Alkitab Mobile SABDA
[VER] : [ARALLE]     [PL]  [PB] 
 <<  Roma 6 >> 

1Puang Alataala ungngampungngi dosanta aka' mana' pa'kalemunna pano di kita'. Ampo' daingkea' mala ma'pihki' taoatee: "Ponna ke noai, dotanne' tau umpobabe-babe dosa, anna malai tuhtuang mai'di pa'kalemunna Puang Alataala ang la ungngampungngiingkea'."

2Dai mala tapihki' noa yatoo! Aka' daete' sihatang ke tontong loloi tau madosa, aka' setonganna matemingkea' di mendehatanna sibaha Puang Yesus Kristus anna malai lahpa'ingkea' di hao mai di dosa.

3Oa' solasohong, inang ungnginsammia' ungngoatee puhamingkea' ditero' yaling di sanganna Kristus Yesus, anna bahtuanna yatoo dianto matemingkea' sibaha.

4Naonge ditero'ingkea', mala dioate matemingkea' anna dilamungngingkea' sibaha Kristus anna malai tatahimbo katuhoang bakahu sibaha pengkero bakahu, sinnoa Kristus ang napatuho sumule kakuasaanna Puang Alataala Ambena di hoi' mai di alla'na to mate.

5Dahi, ponna ke mesamingkea' sibaha Puang Yesus yaling di kamateanna, tantu anna la dipatuho toingkea' kita' sumule yaling di katuhoanna.

6Tainsangnga', solasohong, taoatee kamadosaanta ang dolu puhang dipatei sibaha kamateanna Puang Yesus Kristus yaho di kayu sitambeng, anna malai kakuasaanna dosa yaling di katuhoanta dipa'dai, lambi' damingkea' naposabua' dosa.

7Hapanganna ponna ke matei tau, ya' dilahpa'mi tau di hao mai di kakuasaanna dosa.

8Dahi, ponna ke matemingkea' sibaha Kristus, sinnoa ang kuoa di langngena', ya' tantunte' anna la tuho boingkea' sibaha-baha yaling di katuhoanna sumule.

9Aka' tapetahpa', solasohong, taoatee Kristus dipatuho sumule, anna dinoa tuhong lambi' sapano-panona. Dang la nakuasai kamateang.

10Kamateanna Puang Yesus pihsang supu, anna yato kamateanna untalo kakuasaanna dosa lambi' sapano-panona. Ampo' dinoa tuhong untuhu'i pa'elo'na Puang Alataala lambi' sapano-panona.

11Noa tunne' pahallua' taoate yaling di inahanta, "Matemä' sibaha Puang Yesus anna lahpa'mä' di hao mai di dosangku. Ampo' mengkalao dinoa tuhomä' anna untuhu'iä' pa'elo'na Puang Alataala yaling di Kristus Yesus."

12Dianto anna kupakaenga'koa', anna malai dang la tapabei dosa ungkuasai katuhoanta yaling inde di lino, anna damingke la untuhu'i pampemala karaketa.

13Aka' dilahpa'mingkea' di hao mai di katuhoanta ang dolu anna puhang tatahimbo katuhoang bakahu, dahi daa tapakei ingkänna aka ang aha yaling di kalaeta umbabe dosa anna pembabe karake. Ampo' la tabeho kalaeta dai' di Puang Alataala, anna malai sangkalebu kalaeta la tapake umbabe pembabe ang maroho di olona Puang Alataala.

14Aka' damingkea' nakuasai dosa, aka' damingkea' natokei Atohanna Musa, ampo' dinoa hannuingkea' yaling di mana' pa'kalemunna Puang Alataala.

15Dahi naangka'mingkea' maroho di olona Puang Alataala supung aka' mana' pa'kalemunna, tadia aka' tatuhu'ia' atohanna. Ampo' dai mala tapadiinahanta taoatee ponna ke noai, ya' malaingke umbabe dosa. Daa, solasohong!

16Ungnginsangnga', solasohong, ungngoatee hapanganna ke untuhu'iingke pahentana mesa tau, ya' mendahiingke sabua'na yato tau. Noa tunne' dosa: ponna ke tatuhu'i loloi pampemala karakena inahanta, ya' naposabua'ingke dosa. Katämpä'anna la untahimboingke kamateang ang mepasikahaoang Puang Alataala lambi' sapano-panona. Ampo' ponna ke untuhu'iingke Puang Alataala, ya' naposabua'ingke Puang Alataala anna naangka'ingke maroho di olona.

17Dolu anna dakangkoa' umpetahpa' Puang Yesus, inang naposabua'koa' dosa. Ampo' kuhhu' sumanga' dai' di Puang Alataala! Aka' umpakalebumokoa' inahammu mengkaala pano di kaheba ang puhamokoa' dipainsangngi.

18Dahi mengkalao dinoa dilahpa'mokoa' di hao mai di kasabua'anna dosa, anna mendahimokoa' sabua'na Puang Alataala ang untuhu'i pa'elo'na.

19Inde pohapangang tanda di kasabua'ang kupake anna malai maromi' ungnginsangnga' pepaturungku. Dolu naposabua'koa' dosa aka' umpabeia' kalaemu untuhu'i pampemala karakemu ang dai sihatang, lambi' tuhtuang karakea' pengkeromu. Noa tunne' dinoa, behoia' kalaemu dai' di Puang Alataala anna malakoa' mendahi sabua'na lambi' la maroho pengkeromu anna la masero katuhoammu.

20Naonge naposabua'kangkoa' dosa, dakoa' untuhu'i pa'elo'na Puang Alataala.

21Donetoo behe aka ang untahimboa' di hao mai yato di katuhoammu? Masilikoa' supu aka' yato pembabemua' ang dolu, aka' yato pembabemua' nabahakoa' pano di kamateang anna napasikahaoangkoa' Puang Alataala.

22Ampo' dinoa dilahpa'mokoa' di hao mai di kakuasaanna dosa anna naposabua'mokoa' Puang Alataala. Behemua' dianto tuho maseromokoa' anna kalemba'anna dianto la untahimbokoa' katuhoang lambi' sapano-panona.

23Aka' sahona dosa dianto kamateang ang la umpasikahaoang yato to madosa di hao mai di Puang Alataala. Ampo' pebeana Puang Alataala dianto katuhoang lambi' sapano-panona. Pebeana yatoo tatahimbo aka' tuhoingke yaling di Kristus Yesus, Dehatanta.


  Share Facebook  |  Share Twitter

 <<  Roma 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran