Alkitab Mobile SABDA
[VER] : [ARALLE]     [PL]  [PB] 
 <<  Wahyu 16 >> 

1Mane unghingngi bouä' kamaha käyyäng yaling mai di Dasang Ada'na Puang Alataala ma'kara pano di pitu malaeka' naoatee, "Laoo do umpentolloing yato pitu kahti kakeaha'anna Puang Alataala naung di lino!"

2Le'ba'mi inde malaeka' ang uhuna anna napentolloing. Ya' tahpa dahi siang hae ang tamahamu' anna malala pano di ingkänna tau ang umpotanda yato olo'-olo' anna napenombai.

3Puhai yatoo, le'ba' bung malaeka' kaderuanna umpentolloing yato kahti naung di le'bo'. Ya' tahpa mendahi haha siang yato uhai sinnoa hahana to dipatei. Matei siang yato samai ihsi le'bo'.

4Pihsananna malaeka' katallunna umpentolloing yato kahti pano di samai timbu anna salu uhai, ya' mendahi siang haha yato samai uhai.

5Kuhingnging yato malaeka' ang ungkuasai uhai naoatee, "O Puang Alataala ang aha anna inang aha, To Handang Masero, sihatang kamadahhaang ang umpaaha!

6Aka' puhang sika umbollo hahana petauammu anna nabimmu. Dinoa sika umbala'mi umpaenu' uhai ang menghaha. Inang sihatang sika noa!"

7Kuhingnging kamaha yato di ongeang pantunuang naoatee, "Io, Puang Alataala To Handang Ma'kuasa, tahpa' anna para-para ingkänna panghohto'mu!"

8Malaeka' kauhpa'na umpentolloing yato kahti tama di mata allo, ya' mapana' liung allo anna dipabei undä'däng hupatau.

9Madahha yato hupatau napobua' mapana'na allo, lambi' sika untula'-tula' tahuhu sanganna Puang Alataala ang ma'kuasa didiona yato kamadahhaang. Moinnakato noa, dasiang sika mengkatoba' di hao mai di dosannaii anna dai naaku umpamatande Puang Alataala.

10Tahpana malaeka' kalimanna umpentolloing yato kahti naung di ongeang kakuasaanna yato olo'-olo', ya' tahpa malilling siang anna samai ihsinna ungkeki' lilana napobua' kamapi'di'anna.

11Lambi' sika untula'-tula' tahuhu sanganna Puang Alataala ang umpahenta suruka aka' sika mapi'di' sibaha pehae. Ampo' dasia tunne' naaku sika mengkatoba' di hao mai di pembabe karakena.

12Mane malaeka' kaunnunnai umpentolloing yato kahti pano di Bone Efrat ang käyyäng. Yato bone mahti' lambi' la mala naola setomarayaang ang sule yaling mai di katimbingang allo.

13Pihsananna ungngitamä' tallu inaha karake sinnoa bahebe hupanna, pantang sohong yaling mai di suana saha, olo'-olo' anna yato ang boheng unsanga kalaena nabi.

14Yato tallu inaha karake ang umbabe ang mepusa'-pusa' mao pano di setomarayaang di lino anna malai sika ma'mesa la ma'tolla' di allo ang dipa'käyyängngi, dianto allo ang naonge Puang Alataala To Handang Ma'kuasa la umpahehsa tau.

15Kalehaii ang natula' Puang Yesus naoatee, "Sinnoa to paboko daia' la ungnginsang kasuleangku! Tau ang tontong madaka, dianto ang la ullambi' kamasannangang yaho mai di Puang Alataala. Tau ang noa la undakai porehana anna malai dai mohobeläng mellao sibaha dai masili di olona tau kambang!"

16Pihsananna yato tallu inaha karake umpopa'mesa setomarayaang di mesa ongeang ang yaling di basa Ibrani disanga 'Harmagedon.'

17Puhai yatoo, malaeka' kapitunna umpentolloing yato kahti yaho di nähäng. Ya' kahingngiammi kamaha napekäyyängngi yaho mai di ohko'anna tomaraya di Dasang Ada'na Puang Alataala naoatee, "Puhang dipembabeing kakeaha'anna Puang Alataala!"

18Tahpa kila' siang anna noa toi kundäng mokaliamba moduru-duru sibaha lino' käyyäng. Dake' aha dahi lino' noa suka'na dahi hupatau. Dianto inde lino' ang dai aha mantondong!

19Yato Bohto Mahoa' Babel ang käyyäng tiperetallu, noa toi samai bohto mahoa' di lino titale-tale asang. Nakalehaing Puang Alataala dosanna to Babel anna nadahhai lambi' puha yato kakeaha'anna ang napaenu' sinnoa angkoro' masahhu' yaling mai di kahti.

20Ingkänna kalantanang masihki' anna tanete pa'da asang.

21Kene' batu käyyäng ang silimampulo kilo matingnginna, dondongngi yaho mai di langi' ungkanahoi hupatau. Ya' sika untändoing Puang Alataala napobua' yato kene' batu ang masahhu'.


  Share Facebook  |  Share Twitter

 <<  Wahyu 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel