Alkitab Mobile SABDA
[VER] : [BABA]     [PL]  [PB] 
 <<  Efesus 4 >> 

1Sbab itu sahya ini, yang kna pasong deri sbab Tuhan, minta kamu bawa diri kamu s-padan dngan kamu punya panggilan,

2dngan s-habis-habis rndah hati dan lmah-lmbot, dan dngan panjang-hati sabarkan satu sama lain dalam kaseh;

3dan usahakan diri kamu spaya kamu tinggal satu dalam Roh dngan perhubongan sjahtra.

4Satu saja badan itu, dan satu saja Roh itu, sama sperti kamu ini sudah di-panggilkan dngan satu saja harap yang datang deri kamu punya panggilan;

5satu Tuhan, satu perchaya, satu baptisan,

6Allah, ia'itu kita sklian punya Bapa pun satu juga, dia-lah atas sklian, dan oleh sklian, dan dalam sklian.

7Ttapi k-pada masing-masing kita sudah di-bri anugrah s-kdar Almaseh punya pmbrian.

8Itu sbab-lah dia kata, "Bila dia naik di atas, dia tawankan sgala tawanan. Dan dia kasi bbrapa pmbrian k-pada manusia.

9(Itu perkata'an "Dia naik," apa-kah arti-nya? kalau tidak yang dia sudah turun di tmpat yang di bawah skali di bumi?

10Dia yang turun sama juga dia yang sudah naik lbeh tinggi deri-pada sgala langit, spaya dia boleh pnohkan smoa perkara).

11Dan yang ada dia kasi jadi rasul-rasul; yang ada nabi-nabi; yang ada guru-injil; yang ada pula gombala dan pngajar;

12spaya boleh smpurnakan orang-orang kudus, mau buat kerja playanan, dan mau tgohkan badan Almaseh itu:

13sampai kita smoa dapat mnjadi satu dalam perchaya dan dalam pngtahuan sama Anak Allah, dan mnjadi satu orang yang sudah sampai umor, dan bertambah bsar sperti tuladan Almaseh punya chukop bsar:

14spaya jangan lagi kita mnjadi anak-anak, yang kna pukol ombak, dan kna tiop sana-sini oleh angin pngajaran orang, dngan tipu-daya manusia, dngan cherdek-nya yang mmbawa k-pada sgala akal ssat;

15ttapi sdang kita buat bnar dngan kaseh, kita boleh bertambah-tambah dalam smoa perkara, berhubong sama dia yang mnjadi kpala, ia'itu Almaseh;

16dan deri-pada dia-lah juga s-gnap badan itu di-rapatkan dan di-hubongkan sama-sama oleh tiap-tiap sndi dalam klngkapan itu, turut sperti masing-masing anggota punya kerja dngan s-kdar-nya, dan bharu-lah boleh kasi badan itu bertambah-tambah sampai tgohkan diri-nya sndiri dalam kaseh.

17Sbab itu sahya punya kata, dan sahya punya saksi dalam Tuhan bgini-lah, ia'itu jangan-lah lagi kamu bawa diri sperti orang bangsa-asing pun bawa diri-nya, mnurut ingatan-nya yang sia-sia itu,

18dan pngertian-nya sudah di-glapkan, dan dia-orang di-jauhkan deri-pada hidop yang datang deri-pada Allah sbab kbodohan yang ada sama dia-orang, deri sbab hati-nya punya kras;

19dia-orang ini, sbab hilang rasa hati-nya, sudah srahkan diri-nya k-pada perchabolan, mau buat sgala kotoran dngan glojoh-nya.

20Ttapi kamu ini punya plajaran deri-pada Almaseh bukan-nya bgitu,

21ia'itu kalau kamu sudah dngar sama dia, dan sudah di-ajarkan dalam-nya, s-bagimana kbtulan ada dalam Isa:

22ia'itu fasal kamu punya klakuan yang dhulu itu, biar-lah kamu tolakkan kamu punya diri yang lama itu, yang jadi rosak deri sbab k'inginan yang datang deri tipu-daya:

23dan biar-lah kamu di-bharukan dalam kamu punya ingatan punya roh,

24dan pakai kamu punya diri yang bharu itu, yang sudah di-jadikan mnurut tuladan Allah dalam hal kbnaran dan ksuchian yang datang deri-pada kbtulan itu.

25Sbab itu biar-lah kamu tolakkan chakap bohong, dan masing-masing chakap btul sama orang sblah-mnyblah: kerna kita ini mnjadi satu sama lain punya anggota.

26Biar-lah kamu marah dngan t'ada kamu berdosa: jangan simpan marah sampai matahari turun:

27dan jangan kasi tmpat sama iblis.

28Orang yang sudah churi, jangan-lah dia churi lagi: ttapi lbeh baik dia berpnat, dan buat kerja yang baik sama tangan-nya, spaya dia boleh ada apa-apa mau bhagikan k-pada orang yang terkurang.

29Jangan satu perkata'an pun yang busok kluar deri kamu punya mulut, ttapi apa yang baik saja, mau tolong orang sperti dia punya kkurangan, spaya kasi berkat sama orang yang dngar.

30Dan jangan-lah kamu kasi susah-hati sama Roh Allah yang kudus itu, yang dalam-nya kamu sudah di-silkan sampai hari tbusan.

31Buangkan deri-pada kamu sgala kpahitan, dan mradang, dan marah, dan gadoh, dan umpat, dan sgala hati-busok:

32dan biar-lah kamu jadi murah-hati satu sama lain, dan lmbot-hati, serta ampunkan satu sama lain, sperti Allah sudah ampunkan sama kamu dalam Almaseh.


  Share Facebook  |  Share Twitter

 <<  Efesus 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran