Dual Panel1Sunggoh-lah ada khabar yang di antara kamu ada perchabolan, dan satu macham punya perchabolan yang tidak ada di antara orang bangsa-asing skali pun, ia'itu satu orang ambil bapa-nya punya bini.
2Dan ta'kata kamu susah-hati, spaya orang yang buat itu kerja boleh kna buang deri antara kamu, balek kamu ada mgahkan diri pula.
3Dan sahya ini, sunggoh pun sahya punya badan ada jauh, ttapi sahya punya roh ada sama-sama kamu, sudah pun sahya hukumkan itu orang yang sudah buat ini perkara bgitu, sama sperti sahya ada sama-sama kamu,
4ia'itu dalam nama Tuhan kita Isa, bila kamu smoa berhimpon sama-sama, dan roh sahya pun, dngan kuasa Tuhan kita Isa,
5mau srahkan itu macham punya orang k-pada Setan, spaya binasakan tabi'at dunia, dan spaya roh-nya boleh slamat tempo hari Tuhan Isa.
6Kamu punya kmgahan itu t'ada baik. Bukan-kah kamu tahu yang sikit punya ragi boleh ragikan s-gumpal punya tpong?
7Buangkan-lah ragi yang lama itu, spaya kamu boleh jadi satu gumpal yang bharu, ia'itu sperti kamu sdia t'ada berragi. Kerna kita punya Paska sudah di-smblehkan, ia'itu Almaseh:
8sbab itu biar-lah kita buat hari-bsar, bukan-nya dngan ragi yang lama, dan bukan-nya dngan ragi dosa dan kjahatan, ttapi dngan hal ta'berragi, ia'itu dngan tulus hati dan kbtulan.
9Dalam sahya punya surat sahya sudah tulis k-pada kamu jangan champur sama orang chabol;
10arti-nya bukan jangan champur skali-kali sama ini dunia punya orang chabol, atau sama orang yang tma'a, atau sama prampas, atau sama orang yang smbahyang datok; kerna kalau bgitu kamu msti kluar deri ini dunia:
11ttapi yang s-btul-nya sahya sudah tulis k-pada kamu jangan champur sama barang-siapa yang ada nama jadi sudara, kalau dia orang chabol, atau orang tma'a, atau smbahyang datok, atau pmaki, atau pmabok, atau prampas; sama itu macham punya orang jangan kamu makan pun.
12Kerna apa-kah sahya terkna fasal hukuman orang yang di luar? Bukan-kah kamu punya hal mau hukumkan orang yang dalam eklisia?
13ttapi orang yang di luar Allah yang hukumkan. Baik-lah kamu buangkan itu orang jahat kluar deri antara kamu smoa.