Dual Panel1Tuntut-lah sama kaseh itu; ttapi chari juga dngan rajin sgala kurnia yang rohani, terlbeh skali spaya kamu boleh bernabuat.
2Kerna orang yang berchakap dngan satu bhasa, dia itu bukan-nya berchakap k-pada manusia, ttapi k-pada Allah; kerna satu orang pun ta'mngerti; ttapi dalam roh-nya dia chakapkan ruhsia.
3Ttapi orang yang bernabuat pula, dia chakap k-pada manusia perkata'an yang boleh tgohkan, dan nasihatkan, dan hiburkan orang punya hati.
4Orang yang berchakap dngan satu bhasa, dia tgohkan diri-nya sndiri; ttapi orang yang bernabuat pula, dia tgohkan satu eklisia skali.
5Sahya suka juga jikalau smoa kamu ini boleh berchakap dngan bhasa-bhasa, ttapi lbeh lagi jikalau kamu boleh bernabuat: lbeh bsar orang yang bernabuat deri-pada orang yang berchakap dngan bhasa-bhasa, mlainkan kalau dia artikan, spaya eklisia itu boleh di-tgohkan.
6Jadi itu, hei sudara-sudara, kalau sahya datang k-pada kamu dngan berchakap bhasa-bhasa, apa-kah fa'idah sahya kasi sama kamu, jikalau sahya t'ada chakap sama kamu mau kasi knyata'an atau pngtahuan, atau nabuat, atau pngajaran?
7Apa-apa yang berbunyi, jikalau t'ada nyawa skali pun, baik suling atau kchapi, jikalau t'ada lain-lain lagu-nya, apa macham orang boleh dapat tahu 'ntah apa-kah lagu suling itu, atau lagu kchapi itu?
8Kerna jikalau trompet itu kasi lagu yang ta'tntu punya, siapa pula nanti siap mau berprang?
9Bgitu juga kamu ini pun, jikalau dngan kamu punya lidah kamu t'ada bunyikan perkata'an yang trang-trang, apa macham pula orang boleh tahu 'ntah apa-kah yang kamu chakapkan? kerna kamu ada berchakap k-pada angin.
10Barangkali ada s-kian s-kian banyak suara dalam dunia ini, dan t'ada satu pun yang t'ada dia punya m'ana?
11Sbab itu kalau sahya ta'tahu itu suara punya arti, sahya nanti jadi satu orang dagang k-pada itu orang yang berchakap, dan itu orang yang berchakap pun nanti jadi satu orang dagang k-pada sahya.
12Bgitu-lah kamu ini pun, sdang kamu rajin chari sgala kurnia yang rohani, biar-lah spaya tgohkan eklisia kamu choba bertambah-tambah.
13Sbab itu biar-lah orang yang berchakap dngan satu bhasa minta do'a spaya dia boleh artikan.
14Kerna jikalau sahya minta do'a dngan satu bhasa, sahya punya roh ada juga minta do'a, ttapi sahya punya pngertian t'ada kasi untong.
15Jadi apa-kah hal-nya? sahya mau minta do'a dngan sahya punya roh, dan sahya mau minta do'a dngan sahya punya pngertian pun: sahya mau mnyanyi dngan sahya punya roh, dan sahya mau mnyanyi dngan sahya punya pngertian pun.
16Jikalau tidak, bagimana pula orang yang pangkat orang preman boleh bilang 'Amin' atas angkau punya shukor, jikalau angkau mnguchap shukor chuma dngan roh saja, sdang dia ta'tahu 'ntah apa-kah angkau kata?
17Kerna bagus juga angkau punya shukor, ttapi itu lain orang pula t'ada di-tgohkan.
18Sahya mnguchap shukor k-pada Allah, yang sahya ini berchakap dngan bhasa-bhasa lbeh deri-pada kamu smoa:
19ttapi jikalau dalam eklisia, sahya lbeh suka katakan lima perkata'an dngan sahya punya pngertian, spaya sahya boleh ajar lain orang, deri-pada sahya katakan s-laksa perkata'an dngan satu bhasa.
20Hei sudara-sudara, jangan-lah kamu mnjadi budak-budak dalam kamu punya ingatan: ttapi dalam kjahatan baik kamu jadi anak-anak kchil, ttapi dalam kamu punya ingatan baik kamu jadi orang yang sudah chukop umor.
21Ada tersurat dalam hukum-taurit, "Oleh orang-orang lain-lain bhasa, dan oleh mulut orang dagang, sahya nanti berchakap k-pada ini bangsa; dan bgini pun t'ada nanti dia-orang dngar juga, ini kata Tuhan."
22Sbab itu, sgala bhasa itu mnjadi satu tanda, bukan-nya k-pada orang yang perchaya, ttapi k-pada orang yang ta'perchaya: ttapi nabuat pula jadi tanda bukan k-pada orang yang ta'perchaya, ttapi k-pada orang yang ada perchaya.
23Jadi itu, katakan bila s-gnap eklisia sudah berhimpon bersama-sama, dan sklian-nya berchakap dngan bhasa-bhasa, dan masok pula orang preman atau orang yang ta'perchaya, bukan-kah itu orang smoa nanti bilangkan kamu ini gila?
24Ttapi jikalau sklian-nya bernabuat, dan masok pula satu orang yang ta'perchaya atau orang preman, dia kna kalot oleh sklian-nya, dia kna preksa oleh sklian-nya;
25sgala hati-nya punya ruhsia pun di-nyatakan; dan bgini dia nanti jatoh di atas muka-nya dan smbah Allah, dngan nyatakan yang btul-lah Allah ada di antara kamu smoa.
26Jadi apa-kah hal-nya, hei sudara-sudara? Bila kamu berhimpon sama-sama, masing-masing kamu ada nyanyian-nya, atau pngajaran-nya, atau knyata'an-nya, atau bhasa-nya, atau pngertian bhasa. Biar-lah smoa perkara di-buat spaya boleh tgohkan hati.
27Jikalau ada satu orang berchakap dngan satu bhasa, biar-lah dua-orang saja atau s-lbeh-lbeh-nya tiga orang, ia'itu habis satu satu; dan biar satu orang artikan:
28ttapi kalau tidak ada orang yang tahu artikan, biar dia diam saja dalam eklisia: dan biar dia berchakap k-pada diri-nya sndiri, dan k-pada Allah.
29Dan orang yang bernabuat, biar dua tiga orang chakap, dan biar lain-lain orang timbangkan.
30Ttapi jikalau ada apa-apa di-nyatakan k-pada orang lain yang dudok di situ, biar yang pertama itu diam saja.
31Kerna kamu smoa boleh bernabuat habis satu satu, spaya smoa orang boleh dapat pngajaran dan dapat pnghiburan.
32Nabi-nabi punya roh ada tundok sama nabi-nabi;
33kerna Allah itu bukan-nya Allah kachau-mngachau, ttapi Allah sjahtra; sperti di dalam sgala eklisia orang kudus.
34Dan biar-lah prempuan-prempuan diam saja dalam sgala eklisia kerna t'ada izin dia-orang boleh berchakap, ttapi biar-lah dia turut prentah, sama sperti hukum-taurit pun ada kata.
35Dan jikalau dia-orang mau blajar apa-apa, biar-lah dia tanya laki-nya sndiri di rumah: kerna itu malu punya perkara kalau satu prempuan berchakap di dalam eklisia.
36'Ntah deri-pada kamu-kah perkata'an Allah sudah terkluar? atau chuma k-pada kamu-kah saja sudah sampai?
37Jikalau ada satu orang fikir diri-nya satu nabi, atau orang rohani, biar-lah dia ambil tahu perkara-perkara yang sahya ada tuliskan k-pada kamu, ia'itu yang ini smoa Tuhan punya psanan.
38Ttapi jikalau ada orang ta'tahu, biar-lah dia ta'tahu.
39Sbab itu, hei sudara-sudara, biar-lah kamu rajin chari nabuat, dan jangan larangkan orang chakap dngan bhasa-bhasa.
40Ttapi biar-lah smoa perkara jadi dngan snonoh dan dngan aturan.