Alkitab Mobile SABDA
[VER] : [BABA]     [PL]  [PB] 
 <<  2 Petrus 1 >> 

1Deri-pada Simon Petrus, hamba dan rasul Isa Almaseh, k-pada orang-orang yang sudah trima satu perchaya yang sama indah sperti kita punya, dngan kbnaran kita punya Allah dan Juru-slamat, ia'itu Isa Almaseh:

2biar-lah bertambah-tambah k-pada kamu anugrah dan sjahtra dalam hal kamu tahu Allah dan Tuhan kita Isa;

3sdang dia punya kuasa ktuhanan sudah kasi sama kita sgala perkara yang berguna kerna hidop dan kbaktian, sbab kamu sudah tahu dia yang sudah panggil kita dngan kmulia'an dan kbaikan-nya sndiri;

4dan oleh itu smoa-lah, dia sudah kurniakan k-pada kita dia punya perjanjian yang indah-indah dan yang sangat bsar itu, spaya oleh ini perjanjian smoa kamu boleh jadi orang yang ada bhagian dalam tabi'at ktuhanan-nya, sdang kamu sudah lpas deri-pada hal kbinasa'an yang ada dalam dunia deri sbab k'inginan.

5Dan itu sbab juga, dngan s-gnap rajin, dalam kamu punya perchaya tunjokkan-lah kbaikan; dan dalam kbaikan pngtahuan;

6dan dalam pngtahuan mnahan diri; dan dalam mnahan diri sabar-hati; dan dalam sabar-hati kbaktian;

7dan dalam kbaktian kaseh k-pada sudara-sudara; dan dalam kaseh k-pada sudara-sudara itu kaseh.

8Kerna jikalau itu smoa jadi kamu punya dan bertambah-tambah, itu nanti tahankan kamu jadi malas atau ta'berbuah dalam pngtahuan deri-hal Tuhan kita Isa Almaseh.

9Kerna orang yang ada kurang dalam ini smoa, dia itu ada buta dan mata kabur, dan sudah lupa yang dia sudah di-suchikan deri-pada dosa-dosa-nya yang lama.

10Jadi itu, baik-lah kamu makin rajin bikin tntu kamu punya panggilan dan pilehan: kerna jikalau kamu buat ini smoa, ta'pernah-lah kamu nanti terantok:

11kerna bgini bharu-lah kamu nanti dapat masok dngan banyak kkaya'an dalam Tuhan dan Juru-slamat kita Isa Almaseh punya kraja'an yang kkal.

12Sbab itu sahya slalu ada sdia mau ingatkan kamu deri-hal ini smoa, sunggoh pun kamu sudah tahu, dan kamu sudah tgoh dalam kbtulan itu yang ada sama kamu.

13Dan s-lagi sahya ada dalam khemah ini, sahya fikir patut juga sahya bangunkan kamu dngan ingatkan;

14sbab sahya tahu yang sahya punya khemah ini chpat nanti hilang, sperti Tuhan kita Isa Almaseh sudah tunjokkan sama sahya.

15Dan sahya nanti usahakan diri sahya spaya pada tiap-tiap tempo, kmdian deri-pada sahya punya kmatian, kamu boleh ingat ini smoa.

16Kerna kita sudah kasi tahu deri-hal kuasa dan deri-hal kdatangan Tuhan kita Isa Almaseh, bukan-nya dngan chrita yang bukan-bukan yang orang sudah karangkan dngan cherdek-nya, ttapi kita sndiri punya mata sudah tengok dia punya kbsaran.

17Kerna dia sudah trima hormat dan kmulia'an deri-pada Allah Bapa, tempo satu suara yang bgini sudah datang k-pada dia deri-pada kmulia'an yang maha-bsar itu, "Ini-lah Anak sahya, yang sahya kaseh, dia-lah yang berknan sama sahya":

18dan ini suara kita sndiri sudah dngar terkluar deri langit, waktu kita ada sama-sama dia di gunong yang kudus itu.

19Dan kita ada perkata'an nabuat, lbeh tgoh; dan baik juga kamu perhatikan itu sperti sama plita yang berchahya dalam tmpat glap, sampai waktu hari siang, dan bintang timor kluar di dalam hati kamu:

20sdang pertama skali kamu tahu ini perkara, ia'itu satu nabuat pun dalam kitab itu t'ada datang deri-pada pngertian orang sndiri.

21Kerna t'ada pernah satu nabuat pun turun dngan kahandak manusia: ttapi orang punya perkata'an kluar deri-pada Allah, sbab di-grakkan oleh Roh Alkudus.


  Share Facebook  |  Share Twitter

 <<  2 Petrus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel