too!"

10Tahpana namesa Puang Yesus, suleng pahsikolana sibaha to pentindo'na ang senga' mekutana didiona pohapangang indee.

11Natimba'mi naoatee, "Pano di dioa' dibeakoa' dio kapainsangang la ungnginsang umba noa Kapahentaanna Puang Alataala ang masaeng tibuni, ampo' pano di to tama'pehingngi dipalambi'ing yaling di pohapangang

12anna: 'Moi sika naita, dasiang nakaleso; moi sika nahingngi, datoi napebahtuang. Dianto anna dai mengkatoba' lambi' dai naampungngi Puang Alataala.'"

13Ma'kara sala bumi Puang Yesus, naoatee, "Darakato dio ungnginsang bahtuanna pohapangang indee? Aka' ponna noa, ya' umbang dio la umpanoa ungnginsang pohapangang senga'?

14To pangngambo' yatoo sinnoa to pambaha Kaheba Mapia.

15Yato lalang ang naongei manaho banne, sinnoantoo hupatau ang unghingngi kaheba didiona umba napanoa ma'pahenta Puang Alataala. Nahingnginna yatoo, suleng setang nabulitu' pihki'na lambi' dang nakalehai aka ang puha natahimbo yaho mai di Puang Alataala.

16Noa tunne' yato tampo manipi', ang naongei manaho banne, sinnoa hupatau ang ungnghingngi yato Kaheba Mapia anna tahpa napatamang di inahanna sitonda kakahsiang.

17Ampo' yato Kaheba Mapia ang nahingngi dai mengnguhaka' yaling di inahanna lambi' dai mala masae tohho yaling. Aka' mane ungngolai sanghupa kamasuhsaang bahtu' kamadahhaang aka' yato Kaheba Mapia, ya' darang natähäng anna ungkebo'i Puang Alataala.

18Noa tunne' yato alla' lohpo ang kedui, sihapanne' tau ang unghingngi Kaheba Mapia,

19ampo' semata umpihki' supu katuhoanna anna pemala mendahi to makaka ang untombong kullena. Lambi' yato Kaheba Mapia ang puha nahingngi tihimpi' yaling di inahanna lambi' dai mala memboa mapia.

20Pihsananna nei' yatoo tampo ang malompo sinnoa hupatau ang umpehingngii yato Kaheba Mapia anna natahimbo manahpai, lambi' tuhtuang mai'di pembabe mapianna. Aha ang pentallumpulo luhpi', aha ang pengngunnumpulo luhpi', aha ang pensangngatu' luhpi'."

21Napatahhi' bung Puang Yesus ma'kara pano di to pentindo'na, naoatee, "Aharaka tau ang si umpau' lampu mane nasalohko'i baki, bahtu' napatoko di hoi' langka'na? Darakate' napatoko yaho di ongeang ang malängkä'?

22Daete' aha mesa kaha-kaha ang tibuni la tibuni lolo, sinnoanna: ingkänna ang tadipetula'ing dinoa, la kainsangang siang ke dako'mi.

23Dahi menna pemala mangnginsang, pamapehingngiingnga'too!"

24Pamapekalesoi ingkänna ang unghingngi; lite' ang umpake pano di solamu dia tuntone' la dipakeingko anna malake' dihängngängngi.

25Aka' menna ang inang ahang ang nainsang, inang la dihängngängngiking, ampo' menna ang dai ma'pehingngi, ingkänna yato ang nainsang la dialai yaling mai di pihki'na."

26Ma'tula' bung Puang Yesus pano di tau mai'di naoatee, "Noanto indee Kapahentaanna Puang Alataala: sihapang mesa popinamulaang ang napamula tau naung di tampo.

27Moi hahe ke bengii anna kaleha ke di alloi, tontong tuhtuang lobo' yato ang napamula. Dai nasa'ding yato tau anna dai nainsang umba noa katuhoanna, ampo' lobo' tomande'.

28Pihsananna mentangke, lambi' keboa, mane mahei. Ya' dipupung aka' lambi'mi tempona."

29(4:28)

30Nalombungngike' pepakuhunna Puang Yesus, naoatee, "Akake' la dipasinnoaing Kapahentaanna Puang Alataala? Bahtu' pohapangang umba ang la mahasa dipasinnoai?

31O io, kuinsammi. Sinnoa sallisa' batunna pinamula ang handang saohko' ang napamula tau pano di bela'na.

32Moinnakato anna saohko'i yato batu pinamula, ampo' ponna tuhong, ya' mala untondong asang ingkänna pinamula ang senga', anna mala toi malängkä' sinnoa poang kayu. Lambi' sulei sedansiang anna mesehängngi dai' di tangkena, tanda käyyänna."

33Noanto ang napanoa Puang Yesus umpake mai'di pohapangang yaling di pepakuhunna, situhu' ang mala nainsang to pa'pehingngi.

34Dai aha untula' aka-aka siamo pano di tau mai'di ke dai umpake pohapangang. Ampo' ponna pano di to pentindo'na napakalesoing nei'.

35Tahpana di maloena yatoo ma'karang Puang Yesus pano di to pentindo'na naoatee, "Talaoa' bete' inde di tando bete'na le'bo'."

36Sika umpellei yato tau mai'di anna le'ba'i molopi bete'. Aha toe' sangngaka-sangngaka lopi senga' sibaha-baha le'ba'.

37Pihsananna sule pepahi käyyäng sibaha bombang, lambi' mai'di uhai mentama di lopinna anna sai'di' tala limmi'.

38Donetoo Puang Yesus menge hahe meollong di lau' di bii' lopi. Nahekeng pahsikolana, naoaintee, "O Tuang, akana la mekalembeirako Dio? Aka' la limmi'mi tau indee!"

39Kalehang yatoo anna umpamahtang yato pepahi anna umpa'karai bombang naoatee, "Sihoang! Mahtangngo!" Tahpa naboli siang yato pepahi anna mahtang toine' sumule yato le'bo'.

40Mane ma'karai pano di pahsikolana naoatee, "Akana dä' umpetahpa'a'? La darakoa'ne' mahea' aka' aha siamä'."

41Sika mahea' liu yatoii anna sipa'kara-karai naoatee, "Menna sakalirakae' inde tau anna moine' pepahi anna le'bo' tuhu'-tuhu'ammi pano?"


  Share Facebook  |  Share Twitter

 <<  Markus 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran