Dual Panel1Nalombungnging yato tula'na naoatee, "Pano di malaeka'na jumaa' Sardis, noa inde ang la ungnguki': Dianto inde pepasanna ang sule yaho mai di tau ang umpahenta pitu inaha ang aha yaho di olona ohko'ang katomarayaanna Puang Alataala anna untokei pitu bintäng. Kuinsang ang umbabea'. Boheng untindo'ä' anna naoate tau, 'tuho' ampo' setonganna matekoa'.
2Dahi kalehakoa' anna pamatohoi ang ahake' di kalaemu akinna pa'da. Aka' samai pengngoya'mu ang kulambi', dake' sundung di olona Puang Alataala.
3Dahi, pengkakalehaii sumule samai ang puha dipakuhuingkoa' anna ang puha unghingngi. Pembabeing yatoo anna mengkatoba'koa' di hao mai di dosammu. Ponna dakoa' madaka, la suleä' kudahhakoa', sinnoa to paboko kasuleangku daia' la ungnginsang.
4Moinnakato noa, ahake' tau diting di Sardis ang madaka anna malai pengngoya'na tontong mapia sinnoa kaya' ang mabahahsi. Ingkänna yatoo la kusibahaing mellao umpake kaya' mabusa ang mabahahsi, aka' sihatang nei'.
5Tau ang patalo dipakei noa nei'. Sangannaii dai la kukoso'i yaling di suha' pantekenganna to tuho lambi' sapano-panona. Anna di olona Ambeku anna samai malaeka'na kuakune' kuoate to pentindo'ku.
6Ponna ke pemalakoa' ungnginsang manahpa, ya' pehingngii si'da-si'dai samai ang natula' Inaha Masero pano di pitu jumaa'!"
7Nalombungnging yato tula'na naoatee, "Pano di malaeka'na jumaa' Filadelfia, noa inde ang la ungnguki': Dianto inde pepasanna ang sule yaho mai di To Masero ang tahpa'. Dianto ang untokei pekilinna Tomaraya Daud. Ponna diang mantungka'i, dante' aha moi poro la mesa tau ang la mala mantutu'i. Ponna diang mantutu'i, dante' aha moi poro la mesa tau ang la mala mantungka'i.
8Kuinsangnga' pembabemu. Kuinsang toi dai umba sama kamatohoammua', ampo' untuhu'imokoa' pepakuhungku, anna umpetahpa'ä'. Puhang kubuhkeiingkoa' baba ang la dai mala natutu'i moi poro la mesa tau.
9Itai, tau ang mendahi to pentindo'na Pongkahana setang la kusuo sule malimuntu' di olomu. Anna la nainsang pa'kalemungku mating di dioa'. Yato tau to pa'loseng-loseng ang si unsanga kalaena to Yahudi ang napillei Puang Alataala, ampo' setonganna tadia.
10Untuhu'imokoa' pahentaku, dianto sa'bara' ungngolai kamasuhsaang, dahi la kudakaikoa' di tempona kamasuhsaang ang la unghoa inde lino. Inde la dahi anna malai unsändä'i ingkänna tau di lino.
11Dang masae anna sulemä'. Pahallua' umpatontong kapampetahpa'ammu di Kodi', anna malai dai aha tau manghampa'ikoa' saho kapataloammu.
12Tau ang patalo la kupadahi ahhi yaling di Dasang Ada'na Puang Alataala, anna la tohho yaling lambi' sapano-panona. Pano yato di kalaena tau la kuuki' bohto mahoa'na Dehatangku dianto Yerusalem Bakahu ang la tuhung yaho mai di Dehatangku di suruka. La kuuki' toi sanganna Dehatangku anna sangangku ang bakahu.
13Ponna ke pemalakoa' ungnginsang manahpa, ya' pehingngii si'da-si'dai samai ang natula' Inaha Masero pano di pitu jumaa'!"
14Nalombungnging yato tula'na naoatee, "Pano di malaeka'na jumaa' Laodikia, noa inde ang la ungnguki': Dianto inde pepasanna ang sule yaho mai di To Tontong Aha, Sa'bi ang tahpa' ang mala dipetahpa', ang nakasulei ingkänna siamo ang napadahi Puang Alataala.
15Kuinsang samai ang umbabea'. Dakoa' masumanga' di Kodi' anna datoukoa' masumanga' mambaliä'. Malae' ke la poro ahai mesa, masumanga' di Kodi' bahtu' bilang masumanga' mambaliä'.
16Ampo' aka' noang babemua' makuhtu, dahi la kupentibeingkoa' yaling mai di oloku.
17Ungngoaa'tee, 'To makakaang anna sundung; daang aha kalala'.' Ampo' daia' ungnginsang kalaemu meuho-uho anna masuhsa diita katuhoammu. To pemase-masekoa', dai paita anna mohobeläng.
18Dianto suhunna anna kupainsangngikoa' anna malai ungngalli bulahangku, dianto bulahang ang dai aha mampenghaui, lambi' malakoa' mendahi to makaka. Noa toi pakeang mabusa la umpake anna malai dakoa' mohobeläng ang mepakasili. Noa tunne' minnä' la unsuhsu'ing matammu anna malai paita.
19Tau ang kukalemui dianto ang kukambahoing anna kupaturu. Dahi pahallukoa' suhaka anna mengkatoba' di hao mai di dosammu.
20Itai, ke'de'ä' di hao di olo baba anna ma'karaä'. Ponna aha tau ang manghingngi kamahangku, anna umbuhkei baba, la tamaä' kupellambi'i. La mandeang sibaha-baha.
21Tau ang patalo, la kupabeine' mohko'ang sibaha di ongeang katomarayaangku, sinnoa Kodi' puha patalo anna dinoa mohko'mä' sibaha Ambeku di katomarayaanna.
22Ponna ke pemalakoa' ungnginsang manahpa, ya' pehingngii si'da-si'dai samai ang natula' Inaha Masero pano di pitu jumaa'!"