Alkitab Mobile SABDA
[VER] : [BABA]     [PL]  [PB] 
 <<  1 Petrus 3 >> 

1Bgitu-lah juga, hei kamu yang jadi bini, tundok-lah k-pada kamu sndiri punya laki; spaya jikalau ada orang ta'mau turut perkata'an itu, ttapi dia-orang boleh kna pujok deri sbab bini-nya punya klakuan, dngan ta'usah satu patah pun,

2bila dia-orang tengok kamu punya klakuan yang suchi dan yang champur dngan takot.

3Dan dia-orang punya perriasan jangan-lah jadi perriasan yang di luar itu, ia'itu slampitan rambot, pakai barang-barang mas, atau pakai macham-macham kain baju;

4ttapi biar-lah perriasan-nya jadi diri-nya yang tersmbunyi, ia'itu hati-nya, dngan perriasan yang ta'boleh binasa, sperti prangai yang lmah-lmbot dan diam-diam, yang banyak herga-nya di dpan Allah.

5Kerna dhulu-kala bgini-lah prempuan-prempuan kudus yang harap sama Allah sudah riaskan diri-nya, dngan tundok k-pada laki-nya sndiri:

6sperti Sarah sudah turut prentah Ibrahim, dan triak dia "tuan:" dan kamu ini dia-lah punya anak-chuchu, kalau kamu buat baik, dan t'ada di-kjotkan oleh baik apa ktakotan pun.

7Dan kamu yang jadi laki pun bgitu juga, biar-lah kamu tinggal sama kamu punya bini dngan bijaksana, dan kasi hormat k-pada bini, sbab dia prempuan yang lbeh lmah, dan sbab kamu sama-sama dapat kurnia Allah, ia'itu hidop, mnjadi psaka; spaya jangan kamu punya do'a di-tgahkan.

8Pnghabisan skali, biar-lah kamu sklian satu hati, taroh sayang satu sama lain, kaseh-mngaseh sperti sudara, lmah-lmbot dan rndah-hati pun:

9dan jangan kamu balas jahat sama jahat, atau maki balas maki; ttapi balek kasi berkat; kerna kamu sudah di-panggil sbab ini, ia'itu spaya kamu dapat berkat jadi psaka.

10Kerna, "Orang yang mau sayang hidop, Dan mau jumpa hari yang baik. Biar dia tahankan lidah-nya deri-pada jahat, Dan bibir mulut-nya deri-pada chakap tipu-daya:

11Dan biar dia balek deri-pada yang jahat, dan buat baik; Biar dia chari perdamaian, dan kjar itu baik-baik.

12Kerna Tuhan punya mata ada tengok orang yang bnar, Dan kuping-nya dngar perminta'an-nya: Ttapi muka Tuhan mnntang orang yang buat jahat."

13Dan siapa-kah yang nanti buat chlaka sama kamu, jikalau kamu rajin buat baik?

14Ttapi jikalau kamu kna susah pun deri sbab kbnaran, berkat-lah kamu: dan jangan takot dia-orang punya ktakotan, dan jangan kamu jadi terkachau;

15ttapi kuduskan-lah Almaseh jadi Tuhan dalam kamu punya hati: slalu sdia kasi jawab k-pada tiap-tiap orang yang tanya apa sbab itu pngharapan yang kamu ada, ttapi dngan lmah-lmbot dan dngan takot:

16dan biar-lah puteh hati kamu; spaya dalam hal orang chakap jahat fasal kamu, itu orang smoa boleh kna malu yang maki kamu punya klakuan baik yang dalam Almaseh.

17Kerna jikalau bgitu-lah kahandak Allah punya mau, lbeh baik kamu kna susah sbab buat baik, deri-pada kna susah sbab buat jahat.

18Kerna Almaseh pun sudah satu kali saja kna susah kerna dosa-dosa, satu orang yang bnar ganti orang-orang yang t'ada bnar, spaya dia boleh bawa kita k-pada Allah; badan-nya di-matikan juga, ttapi roh-nya di-hidopkan;

19dan dalam ini hal-lah dia sudah pergi ajar sgala roh di dalam jel,

20yang dhulu derhaka ktika Allah punya panjang-hati ada nantikan tempo jman Noh, sambil bahtra itu lagi di-lngkapkan, yang di dalam-nya ada sdikit orang, ia'itu lapan jiwa smoa-nya, sudah di-slamatkan oleh ayer:

21dan ayer itu dngan satu chontoh skarang ada slamatkan kamu juga, ia'itu baptis (bukan dalam hal badan kamu punya kotor hilang, ttapi dalam hal kamu tuntut Allah dngan hati puteh), oleh kbangkitan Isa Almaseh;

22yang sudah naik shorga, dan ada dudok di sblah kanan Allah: dngan sgala mla'ikat dan sgala kuasa dan sgala prentah tundok k-pada dia.


  Share Facebook  |  Share Twitter

 <<  1 Petrus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran