Dual Panel1Ingkämmua' solasohongku, aka' to mampetahpa'koa' dai' di Puang Yesus Kristus Dehatanta ang matande, daa unse'la-se'laang tau yaling di inahammu.
2Ponna ke ahai sule tau mentama di pa'himpungammua' mesinsing bulahang anna meporeha mapia, mane sule toine' mesa to pemase-mase meporeha tahuhu,
3anna umpa'käyyängngii yato ang meporeha mapia lambi' ungngoaingnga'tee, "Ohko'ingke done inde di ongeang mapia," ampo' ungngoainne'te yato to pemase-mase, "Ke'de'o di hipe done," bahtu' ungngoaintee, "Ohko'o di hoi' inde di pengngindä'angku,"
4daraka umpasisenga'mi yaling di inahammu anna daraka umpadahimokoa' kalaemu to pambohtu kaha-kaha ang ma'pihki' karake?
5Pehingngiia', ingkämmua' solasohongku ang kukalemui! To pemase-mase yaling inde di lino napilleine' Puang Alataala mendahi to makaka yaling di kapampetahpa'ang, anna dianto sihatang ungngala taha yaling di Kapahentaanna Puang Alataala yato ang puha nadandiing pano di tau ang mangkalemui.
6Ampo' dioa' dio ungngita-ita naungkoa' dio to pemase-mase. Anna setonganna yatore' to makaka umpakauho-uhokoa' anna nahendengkoa' pano di olona to pambohtu kaha-kaha.
7Anna daraka tau yatoo ang untula' tahuhu sanga ang handang matande, ang umpolalammia' mendahi petauanna?
8Ampo' ponnatoo ke untuhu'i si'da-si'dakoa' pungngu' tannunna yato atohanna Tomarayanta, noa ang tiuki' yaling di Suha' Maserona naoatee, "Kalemuikoa' parammu hupatau noa ungkalemui kalaemu," ya' membabe mapiamokoa'too.
9Ampo' monna ke unse'la-se'laang lolokoa' tau situhu' ang landa' ungngita pano, ya' umbabekoa' dosa, anna donentoo naongei tandaang dioatee untehkaikoa' atohang.
10Menna-menna untuhu'i asang atohang ampo' ahake' mesa dai natuhu'i, diangka'ke'ne' untehkai ingkänna atohang.
11Aka' Kalaena mangngoatee, "Daa ungngindä'-indä' pa'bannetauang," Dia sia tunne' mangngoatee, "Daa umpapateangnga'." Dahi ke dakoa' ungngindä'-indä' pa'bannetauang ampo' papateangkoa' nei', ya' tontong siamokoa'te' disanga untehkai atohang.
12Dahi la umpapiaa' tula'mu sibaha pembabemu aka' la napahehsakoa' Puang Yesus situhu' atohanna ang ma'kuasa ullahpa' hupatau.
13Aka' yaling umpahehsa lino Puang Alataala, dai la ungkalemui tau ang dai pa'kalemu. Ampo' tau ang pa'kalemu la napa'daiinne' yato tahungkung pano di kalaena.
14O ingkämmua' solasohongku, akang kunanna ke ahai tau mangngoatee, "Kodi' mesa to mampetahpa'," ampo' dai aha tandaang pembabe mapia nababe? Malaraka napasalama' kapampetahpa'ang ang noa?
15Ponna hapang aha mesa solata, muaneraka bahtu' bahineraka, ang dai aha porehana anna dai aha andeanna,
16akang kunanna ke ahakoa' ma'kara ungngoaintee, "Paela'i! Pekaya' makambangngo anna pebohoii," ampo' dai aha umbea yato ang napahallu pano di kalaena?
17Noa tuntone' tanda di kapampetahpa'ang: ke dai dipasitonda pembabe mapia, ya' setonganna yato kapampetahpa'ang dai aha kunanna.
18Ponna aha toe' tau mangngoatee, "Aha tau ang supung unghannuang kapampetahpa'ang anna ahake' tau senga' ang supung unghannuang pembabe mapia." Ya' la kutimba'i kuoatee, "Sändä' paitaikä' kapampetahpa'ammu dai sitonda pembabe, anna la kupaitaio dio kapampetahpa'angku sitonda pembabeku ang mampatandaang."
19Umpetahpa'a' ungngoatee supung mesa Puang Alataala, i? Mapia toe' yatoo! Ampo' ingkänna setang napetahpa' toete' noa yatoo, anna sika lalla'i mahea'.
20Oa' to maho, mangki'dakakoa'to la dipaitai dioate kapampetahpa'ang ang dai sitonda pembabe dai aha kunanna?
21Daraka Abraham ang taponene nasangai Puang Alataala to maroho aka' pembabena tempona anna umpenombaing Ishak änä'na yaho di pantunuang penombaang?
22Dahi maleso diita ahana inang pahallu dipasitonda kapampetahpa'ang anna pembabe. Anna yaling di pembabe naongei sundung kapampetahpa'ang.
23Ya' sundummitoo yato aka ang puha tiuki' yaling di Bahtakara Dehata naoatee, "Abraham nasangai Puang Alataala 'to maroho' aka' mampetahpa'." Dianto suhunna anna disangaii Abraham 'to napakamaya Puang Alataala.'
24Dahi malesongnga' ungnginsang ungngoatee hupatau disangai 'to maroho' aka' pembabena, tadia aka' kapampetahpa'anna supu.
25Noa sia tuntone' ta Rahab, dolunna mesa bahine pahsundala', ampo' nasangai toe' to maroho Puang Alataala aka' undului yato ang nasuo ta Yosua anna nabahai tama di dasanna, mane napaitaii lalang senga' ungngalai kalaena.
26Aka' ponna bätäng punti supu, dai aha sungnga', ya' mateetee'; noa sia tuntone' kapampetahpa'ang ke dai sitonda pembabe, ya' mateetee', bahtu' dai kekuna.