Dual Panel1Umba nakasulei kasiba'diang anna kasikallaang yaling di alla'-alla'mua'? Daraka yatoo sule yaling mai di inaha manahsummua' ang sitolla' yaling di kalaemu?
2Mailukoa' pano di aka-aka ampo' dai mala ullambi', ya' umpolalammia' papateang. Anna ma'sihiatekoa' ampo' dasiang aha ullambi' pampemalammua', diang nasuhung umpolalang siteläng-teläng anna sikalla-kalla. Ampo' nasuhung anna dakoa' mala ullolongang aka-aka, aka' dakoa' aha si malau dai' di Puang Alataala yaling di sambayang.
3Bahtu' malau siamokoa' ampo' dai mapia lalang inahammu lambi' dasiangnga' aha ullolongang, aka' yato palaummua' pemalakoa' supu umpakekuna situhu' pampemalammu.
4Oa' ingkämmu tau ang dai mesa inahammu dai' di Puang Alataala, darakaa' dio ungnginsang ungngoatee tau ang untuhu'i lino sipa'bali Puang Alataala? Dahi menna-menna untuhu'i lino sipa'baline' Puang Alataala.
5Pahallua' ungnginsang ungngoatee ahaete' suhunna anna diuki'i bahtakara masero naoatee, "Yato inaha ang yaling di kalaeta, ang napatamaingkea' Puang Alataala, mai'di pampemalanna ang matoho si'da-si'da."
6Ampo' mana' pa'kalemunna ang nabeaingkea' matoho puhane' andana yato pampemalantaa'. Dianto anna naoantee, "Puang Alataala umpa'bali to malängkä' inaha, ampo' umbehene' to mahempo' inaha."
7Dahi malimuntu'koa' di hao di olona Puang Alataala. Balii Pongkahana setang anna la le'ba' nakahaoikoa'.
8Pengkarungku'koa' pano di Puang Alataala anna narungku'i toukoa' nei'. Oa' ingkämmu to madosa, bahahsiia' teyyemu, anna dioa' ingkämmu ang ma'derua inaha, pamaseroii inahammu.
9Sohsokoa' babemu anna dusengkoa' anna manahoi inahammu. Daa ungkahsia' anna metaha, ampo' la dumusengkoa' anna manaho inaha.
10Pamahempo'ia' inahammu di hao di olona Dehata anna la napakeangka'koa'.
11Oa' ingkämmu solasohongku, daa ungkekara-kara bu'bu' pano di solamu! Aka' menna-menna untula'-tula' karake solana anna unghohto' tomande' solana, tau yatoo umpasala atohang. Ponna umpasalakoa' atohang, tadiakoa' tau ang untuhu' pahenta ampo' tau ang unghohto' karake Bahtakara Dehata.
12Aka' supung Puang Alataala umbabe atohang anna Dia supu To Pampahehsa. Dia tunto ang untokei kakuasaang mepasalama' anna metallangngi. Dahi dioa' dio dakoa' sipäto' la umpahehsa tomande' solamu.
13Pehingngiia' inde tula'ku pano di dioa' ang si mangngoatee, "Allo dinoa bahtu' marondong la panoang yato di bohto mahoa' anna la di haoang sahtaung ma'bulele umpeäng kauntungang."
14Si umpanoaa' yatoo moinnakato dake' ungnginsang yato aka ang la dahi marondong. Pihki'ke'a' umba noa katuhoammu. Aka' inde katuhoammu sihapang sahobo ang tandaang sämpäi' ampo' dai masae anna pa'da tomande'mi.
15Setonganna la si ungngoarea'ne'tee anna mane, "Ponna naelo' i Dehata, ya' malaang tuho, anna la mala tukang ungkähäng ma'hupa-hupa kähängang."
16Ampo' dinoa unsanga-sangarakoa' dio kalaemu aka' kamalängkä'ang inahammu anna moi ke la dara babe noa yatoo karake.
17Dahi pano di tau ang ungnginsang pembabe mapia ampo' dai naaku napembabeing, tau yatoo madosa.