Dual Panel1Pihsananna napatuhoimä' yato malaeka' salu uhai ang mepatuho uhainna. Yato salu uhai mahändäng sinnoa dahammeng, anna mesalu mengkalao yaho di ohko'ang katomarayaanna Puang Alataala anna yato Änä' Domba
2yaling di tängngä-tängngäna lalang yato di bohto. Di behinna yato salu uhai, sibali-bali naongei poang kayu mepatuho, ang pensampulo derua keboa yaling di sampahiama dianto pihsang sambulang. Lala'na dipake umpakulii tau di hao mai di ingkänna bohto.
3Yaling yato di bohto dai la aha ang nahoa petändona Puang Alataala sinnoa dolu. Ohko'ang katomarayaanna Puang Alataala anna Änä' Domba la ma'ongeang yato yaling di bohto anna ingkänna petauanna la menomba pano.
4Sika la ungngita lindona anna sanganna Puang Alataala la diuki' pano di kandinnaii.
5Kamalillingang dang la aha di hao. Dang umpahallu ballo sibaha pesilona mata allo, aka' la sika naballoi Puang Alataala, anna sika la ma'pahenta sihapang tomaraya lambi' sapano-panona.
6Puhanna yatoo, napa'karai bumä' yato malaeka' naoatee, "Tula' indee tahpa' liu anna mala dipetahpa'. Puang Alataala ang umbea Inaha Maserona pano di ingkänna nabi, puhang unsuo malaeka'na umpaitai sabua'na didiona ang la pahallu baha' dahi."
7Naoate Puang Yesus, "Pehingngii manahpai! La baha' sulemä'. Ingkänna tau ang untuhu'i tula' pepakaenga' yaling inde di suha' didiona ang la baha' dahi, dianto ang la ullambi' kamasannangang yaho mai di Puang Alataala!"
8Kodi' ang disanga Yohanes, puhang kuhingngi anna kuita ingkänna yatoo. Puhanna kuita anna kuhingngi, ya' malimuntu' siamä' di olona yato malaeka' la menomba.
9Ampo' naoaingkä'tee, "Daa! Daumpenombaiä'! Penombaio Puang Alataala! Aka' sabua' turä'to koo; sinnoa siamingke anna sinnoa solasohommu ingkänna nabi, anna ingkänna tau ang untuhu'i pepakaenga' yaling inde di suha'!"
10Naoa sala buntee, "Daumpadiinahammu kalei inde ang yaling di suha', aka' dang masae anna la dahing.
11Tau ang maho-maho, pabei tubunne' umbabe lolo kamahoang; tau ang kekasalaang, pabei tubunne' umbabe lolo kasalaang; tau ang maroho inahanna, pabei tubunne' membabe maroho lolo; anna tau ang umpatani kalaena supung di Puang Alataala, ya' pabei tubunne' napanoa."
12Naoa bunte Puang Yesus, "Pehingngii manahpai! Dang masae anna sulemä' umbahaing sahona ang la dibea pano di tau situhu' aka ang puha nababe.
13Kodi'mito indee Ang Handang Uhuna anna Ang Handang Katämpä'; Kodi'mito Dehata mengkalao di pampahtunganna lambi' kapuhaanna.
14Tau ang untahpa' kaya'na dianto ang la ullambi' kamasannangang yaho mai di Puang Alataala, lambi' sihatang ungngande boana poang kayu ang mepatuho anna beba' mentama yato di bohto mahoa' ungngola baba hala.
15Ampo' samai tau ang mehiri'-hiri' pembabena, to ma'ihsang-ihsang, to umbabe katasampa'ang, to papateang, to umpenombai dehata lino anna to pa'loseng-loseng, moi tula'na, moi pembabena, ingkänna inde tau ang noa la tohhone' di aneanna yato bohto mahoa'.
16Kodi' Puang Yesus, puhamä' unsuo malaeka'ku mating di dioa' anna malai umpepainsangnging kaha-kaha indee ang napokapahalluang jumaa'. Kodi' indee Peänä'anna Tomaraya Daud. Kodi'mito indee Bintäng Pambaha Allo."
17Ma'karang Inaha Masero sibaha yato bahine ang la napobahine Änä' Domba naoatee, "Maimo!" Diamo ang manghingngi indee la naoa toe'te, "Maimo!" Menna ang mahähäng sule tomande'o anna unsengko' tomande'i yato uhai ang mala mepatuho.
18Pano di tau ang unghingngi tula' yaling inde di suha', pahallu kupakaenga' dianto: Ponna aha tau ang unghängngängngi ihsinna inde suha', ya' la napahoai toinne' Puang Alataala ingkänna kamadahhaang ang puha tiuki' yaling inde di suha'.
19Anna ponna aha ang mangngalai piha, ya' dai la napabei Puang Alataala yato tau ungngande boana poang kayu ang mepatuho sibaha tohho yaling yato di bohto mahoa' ang masero.
20Puang Yesus ang umpalambi' samai inde kaheba naoatee, "Tahpa', la baha' sulemä'!" Ya' Aming! Sulemote' O Puang Yesus!
21Pa'kalemunnarang Puang Yesus ang la umbehe ingkämmua' petauanna. Aming.