Alkitab Mobile SABDA
[VER] : [BABA]     [PL]  [PB] 
 <<  1 Yohanes 3 >> 

1Tengok-lah apa macham punya kaseh Bapa sudah kurniakan k-pada kita, sampaikan kita di-sbot anak-anak Allah: dan ini-lah kita punya hal. Ini-lah sbab-nya ini dunia t'ada knal sama kita, ia'itu sbab dia-orang ta'knal sama dia.

2Hei sgala kkaseh, skarang juga kita anak-anak Allah, dan blum lagi di-nyatakan 'ntah apa-kah hal kita kmdian. Kita tahu ini, ia'itu kalau dia di-nyatakan, kita nanti jadi sperti dia juga: kerna kita nanti tengok sama dia s-bagimana dia ada.

3Dan tiap-tiap orang yang ada taroh ini harap atas dia, suchikan diri-nya sndiri, sperti dia pun ada suchi.

4Tiap-tiap orang yang buat dosa, dia pun langgar hukum: dan dosa ia'itu langgar hukum.

5Dan kamu tahu yang dia-lah sudah di-nyatakan spaya hilangkan dosa; dan dalam dia tidak ada dosa.

6Barang-siapa yang tinggal dalam dia, t'ada buat dosa: barang-siapa yang buat dosa blum tengok dia, dan blum knal sama dia.

7Hei anak-anak kchil, jangan satu orang pun ssatkan sama kamu: orang yang buat kbnaran, dia-lah bnar, sperti Almaseh pun ada bnar:

8orang yang buat dosa asal-nya deri-pada iblis; kerna iblis buat dosa deri mula-mula. Ini-lah sbab Anak Allah sudah di-nyatakan, ia'itu spaya dia boleh binasakan iblis punya kerja.

9Barang-siapa yang di-beranakkan deri-pada Allah t'ada buat dosa, sbab bneh Allah ada tinggal dalam dia: dan dia ta'boleh buat dosa, sbab dia sudah di-peranakkan deri-pada Allah.

10Bgini-lah jadi nyata anak-anak Allah dan anak-anak iblis pun: barang-siapa yang t'ada buat kbnaran, dia bukan deri-pada Allah, bgitu juga orang yang t'ada kaseh sama sudara-nya.

11Kerna ini-lah itu khabar yang kamu sudah dngar deri mula-mula, ia'itu kaseh-lah satu sama lain:

12bukan sperti Kabil, yang deri-pada si jahat itu, dan sudah bunoh sudara-nya. Dan apa sbab dia sudah bunoh? Ia'itu sbab dia punya perbuatan jahat, dan sudara-nya punya bnar.

13Hei sudara-sudara, jangan jadi hairan jikalau dunia ini bnchi sama kamu.

14Kita ini tahu yang kita sudah pindah deri-pada mati k-pada hidop, kerna kita ada kaseh sudara-sudara itu. Orang yang t'ada kaseh itu lagi tinggal dalam mati.

15Barang-siapa yang bnchi sudara-nya itu satu pmbunoh: dan kamu tahu yang t'ada satu pmbunoh pun ada hidop yang kkal tinggal dalam diri-nya.

16Kita sudah tahu kaseh dngan ini, ia'itu sbab Almaseh sudah srahkan nyawa-nya kerna kita: dan kita ini pun patut srahkan nyawa kerna sudara-sudara itu.

17Ttapi barang-siapa yang ada ini dunia punya herta, dan tengok sudara-nya ada terkurang, ttapi jauhkan kmurahan hati-nya deri-pada dia, mana boleh kaseh Allah tinggal dalam-nya?

18Hei anak-anak kchil, jangan-lah kita tunjokkan kaseh dngan perkata'an, atau dngan mulut; ttapi dngan perbuatan dan kbtulan.

19Dngan ini hal kita boleh tahu yang kita deri-pada kbtulan itu, dan boleh tgohkan hati kita di dpan dia,

20jikalau ada apa-apa perkara yang hati kita salahkan kita; kerna Allah lbeh bsar deri-pada kita punya hati, dan dia tahu smoa perkara.

21Hei sgala kkaseh, jikalau hati kita t'ada salahkan kita, tntu-lah kita ada brani-hati dpan Allah;

22dan apa-apa kita minta, kita dapat deri-pada dia, sbab kita ada simpan dia punya hukum-hukum, dan sbab kita buat apa-apa yang berknan di dpan dia.

23Dan ini-lah hukum-nya, ia'itu kita patut perchaya nama Anak-nya Isa Almaseh, dan kaseh satu sama lain, sperti hukum yang dia sudah psan kita.

24Dan orang yang simpan dia punya hukum-hukum itu tinggal dalam dia, dan dia pun tinggal dalam itu orang. Dan kita boleh tahu yang dia tinggal dalam kita dngan ini, ia'itu oleh Roh yang dia sudah kasi sama kita.


  Share Facebook  |  Share Twitter

 <<  1 Yohanes 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran