Dual Panel1Tadia aka' ada' kapotilleanna Yahudi lambi' to Yahudi naangka' Puang Alataala naoatee petauanna. Ampo' daa tapihki'i taoatee dai aha kala'bianna to Yahudi andana tau senga' anna dai kekuna yato ada' kapotilleanna.
2Inang aha kala'bianna, anna inang aha kunanna! Ang uhuna, dianto aka' Puang Alataala umbea bahtakaranna pano di to Yahudi dolu.
3Aha sangngaka-sangngaka to Yahudi ang dai umpatontong kapampetahpa'anna dai' di Puang Alataala. Ampo' moinnakato noa, tontongke' Puang Alataala umpatontong pa'dandianna pano diii.
4Moinnakato anna loseng asangngi ingkänna hupatau, ampo' tula'na Puang Alataala tahpa' lolo nei'. Aka' aha tiuki' yaling di suha'na Tomaraya Daud naoatee, "O Puang, ahana inang tahpa' pa'karammu. Sihatangngete' umpasalaä' aka' tahpa' pambohtummu."
5Dahi, kamarohoanna Puang Alataala tuhtuang tandaang aka' pembabena hupatau ang dai maroho. Ampo' dai mala tapihki' taoatee: "Ponna ke noai, ya' dai maroho Puang Alataala ke keaha'i pano di kita' aka' pembabeta ang dai maroho." Inang aha tau ang mampihki' noa yatoo,
6ampo' dai tahpa' inde pihki'na. Aka' ponna ke dai maroho Puang Alataala, ya' dai la sihatang umpahehsa ingkänna tau di Allo Pampahehsaang.
7Ampo' umbai aha tau ang mampihki' naoatee, "Dai sihatang la nasallaingkea' Puang Alataala aka' yato dosanta, aka' nasuhung tuhtuang tandaang kamarohoanna lambi' dipudi, dianto aka' pembabe karaketa."
8Ponna ke noai, ya' mala setonganna taoatee, "Dotanne' membabe karake tau anna malai kende' kamapiaang." Anna setonganna aha tau ang mantanda'ä', naoate haliä' ma'kara noa indee. Tau ang noa yatoo sihatang natahungkung Puang Alataala.
9Dahi noa indee: kita' to Yahudi daete' mala taoatee mapia puhaingke andana tau senga'. Aka' sinnoa ang kutula' di langngena' kuoatee: ingkänna tau kekasalaang anna madosa, noa to Yahudi, noa tau senga'.
10Sinnoa ang tiuki' yaling di Suha' Masero naoatee: "Dai aha tau ang maroho, moi poro la mesa.
11Dai aha ang bahahsi inahanna di olona Puang Alataala. Dai aha ang umpeäng Puang Alataala,
12Ingkänna tau ungkebo'i Puang Alataala, dang kekuna katuhoannaii. Dai aha ang mengkero mapia, moi poro la mesa."
13"Pa'karanna punno pa'bulitu' ang la mebaha pano di kamateang, Punno yaling di suana kara kalosengang." "Karanna supung pemala untilakai solana sinnoa pekeki'na ile keipo."
14"Karanna punno petändo tahuhu pano di tau senga'."
15"Sadia lolo ma'siba'di, pemala umpatei solana.
16Diamo naongei si umbabe lolo kakarakeang anna umpaaha kamadahhaang.
17Dai sika naaku umpeäng lalang kasikapiaiang."
18"Dasi'da-si'dai sika nainsang mahea' dai' di Puang Alataala."
19Dahi dinoa tainsang si'da-si'da taoatee, ingkänna ang tiuki' yaling di Atohanna Musa dianto didiona to Yahudi ang untahimbo yato Atohang. Dahi, dai aha tau ang la mala unsanga kalaena to maroho, aka' kekasalaang asang di olona Puang Alataala.
20Dai aha tau ang naangka' maroho Puang Alataala aka' untuhu'i Atohanna Musa. Setonganna ungngolai ingkänna Atohanna Musa ang tiuki' lambi' tainsang si'da-si'dai taoatee puhaingke umbabe dosa.
21Ampo' dinoa napaitaiingkea' lalang Puang Alataala anna malai tau maroho di olona. Tadia aka' untuhu'i tau Atohanna Musa anna malai tau maroho, ampo' inang puhang tiuki' yaling di suha'na Musa anna yaling di suha'na senabiang dolu ang napanoa Puang Alataala umpamaroho hupatau:
22Napamarohoingkea' Puang Alataala ke mampetahpa'ingke pano di Puang Yesus Kristus. Napanoa indee pano di ingkänna tau ang mampetahpa', dai aha nasehalii.
23Aka' madosa asangngingkea', anna daiingkea' umbabe kamarohoang ang situhu' pahtuyunna Puang Alataala pano di kita'.
24Ampo' aka' mana' pa'kalemunna Puang Alataala lambi' nalahpa'ingkea' di hao mai di tahungkunna dosanta; naangka'ingkea' maroho aka' puhaingkea' nasulängngi Kristus Yesus.
25Situhu' pahtuyunna Puang Alataala, nasuhung umpebeaing Puang Yesus dipatei anna titollo hahana anna malai untangkung dosanna hupatau, lambi' la diampungngi dosanta ke mampetahpa'ingke pano. Naonge dake' aha ungngolai kamateang Puang Yesus, sa'bara'ke' Puang Alataala didiona dosanna hupatau lambi' dake' sika natahungkung. Napanoa inde Puang Alataala anna malai tandaang dai manse'la-se'laang.
26Dianto lalanna anna umpalanda'i kamarohoanna Puang Alataala ungngolai kamateanna Puang Yesus naonge unsulängngi hupatau. Dahi dinoa, tandaammi kamarohoanna Puang Alataala, anna ungngangka' maroho ingkänna tau ang mampetahpa' pano di Puang Yesus.
27Dahi, dang aha lalang la ungngangka'-angka'ingkea' kalaeta. Aka' daingkea' natahimbo Puang Alataala aka' pembabe mapianta, ampo' natahimboingkea' aka' kapampetahpa'anta pano di Puang Yesus.
28Aka' ang handang pahallu yaling inde di suha'ku, dianto: marohoingkea' di olona Puang Alataala aka' kapampetahpa'anta, tadia aka' pembabe mapianta untuhu'i Atohanna Musa.
29Aka' tadia to Yahudi supu ang nakalemui Puang Alataala. Ampo' ingkänna tau nakalemui asang, moi tau ang tadia to Yahudi.
30Aka' mesa supu Puang Alataala, anna Dianto ang umpamaroho to Yahudi supung aka' kapampetahpa'annaii, anna umpamaroho toe' tau ang tadia to Yahudi, supung aka' kapampetahpa'annaii toe'.
31Dahi, ponna noa, ya' daingkea' mala ma'pihki' taoatee dai kekuna Atohanna Musa. Daa! Aka' ungngolai kapampetahpa'anta, setonganna tapembabeing yato ang tiuki' yaling di Atohanna Musa.