Alkitab Mobile SABDA
[VER] : [ARALLE]     [PL]  [PB] 
 <<  Markus 5 >> 

1Sika lambi'na bete' di Bohto Gerasa,

2tuhummi yaho mai di lopi. Pihsananna ahang mesa muane ma'lumpa'-lumpa' sule luyaling mai di leäng ku'bu'. Yatoo tau napentamai setang.

3Ya' tohhong di hao di ku'bu' anna si ullelengngii leäng ku'bu'.

4Moi dipungo hante bahsi mala toi nakahtu-kahtu tandana matoho liu. Ya' dang aha tau mambela mantähäng.

5Allo bengi kalao-lao leleng supu di hao di ku'bu' anna si dai'i di tanete. Si katamba-tamba anna si ungngala batu nabila'ing kalaena.

6Tahpana ungngita Puang Yesus di lau' mai kahao, lumumpa'mi sau natammui anna malimuntu'i di olona.

7Naoaminte Puang Yesus, "Sohongngo setang yaling mai ne di tau!" Napekäyyängngi liu metamba naoatee, "O Puang Yesus, Änä'na Dehata ang Handang Matande, aka la umbabe pano di kodi'? Kupalau mating ke la malai ma'dandio di tingngayona Dehata anna dä' undahha."

8(5:7)

9Ya' nakutanaing, naoaintee, "Menna sangammu?" Natimba'mi, naoatee, "Sangangku 'Sambahanang.' Disangaä' noa aka' mai'diang setang ang yaling done di kalaeku."

10Napalau mase yato setang ke la malai anna dai nalaba'i malai yaling mai yato di bohto.

11Di hao di ongeang donetoo sipatu aha mai'di liu bahi lella' sika mambuang yaho di ahe tanete.

12Malaung yato setang ang yaling di kalaena yato tau pano di Puang Yesus naoatee, "Palutamaang dono di ingkänna bahi."

13Napabei si'dang Puang Yesus. Ya' sohongnging yato setang yaling mai di kalaena yato tau anna mentamai yato di bahi. Ya' bungka' siang yato bahi anna sika tibei naung di behing karakeang lutama di le'bo' lambi' limmi'i yaling di le'bo'. Umbai donsa'bu mai'dinna.

14Yato ingkänna tau, ang lella' undakai yato bahi, tahpa sika lumpa' le'ba' do napalele pano di bohto mahoa' anna sangngaka-sangngaka bohto ang nasidungku'ing. Sohongnging tau la do ungngita yato aka ang dahi,

15sika le'ba'i pano di Puang Yesus. Naitang di hao yato tau ang puha napentamai setang malinong mohko' anna mampake manahpang aka' marohong sumule pihki'na. Ya' sika mahea' asammi ungngita umba noa kakuasaanna Puang Alataala.

16Ingkänna tau ang ungngita yato aka ang dahi pano yato di tau anna yato di ingkänna bahi sika napalele leleng.

17Tahpana yatoo, ingkänna ihsi bohto ungngoaintee Puang Yesus, "Kalemuiang, daung dinne lolo, laomo!"

18Dai'na di lopi Puang Yesus, yatoo tau ang nakuasai setang langngena' malau pano ke la malai mempola.

19Ampo' dai napabei. Naoaintee, "Laoo sumule anna untula'ing solasohommu aka ang nababe Puang Alataala pano di kalaemu anna umba noa kamarota'anna tama di kalaemu!"

20Le'ba'mi yato tau anna napalele lelengngi pano di Sampulo Bohto yato aka ang hali nababe Puang Yesus pano di kalaena. Pusa' asang liu tau nahingngi.

21Tahpana sumule Puang Yesus bete' di Kapernaum, ya' mai'ding sule tau mallebo di hao di behing le'bo'.

22Pihsananna suleng mesa tau ang disanga Yairus, mesa di alla'na to pangngäto' yaling di pa'sambayangang yato di bohto. Tahpana ungngita Puang Yesus, ya' malimuntu'mi pano di olona.

23Malau mase pano naoatee, "O Tuang, makorong maho änä'ku ang bahine. Ke la malai, maoo pano anna ungnganti anna bono'i; dai la mate!"

24Ya' le'ba'mi Puang Yesus sibaha inde ta Yairus. Mai'di liu tau mentindo', sisihpi'-sihpi' kale.

25Yaling di alla'na aha toe' mesa bahine ang unsa'ding korong mallambi' ang daloloi aha nabolinna yaling di sampulo derua pahiamanna.

26Puha liung kasi aka-akanna nabalu'i nabaya'ing mai'di to pa'pakuli, ampo' dasiang mio bono', tuhtuande' matama koronna, dahi masuhsa liu.

27Indee bahine si unghingngi toe' aka ang si nababe Puang Yesus. Yaling yato di tängngäna tau kambang mengkasihpi' kasi yato bahine umpendungku'i kebo'na Puang Yesus,

28aka' naoate are' inahanna, "Moi kuanti kale kaya'na, ya' bono'mä'tee'."

29Naanti si'dang pano yato kaya'na. Ya' bono' siang yato korong ang nasa'ding.

30Donetoo nasa'ding siang Puang Yesus aha tau ang puha nakalemui yaling di kakuasaanna. Kasaile-ileng pano yato di tau mai'di, anna mekutanai, naoatee, "Menna ang mangnganti kaya'ku?"

31Sika naoante yato ang mentindo', "Ungngita siang Dio, Tuang, mai'di liu tau ang mangkulimboio. Pake umpekutana buking Dio, menna ang mangngantio?"

32Ampo' kasaile-ile leleng siang Puang Yesus umpeäng yato tau ang mangnganti.

33Yato bahine nainsang nei' aka ang menge dahi di kalaena. Ya' sikalalla'mi mahea', le'ba' malimuntu' pano di olona. Bilang natula' pole' aka ang nababe langngena'.

34Ya' naoamintee, "O änä'ku, napabono'o kapampetahpa'ammu. Paela'i, mahasante' inahammu le'ba' aka' bono' liumo."

35Mengeke' ma'kara Puang Yesus, suleirang sangngaka-sangngaka tau luhao mai di dasanna ta Yairus, anna ungngoainte pongkahana, "Mateng änä'mu, Tuang! Damong unsaha-saha inde tuangkuhu."

36Ampo' datomande' napehingngii Puang Yesus. Supung ungngoaintee ta Yairus, "Daa ummahea', ampo' diare' pamatohoi kapampetahpa'ammu!"

37Ya' le'ba'mi Puang Yesus pano, ampo' dai umpabei tau senga' mempola, supung ta Petrus, ta Yakobus anna ta Yohanes arinna.

38Tahpana sika lambi' pano di dasanna ta Yairus, nahingnging pihsa' bongnga' tau sibaha to dumuseng, sika killa.

39Ya' tamang anna naoainte, "Akana bongnga'rakoa' dio dumuseng? Aka' inde änä' daete' mate, ahana kaleete' hahe."

40Ampo' sika napetaha-tahai supu. Nasuo asammi sika mao tama di aneang. Supung to baha'na anna yato pahsikolana tallu tama sibaha yato di tambinna to mate.

41Ya' natokeing teyyena Puang Yesus anna naoaintee yaling di basana, "\Talita kum!\" Bahtuanna: "O Ai', kalehamo!"

42Ya' kaleha siang di hoi' mai anna tahpa mellaoi. (Inde änä' sampulo deruang pahiamanna). Ingkänna tau ang mangngita yato kadahiang pihsa' pusa' liu.

43Ampo' dai napabei Puang Yesus sika napetula'ing pano di tau senga'. Mane naoaite Puang Yesus, "Pakandeia' inde änä'!"


  Share Facebook  |  Share Twitter

 <<  Markus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran