Alkitab Mobile SABDA
[VER] : [BABA]     [PL]  [PB] 
 <<  2 Timotius 4 >> 

1Di dpan Allah dan Isa Almaseh, yang nanti mnjadi hakim smoa orang hidop dan orang mati pun, dan dmi dia punya kdatangan, dan dia punya kraja'an sahya psan;

2khabarkan-lah perkata'an itu; jadi bersiap, baik ada smpat, baik t'ada smpat; kalotkan orang, tgurkan orang, nasihatkan orang, dngan s-chukop panjang hati dan dngan pngajaran.

3Kerna waktu-nya nanti datang bila orang ta'mau tahan sama pngajaran yang baik; ttapi sbab ada kuping gatal, dia-orang nanti timbonkan guru-guru kerna diri-nya turut sperti dia-orang sndiri punya k'inginan;

4dan dia-orang nanti palingkan dia-orang punya kuping deri-pada kbtulan itu, dan mnyempang k-pada chrita yang bukan-bukan.

5Ttapi baik-lah angkau ingat-ingat dalam smoa perkara, tahan susah, buat guru-injil punya kerja, chukopkan angkau punya playanan.

6Kerna darah sahya sudah sdia di-churahkan, dan sahya punya tempo mau lpas sudah dkat.

7Sahya sudah lawan dalam lawanan yang baik, sahya sudah habiskan perlumba'an itu, sahya sudah pliharakan iman itu:

8deri ini waktu makota kbnaran ada tersimpan kerna sahya, yang Tuhan, ia'itu hakim yang bsar, nanti kasi sama sahya itu hari: dan bukan sama sahya saja, ttapi sama smoa orang yang sudah chinta dia punya kdatangan.

9Usahakan diri datang k-pada sahya dngan sgra:

10kerna Demas sudah tinggalkan sahya, sbab dia sudah chinta jman ini, dan dia sudah pergi Tisalonika; Kreskens pergi Galatiah, dan Titus pergi Dalmatiah.

11Lukas saja yang ada sama-sama sahya. Ambil Markus dan bawa dia sama-sama angkau: kerna dia ada berguna sama sahya dalam playanan.

12Ttapi Tukhikus sahya sudah hantar pergi Ifisus.

13Itu baju luar yang sahya sudah tinggalkan di Troas di rumah Karpus, bawa bila angkau datang, dan itu kitab-kitab pun, terlbeh skali smoa itu kertas kulit.

14Iskandar, tukang tmbaga itu, ada buat banyak chlaka sama sahya: Tuhan nanti balaskan sama dia sperti dia punya perbuatan:

15jaga-lah angkau punya diri deri-pada itu orang; sbab dia sudah mlawan kita punya perkata'an terlalu banyak.

16Bila sahya mula-mula jawab dalam majlis bichara, satu orang pun t'ada sblah sahya, ttapi smoa tinggalkan sahya: jangan-lah ini perkara tertanggong atas dia-orang.

17Ttapi Tuhan sudah berdiri sblah sahya, dan kuatkan sahya; spaya oleh sahya khabar itu boleh di-mashhurkan dngan s-chukop-nya, dan spaya smoa orang bangsa-asing boleh dapat dngar: dan sahya sudah di-lpaskan deri mulut singa.

18Tuhan nanti lpaskan sahya deri tiap-tiap kerja jahat, dan nanti slamatkan sahya sampai masok kraja'an-nya yang di shorga: mulia k-pada Tuhan sampai s-lama-lama-nya. Amin.

19Kasi tabek sama Priska dan Akula, dan sama isi-rumah Onesiforus.

20Irastus sudah tinggal di Korintus; ttapi Trofimus sahya sudah tinggalkan dalam sakit di Miletus.

21Usahakan diri datang s-blum musim sjok. Yubulus, dan Pudens, dan Linus, dan Klaudiah, dan smoa sudara-sudara kirim tabek k-pada angkau.

22Biar-lah Tuhan bersama-sama angkau punya roh. Biar-lah anugrah-nya bersama-sama kamu sklian.


  Share Facebook  |  Share Twitter

 <<  2 Timotius 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran