Alkitab Mobile SABDA
[VER] : [ARALLE]     [PL]  [PB] 
 <<  Yakobus 1 >> 

1Pano di ingkämmua' peänä'anna yato ang sampulo derua änä'na Israel, ang tisembu' pano di bohto senga'. Hao mai di Yakobus, sabua'na Puang Alataala anna Puang Yesus Kristus, Dehatanta. Salama'kua' mating.

2Ingkämmua' solasohongku, ke nalambi'koa' ma'kahupa-hupa pesändä', pasihapangngi mesa kakehongko'ang käyyäng,

3aka' ungnginsammia' ungngoatee yatoo mendahi pesändä' pano di kapampetahpa'ammua' anna malai umpakende' kamatohoang inaha yaling di kalaemua'.

4Pamatoto' loloi yato kamatohoang inaha yaling di kalaemu lambi' keboa mapia, anna malai umpasundung anna umpamatoto' kapampetahpa'ammua' lambi' dang aha la ungkakuhangngia'.

5Ponna aha tau yaling di alla'-alla'mua' ang dai nainsang aka ang la nababe ungngoloi pesändä', ya' la umpalau kakeaka'ang dai' di olona Puang Alataala, ang si mebea sibaha kamarota'ang sitonda unnä' inahanna, anna nabeai yato ang napalau.

6Ampo' mampetahpa' liu menge napalau, dai la bata-bata inahanna, aka' tau ang bata-bata inahanna sihapanne' bombang ang nabuhhu' lusau lutama pepahi.

7Aka' yato tau ang ma'derua inaha anna dai tontong pembabena dai la napemitai la untahimbo aka-aka yaho mai di Dehata.

8(1:7)

9Ingkämmua', solasohongku ang memase-mase, sipäto'koa' la masannang lolo aka' napaohko'mokoa' Puang Alataala yaho di ongeang matande.

10Anna dioa' dio to makaka, la kahsi tumokoa'. Noakoa' dio bunga-bunga la malahso tomande', aka' ponna mapana'mi allo, la ullahso lohpo lambi' dondongngi bunganna, ya' pa'da tubunne' kamalekeanna. Noa tuntone' pano di to makaka lella'ke' umpakende' katomakakaanna, pihsananna pa'da asang tomande'. Dahi pano di dioa' to makaka, la kahsimokoa' aka' dipamahempo'mingkoa' inahammu.

11(1:10)

12Kahsine' tau ang matoho ungngoloi pesändä', aka' ke patalong yaling yato di pesändä', ya' la untahimbong tanda kapataloang, dianto katuhoang ang lambi' sapano-panona, ang puha nadandi Puang Alataala pano di tau ang mangkalemui.

13Ke ahai tau nahoa pesändä' dai mala la naoatee, "Nasändä'iä' Puang Alataala." Aka' Puang Alataala dai mala nasändä'i kakarakeang, anna datoi aha la sule yaho mai pesändä' pano di hupatau.

14Ampo' simesa-mesa tau nasändä'i toboe' pampemalanna ang karake ang manse'de' umbabe kakarakeang.

15Ya' ponna patalong yato pampemalanna ang karake, ungkeboaming dosa. Pihsananna tuhtuang matamang yato dosa ungkeboaming kamateang.

16Ingkämmua' solasohongku ang kukalemui, daungngakuia' nabulitu' pihki' ang naoatee: yato pesändä' yaho mai di Puang Alataala.

17Aka' ingkänna pebea ang mapia anna sundung sule yaho mai di Puang Alataala ang umpaaha kamabayaang yaho di langi'. Dianto ang tontong lolo, dai noa kalihayo ang tirende leleng.

18Aka' pa'elo'na lambi' naängkä'ingkea' mendahi änä'-änä'na ungngolai yato bahtakara katahpa'ang, lambi' malaingkea' mendahi tau ang handang napakäyyäng yaling di alla'-alla'na pampadahinna.

19Ingkämmua' solasohongku ang kukalemui, pengkakalehai manahpaia' ungngoate pano di simesa-mesa tau pahallu si'da-si'da tau bansa' ma'pehingngi, la undakai tula'na anna datoi la maromi' keaha'.

20Aka' yato tau ang si keaha', ya' dai si maroho pembabena situhu' pa'elo'na Puang Alataala.

21Dianto anna pahallui ditibe ingkänna kakarakeang, yato ang mai'di liu yaling di kalaeta. Anna tatahimboi sibaha inaha malunä' Bahtakara Dehata ang napatitanang yaling di inahanta, aka' dianto ang ma'kuasa umpasalama'ingkea'.

22Anna pahallukoa' bansa' umpembabeing aka ang tiuki' yaling di Suha' Masero, dai bansa' supu ma'pehingngi. Aka' ke bansa'koa' supu ma'pehingngi, umpasalanduangkoa' kalaemu.

23Pano di tau ang bansa' supu umpehingngii Bahtakara Dehata ampo' dai napembabeing, dipasihapang tau ang ungkalimpängngi lindona puhanna modahammeng.

24Puhai umpahandang kalaena, le'ba'mi. Ya' nakalimpängngi siarang umba noa hupanna.

25Ampo' menna-menna bansa' umpellaya'i manahpa atohang ang setonganna, bahtu' ang dioatee Kaheba Mapia, anna dai nakalimpängngi yato ang puha napehingngii ampo' napembabe loloing, ya' la nabehe Puang Alataala yaling di ingkänna pembabena. Atohang yatoo dai aha kakuhanganna anna ma'kuasa ullahpa' hupatau yaling mai di kakuasaanna dosa.

26Ponna aha tau unsangai kalaena mesa tau ang tuhu'-tuhu'ang yaling di peada'ang, ampo' dai undakai tula'na, tau yatoo umpasalanduang kalaena, aka' labu' yato lupunna tama di kapeada'ang.

27Ponna ke ungkalemuiingke änä' biung sibaha balu bahine yaling di kamasuhsaanna, anna undakaiingkea' kalaeta andana nakärähko'ingkea' lino, dianto kapeada'ang ang masero anna dai aha kakuhanganna di hao di olona Puang Alataala Ambeta.


  Share Facebook  |  Share Twitter

 <<  Yakobus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel