Dual Panel1Oa' ingkämmu solasohongku, aka' yato kamapiaanna Puang Alataala pano di kita' ang dai aha mantondong, dianto anna kupalau si'da-si'dai ke la malai umbehokoa' bätäng puntimmu dai' di Puang Alataala, umpasihapang penombaammua' ang tuho. Ponna ke umpanoai, ya' mala naäto' katuhoammu Puang Alataala anna mala toe' masero pembabemu. Dianto ada' penombaammu ang sihatang anna umpamasannang Puang Alataala.
2Dauntuhu'i pembabena tau yaling inde di lino ang dai ungnginsang Puang Alataala. Ampo' pabeii pihki'mu anna pembabemu nabakahui Puang Alataala. Aka' ponna ke umpanoai yatoo, ya' la ungnginsang si'da-si'da aka pahtuyunna Puang Alataala yaling di katuhoammu. La ungnginsang aka ang mapia, ang la umpamasannang inahanna anna ang sundung.
3Aka' pebehena Puang Alataala pano di kodi' lambi' mendahiä' rasulna, dianto anna kupakaenga'koa' kuoatee, daingkea' mala umpihki' mayahoang kalaeta. Pahalluingke umpihki' kalaeta sitonda kamahempo'ang inahanta didiona kapabelaang ang nabeaingke Puang Alataala situhu' kapampetahpa'anta pano di Puang Yesus Kristus.
4Hapanganna yaling di kalaena mesa tau aha mai'di hupanna pangkahka' kalae ampo' tontongke' dioatee mesa. Anna ingkänna yato hupanna pangkahka' kalae, pantang aha pengkähänganna.
5Noa tungnga' kita' to mampetahpa': moinnakato anna mai'diingke, ampo' tontongngingkea' mesa yaling di Kristus, anna aha kasikenteantaa' mesa anna mesa.
6Dahi, noantoo simesa-mesaingkea' pantang aha pebea ang dai sinnoa-noa pano di kita', situhu' pangngelo'na Puang Alataala. Yato pebea pahallu tapakekuna. Hapanganna tau ang dibea behe umpepainsangnging Bahtakaranna Puang Alataala, pahallu napembabe liuing situhu' kapampetahpa'anna.
7Tau ang dibea behe undului tau senga', pahallu undului si'da-si'da tau senga'. Tau ang dibea behe mampakuhu, pahallu mampakuhu si'da-si'da.
8Tau ang dibea behe umpamatoto' inahanna solana, pahallu umpamatoto' si'da-si'da inahanna solana. Tau ang dibea behe umbea aka-akanna pano di tau senga', pahallu nabea sitonda unnä' inahanna. Tau ang dibea behe mendahi to pambahanang, pahallu mambahanang sitonda sangkalebu inahanna. Anna tau ang dibea behe ungkalemui tau ang mai'di kapahalluanna, pahallu membabe sitonda inaha mapia.
9Kalemui si'da-si'dakoa' solamu. Kahaoii pembabe karake, ampo' tokei liui pembabe mapia.
10Sikalemuikoa' mesa anna mesa sinnoa pa'kalemunna to siullu' ang sipakamaya, anna sipakeangka'koa' mesa anna mesa.
11Bansa'koa' pengkähäng, dauntengkong bosi. Pakesumanga'ia' inahammu anna bansa' toukoa'ne' umpengkähängnging Dehata sitonda sangkalebu inahammu.
12Pamasannangngia' inahammu, aka' matoho kapahannuammu yaling di Dehata. Sa'bara'koa' yaling di kamasuhsaang, anna pa'sambayang lolokoa'.
13Duluikoa' solamu to mampetahpa' ang yaling di kamasuhsaang. Anna tosulemapiai tau, moi ang dai ungnginsang.
14Ponna ke ahai tau ang mandahhakoa', palauing behe dai' di Puang Alataala. Behei, dauntändoi.
15Penau-naukoa' sibaha tau ang masannang, dusengkoa' sibaha tau ang masuhsa.
16Tuhokoa' mesa inaha sibaha solamu. Daunsanga mayahoang kalaemu pano di tau ang mahoi'ang katuhoanna, ampo' tuhokoa' sibaha. Anna daunsanga manähängnga' kalaemu.
17Ponna ke ahai tau ang membabe karake pano di dioa', daumbala'i. Babeia' aka ang naangka' mapia ingkänna tau.
18Pengkalambi'-lambi'ia' anna malakoa' sikapiai lolo ingkänna tau.
19Oa' solasohongku ang kukalemui, daumbala' toboia' dio kakarakeanna tau. Ampo' pabeii Puang Alataala ang la mambala'. Aka' yaling di Suha' Masero ma'kara Puang Alataala naoatee, "'Kodi'mito to pambala'. Kodi' supu ang sihatang mampembala'ingkoa'.' Noanto pa'karanna Dehata."
20Ampo' diare', tuhu'i pepaturunna Suha' Masero ang naoatee, "Ponna ke manonoi balimmu, ya' pakandei. Bahtu' ponna ke mahähängngi, ya' paenu'i. Ponna ke umpanoai yatoo, ya' katämpä'anna la masiliete' yato balimmu anna manohsoi."
21Daumpabeii kalaemu manaho tama di kakarakeang, ampo' petaloii yato kakarakeang yaling di kamapiaang.