Dual Panel1Nalombungnging yato tula'na naoatee, "Pano di malaeka'na jumaa' Efesus, noa indee ang la ungnguki': Dianto inde pepasanna ang untokei pitu bintäng di teyye kuananna, anna mellao di alla'na pampatokoang lampu bulahang.
2Kuinsang samai ang umbabea', umpengkähäng si'da-si'daingkä' anna sa'bara'koa' ungngolai kamadahhaang. Kuinsang toi dakoa' umbea inaha pano di to karake. Anna tau ang ungngangka' kalaena rasul ampo' setonganna tadia, puhangnga' unsändä'i, ya' ullambi'mi kalosengannaii.
3Masuhsakoa' anna sa'bara'koa' aka' kodi', dakoa' ungnginsang lupu umpengkähängngingkä'.
4Ampo' ahake' ang kusallaingkoa', dianto dang aha pa'kalemu yaling di inahammu sinnoa dolu.
5Kalehaii, makahao liungnga' ungngongei manaho! Pengkatoba'koa' di hao mai di dosammu, anna umpembabeing yato aka ang puha umbabea' dolu. Ponna daia' umpanoa, ya' la suleä' kualai yato pampatokoang lampu.
6Ampo' aha ang mapiaa' di kalaemu, dianto: ungkahi'di'koa' pembabena to pentindo'na Nikolaus ang kukahi'di' tou kodi'.
7Ponna ke pemalakoa' ungnginsang manahpa, ya' pehingngii si'da-si'dai samai ang natula' Inaha Masero pano di pitu jumaa'! Tau ang patalo la kupabeine' ungngande boana poang kayu ang mepatuho ang tuho yaling di bela'na Puang Alataala."
8Nalombungnging yato tula'na naoatee, "Pano di malaeka'na jumaa' Smirna, noa inde ang la ungnguki': Dianto inde pepasanna ang sule yaho mai di To Handang Uhuna anna Katämpä'na, Ang puhang mate ampo' tuho sumule.
9Kuinsang kamasuhsaammua'. Kuinsang memase-masekoa' ampo' setongnganna to makakakoa' di mendehatanna. Kuinsang umba noa kara-kara ang napatanda'ikoa' ang unsanga kalaena to Yahudi, ang napillei Puang Alataala, ampo' setonganna kuangka' tadia to Yahudi. Yato tau petauanna Pongkahana setang.
10Daungkahea'a' kamadahhaang ang dang masae anna ullambi'mi. Inang la ahaete' sangngaka-sangngaka di alla'mua' ang la napatama Pongkahana setang di tahungkung nasändä'i. Sampulo allona naongei madahha. Pahallukoa' umpamatoto' lolo kapampetahpa'ammu di Kodi' lambi' mate. Ponna umpanoang, ya' la kubeamokoa'te' saho kapataloang dianto katuhoang lambi' sapano-panona.
11Ponna ke pemalaia' ungnginsang manahpa, ya' pehingngii si'da-si'dai samai ang natula' Inaha Masero pano di pitu jumaa'! Tau ang patalo danne' la unsa'ding kamadahhaang di kamateang kapendoanna. "
12Nalombungnging yato tula'na naoatee, "Pano di malaeka'na jumaa' Pergamus, noa inde ang la ungnguki': Dianto inde pepasanna ang sule yaho mai di tau ang kepa'dang pahela sibali.
13Kuinsang ang ungngongei tohho, dianto ongeanna Pongkahana setang ma'kuasa. Ampo' inang umpetahpa'ä'a', lambi' daia' tora' aha umbahoi'ä' yato naonge dipateii ta Antipas diting ang naonge tohho Pongkahana setang. Indee Antipas dianto mesa sa'bingku ang tontong lolo kapampetahpa'anna di Kodi'.
14Moinnakato noa, ahake' sangngaka-sangngaka kaha-kaha ang kusallaingkoa'. Ahakoa' sangngaka-sangngaka ang untuhu'i pepakuhunna Bileam. Inde Bileam umpakuhu ta Balak dolu ang la napanoa umpatinaho to Israel tama di dosa. Napaturui ungngande andeang ang puha dipopenomba pano di dehata lino anna ungngindä'-indä' pa'bannetauang.
15Noa toi aha di alla'mua' ang untuhu'i pepakuhunna to pentindo'na Nikolaus.
16Dahi pengkatoba'mokoa' di hao mai di dosa. Ponna dai umpanoa, ya' dante' masae anna tamamä' di alla'-alla'mu anna kutolla'i yato tau umpakeä' pa'dang ang aha di suaku.
17Ponna ke pemalakoa' ungnginsang manahpa, ya' pehingngii si'da-si'dai samai ang natula' Inaha Masero pano di pitu jumaa'! Tau ang patalo kupabeine' ungngande dehpa manna ang tibuni, anna pantang la sika untahimbo mesa batu mabusa di Kodi'. Di hao yato di batu aha tiuki' mesa sanga ang bakahu, ang dai aha moi poro la mesa tau mangnginsang supung ang mantahimbo toboe'."
18Nalombungnging yato tula'na naoatee, "Pano di malaeka'na jumaa' Tiatira, noa inde ang la ungnguki': Dianto inde pepasanna ang sule yaho mai di Änä'na Puang Alataala, ang pähä'lä' matanna sinnoa api, anna bihti'na pangngillo' sinnoa bahsi ang mane dihui'i yaling mai di ahha baya.
19Kuinsang samaia' ang umbabe. Ungkalemuikoa' para-parammu hupatau, mampetahpa'koa', mengkähäng, anna sa'bara'koa' ungngolai kamasuhsaang. Kuinsang mai'di puhane' ang ungkähäng dinoa andana dolu.
20Ampo' ahake' ang kusallaingkoa', dianto umbearakoa' dio inaha ta Izebel, mesa bahine ang unsanga kalaena nabinna Puang Alataala. Mai'ding petauangku ang napasähsä' lalang anna napaturui ungngindä'-indä' pa'bannetauang sibaha ungngande andeang penombaang pano di dehata lino.
21Puhang kubea tempo mengkatoba' ampo' dasiang aha nabolinna ungngindä'-indä' pa'bannetauang.
22Dahi la kupamakorong. La sika kudahha si'da-si'da sibaha tau ang nasikamahoiing. Supung tora' ke naboling ungngindä'-indä' pa'bannetauang, ya' dai la kupanoa.
23Ingkänna to pentindo'na la kupatei asang, anna malai nainsang samai jumaa' naoatee, Puang Yesus ang ungnginsang anna ullosa ihsi inahanna hupatau. La kubala'koa' situhu' pembabemu.
24Ampo' senga'na to Tiatira ang dai untuhu'i yato pepakuhu salao-laona anna dai umpellaya'i aka ang dioaintee, 'kamanähänganna Pongkahana setang,' kuoane'te tora' daine' la kupahoai durungang ang matingngi,
25supung pahallua' umpatontong kapampetahpa'ammu di Kodi' lambi' suleä' dako'.
26Tau ang patalo anna umpembabeing samai pa'elo'ku lambi' mate, la kubea kakuasaang sinnoa ang kutahimbo yaho mai di Ambeku. La sika sundung kakuasaanna umpahenta bohto-bohto käyyäng anna untallangngi yato bohto sinnoa unghämu-hämu kohing tampo.
27(2:26)
28La sika untahimbo bintäng pambaha allo di hao mai di Kodi'.
29Ponna ke pemalakoa' ungnginsang manahpa, ya' pehingngii si'da-si'dai samai ang natula' Inaha Masero pano di pitu jumaa'!"