Alkitab Mobile SABDA
[VER] : [ARALLE]     [PL]  [PB] 
 <<  Markus 6 >> 

1Mengkalaong Puang Yesus sibaha pahsikolana sumule pano di bohtona, dianto Bohto Nazaret.

2Tahpana allo katohhoang napahandu'mi mampakuhu yaling di pa'sambayangang. Ingkänna ang manghingngi sika pusa' liu naoatee, "Umbanne' napangngalai kamanähängang? Aka' tainsang siang inde tau: dianto tukang kayu, änä'na Maria anna kakana ta Yakobus, ta Yusuf, ta Yudas anna ta Simon. Aha toe' dinne arinna ang bahine. Akanna malae'ne' umpapia ang mepusa'-pusa'?" Ampo' aka' dai tama di ahkalanna yato tau mai'di didiona umba noa kakuasaanna Puang Yesus, lambi' dai sika napetahpa'.

3(6:2)

4Sika napa'karaing Puang Yesus naoaintee, "Mesa nabi moi umba naongei dipakeangka' toi, ampo' supung ke di haoi di bohtona toboe', bahtu' yaling di hapunna toboe' sibaha solasohonna anna dai dipakeangka'."

5Daine' mala umbabe ang mepusa'-pusa' ke di hao toboine' di bohtona; supung unsahpa sangngaka-sangngaka to makorong anna malai bono'.

6Nakapusa'i Puang Yesus aka' sika dai mampetahpa'. Pihsananna le'ba'mi Puang Yesus sibaha pahsikolana ullelengngi bohto-bohto anna mampakuhui.

7Untambaing yato pahsikolana sampulo derua, mane napahentai moderua-ruaang sibaha nabea kakuasaang ullaba'i setang.

8Akinna sika le'ba' naoainte dolu, "Dakoa' mala umbaha aka-aka yaling di pellaoammu, supung huntung. Moi bokung, moi tas, moi doi', datoi mala umbaha.

9Malakoa' mesapatu, ampo' dai mala umbaha derua kaya'mu.

10Anna ponna ke lambi'mokoa' di mesa bohto anna natahimbomokoa' puäng dasang, dia lolontoo la ungngongei tohho lambi' umpellei bohto.

11Ampo' ponna ke lambi'mokoa' di mesa bohto anna dakoa' natahimbo to pa'bohto, bahtu' dakoa' sika napehingngii, ya' pelleii anna umpentalahpi'ing tampo ang mendehke' pano di bihti'mu anna malai mendahi pengkakalehaang pano diii. "

12Sika le'ba'ing inde pahsikolana umpepainsangnging kaheba, dianto hupatau pahallu mengkatoba'.

13Anna unghambai mai'di setang yaling mai di tau, sibaha umpabono' to makorong umpake minnä' zaitun.

14Tomaraya Herodes unghingngi kaheba didiona pembabena Puang Yesus, aka' kainsangang di umba-umba naongei. Londonang aka' aha tau ang mangngoatee, "Yohanes to Pantero' tuho sumule. Dianto anna ahai kakuasaanna umbabe ang mepusa'-pusa'."

15Ampo' aha toe' ang mangngoatee, "Nabi Eliaetee'." Aha salake' ang mangngoatee, "Nabi senga'etee' ang sinnoa nabi ang dolu."

16Nahingnginna yatoo Tomaraya Herodes, ma'karang naoatee, "Diantee' inde ta Yohanes to Pantero' ang puha kupesuoi dileta'i bää'na, ampo' dinoa tuho sumule!"

17Aka' aha dolu tula'na inde Yohanes ang umpakeaha' hapunna Tomaraya Herodes. Noa indee ang dahi: Tomaraya Herodes ungkabengngi ta Herodias, bahinena siullu'na. Tahpana nahingngi Yohanes, ya' si nakambaho loloming naoaintee, "Setonganna untehkaio atohang aka' umpobahineo Herodias ang bahinena siang ullu'mu." Ya' keaha'mi yato bahinena Herodes pano di Yohanes, napadiinahanna lambi' pemala napatei. Ampo' dai mala aka' nadakai Tomaraya Herodes aka' nainsang naoatee, "Inde Yohanes to maroho inahanna." Dianto anna mahea'i lambi' ditahungkung anna malai nadakai. Ponna ma'tula' ta Yohanes nakärä'i napehingngii Tomaraya Herodes moinnakatoo dai nainsang asang bahtuanna. Ampo' aka' kaha-kahanna bahinena dianto anna ditahungkummi.

18(6:17)

19(6:17)

20(6:17)

21Tahpana masae-sae ma'rame-rame di allo kadahianna Tomaraya Herodes, umbahai ingkänna to kepangka' anna ang diangka' ihsi bohto luhao mai di ingkänna bohto di Galilea.

22Donetoo aha mesa änä' bahine, änä'na ta Herodias, sumayo. Yato sayona nakärä'i liu lambi' umpamasannang Tomaraya Herodes sibaha to sulena. Puhanna yatoo ma'danding sitonda mopinda naoatee, "Aka ang umpemala, palau tomande'i, kubearangko! Moi sambaheanna katomarayaangku kubea tukangko!"

23(6:22)

24Sohong yato änä' bahine do naoaminte indona, "Aka ang la mapia kupalau?" Natimba'mi indona, naoatee, "Palaui anna naleta'ingko bää'na Yohanes to Pantero'!"

25Sumuleng yato änä' bahine pano di tomaraya anna malaui naoatee, "Bea siamä' dinoa bää'na Yohanes to Pantero'. Padihoi'ingkä' di baki'!"

26Nahingnginna yatoo tomaraya, masuhsa liu nasa'ding, ampo' dai mala tala nabea, aka' sala' puha mopinda anna la masili di hao di olona to sulena.

27Tahpa unsuo siang mesa änä' buana naoaintee, "Laoo leta'ingkä' bää'na Yohanes to Pantero'!" Ya' le'ba'mi pano di pantahungkungang anna tahpa napeleta'i bää'na.

28Mane sulei nabaha, napanaungngi di baki' anna nabeai pano yato di änä' bahine. Pihsananna inde änä' bahine nabea salang pano yato di indona.

29Nahingnginna pahsikolana Yohanes yato aka ang dahi, sika mao siang do naala bahkena anna naku'bu'i.

30Pihsananna yato sampulo derua ang nasuo sohong mambaha Kaheba Mapia sumuleng tihimpung sibaha Puang Yesus. Sika napainsangnging ingkänna ang nababe anna ang napakuhuing.

31Donetoo mai'di tau sisula'-sula' lambi' Puang Yesus sibaha pahsikolana dakaleng hali mande. Lambi' ma'karang Puang Yesus pano di pahsikolana, naoatee, "Maimokoa' talao bete' di ongeang mahulla-hulla aka' dia supu la mala diongei ma'lao mesa anna malakoa' mehile sämpäi'."

32Dahi sika maong bete' molopi umpeäng ongeang mahulla-hulla.

33Ampo' naonge mengkalaoi, mai'di tau mangngita anna mangnginsang ta menna anna umba la naola. Lambi' sika le'ba' yato tau mai'di do napendolui bete' naola yaho di kalantanang.

34Tahpana tuhung Puang Yesus yaho mai di lopi, tahpa ungngitang yato tau mai'di. Ya' kende'mi pa'kalemu yaling di inahanna pano yato diii, aka' sika sinnoa domba ang dai aha to pangkambi'na. Dianto anna ma'kahupa-hupang pepakuhu napakuhuing.

35Tahpana mahammong, ma'karang yato pahsikolana Puang Yesus naoatee, "O Tuang, inde ongeang ang taongeia' mahulla-hulla, anna mengeng la bengi.

36Dahi ahante' unsuo le'ba'i indo pano tau anna malai sika ungngalli andeang pano di sangngaka-sangngaka bohto saohko' ang marungku'."

37Ampo' natimba'mi Puang Yesus, naoatee, "Diongnga'tee' mampakande!" Naoante pahsikolana, "Ei! Ampo' la kami' disanga la mangngalliing andeang? Sinnoa pa'kahuaang bulanna nasaho mesa tau!"

38Mekutanang Puang Yesus pano diii naoatee, "Ahake' ne andeammua'? Laokangkoa' itai." Puhanna sika naita, naoantee, "Ahake' lima roti anna aha tuke'ne' derua bau."

39Nasuong Puang Yesus inde tau mai'di mohko' ma'kulimbo-limbo umpoampi' lohpo mamata.

40Aha si limampulo yaling di sangkulimbona, aha si sangngatu'.

41Pihsananna naalang Puang Yesus yato lima roti anna derua bau, mane mentongai dai' di langi' menge siang umpalau behe dai' di Puang Alataala. Puhai yatoo, mane umbika-bikai yato roti sibaha umbose'-bose' bau, mane nabeai pano di pahsikolana nasusaing pano yato di tau mai'di.

42Ingkänna yato tau ang aha donetoo mampebohoi asang.

43Pihsananna nahimpung salang pahsikolana yato la'binna ang dang napuha tau. Ya' ke punno salake'ne' sampulo derua baki.

44Ke diihsa'mi yato muane supu ang mangngande, umbai aha limang sa'bu.

45Puhanna yatoo, ya' unsuong pahsikolana Puang Yesus sika dai' di lopinna anna malai sika mendolung nei' bete' di Betsaida, aka' mengeke'ne' unsuo yato tau mai'di sumulei pano di bohtonaii.

46Tahpana yatoo sika le'ba'i, ya' dai'mine' Puang Yesus di tanete ma'sambayang.

47Pihsananna yatoo benging anna yato lopinna pahsikolana yalimmi di tängngä le'bo', ampo' yaho loloke'ne' Puang Yesus yato di tanete.

48Tahpana umbai lehang tehte' tallu, naitang sika masuhsa umbose lopinna aka' sika natammui pepahi. Ya' tahpa le'ba'mi Puang Yesus napellambi'i, mellao yaho di haho uhai, lambi' sai'di' tala nadolui.

49Naitanna mellao yaho di haho uhai, sika ingngi'mi

50aka' nasanga anitu anna mahea' liu. Ampo' sika tahpa napa'karai Puang Yesus, naoaintee, "Pamahasaia' inahammu! Daummahea'! Kodi'ete' indee."

51Mane mendai'i di lopinna, ya' tahpa mahtang siang yato pepahi. Sika tingke'du' pahsikolana.

52Moinnakatoo sika naita pembabena ang tanalambi' pihki', sinnoanna umpakande yato tau mai'di, ampo' dake' nainsang liu umba nasule kakuasaanna.

53Tahpana sika lambi' di tando bete'na le'bo', ya' sika ullambi'mi mesa bohto ang disanga Genesaret, anna sika unsangke'mi lopinna di behing le'bo'.

54Sohonna yaling mai di lopi, mai'di tau tahpa ungnginsang yato ang sule naoate, "Puang Yesus!"

55Sika madihhi' siang le'ba' pano di ingkänna bohto ang marungku' do ungngala to makorong anna nasilembaii sule di olona.

56Diamo naongei, dianto napambahai. Moi di ongeang mahulla-hulla, moi di bohto mahoa', aha toi sule tau umbaha to makorong pano di pasa' anna malau masei ke la malai sika ungnganti kaya'na Puang Yesus. Aka' moi behing kaya'na supu naanti, ya' tahpa bono' asang.


  Share Facebook  |  Share Twitter

 <<  Markus 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran