Alkitab Mobile SABDA
[VER] : [BABA]     [PL]  [PB] 
 <<  Efesus 6 >> 

1Hei budak-budak, turut-lah prentah mak-bapa kamu dalam Tuhan: kerna ini ada bnar.

2Kasi hormat sama angkau punya mak-bapa (ia'itu-lah hukum yang pertama yang ada perjanjian),

3spaya angkau boleh dapat baik, dan mnjadi panjang-umor di bumi ini.

4Dan kamu smoa yang mnjadi bapa, jangan kamu kasi kamu punya anak marah: ttapi pliharakan dia-orang dngan pngajaran dan nasihat Tuhan.

5Hei hamba-hamba orang, turut-lah prentah orang yang mnjadi kamu punya tuan dalam perkara dunia, dngan takot dan mngglitar, deri-pada tulus hati kamu, sperti k-pada Almaseh;

6bukan-nya sperti kerja bermuka-muka, sperti mau sukakan orang; ttapi sperti hamba Almaseh, yang buat kahandak Allah dngan suka-hati;

7dan buat kerja dngan hati yang baik, sperti k-pada Tuhan, bukan k-pada manusia:

8sbab tahu juga yang apa-apa baik yang masing-masing orang buat, bgitu juga dia nanti dapat balek deri-pada Tuhan, baik hamba baik bebas.

9Hei kamu yang jadi tuan-tuan, buat bgini juga k-pada kamu punya hamba, dan brenti-lah gertak: sbab kamu tahu yang dia yang mnjadi tuan-nya dan tuan kamu pun ada di shorga, dan dia t'ada tengok orang punya rupa.

10Kmdian skali, biar-lah kamu di-kuatkan dalam Tuhan, dan dngan kuat kuasa-nya.

11Pakai-lah s-lngkap snjata Allah, spaya kamu boleh tahan sgala daya-upaya iblis.

12Kerna kita ini bergumol bukan-nya dngan manusia, ttapi dngan sgala prentahan, dan kuasa, dan pnghulu-dunia yang prentahkan ini kglapan, dan dngan smoa kuasa rohani yang jahat di langit.

13Sbab itu biar-lah kamu ambil s-lngkap snjata Allah, spaya kamu boleh tahan dalam tempo yang jahat itu, dan bila kamu sudah habiskan smoa perkara, kamu boleh berdiri ttap.

14Sbab itu biar-lah kamu berdiri ttap, dngan kbtulan itu jadi kamu punya ikat-pinggang, dan pakai kbnaran buat baju-rantai,

15dan kamu punya rajin fasal injil perdamaian itu mnjadi kasut di kaki kamu;

16dan slalu ambil prisai perchaya, dngan itu prisai juga kamu boleh padamkan si-jahat itu punya panah api smoa.

17Dan trima-lah ktopong, ia'itu slamat, dan pdang Roh, ia'itu perkata'an Allah:

18sambil slalu minta do'a dalam Roh dngan do'a dan perminta'an, dan berjaga dalam itu hal dngan s-habis-habis usaha dan perminta'an kerna sgala orang kudus,

19dan kerna sahya ini pun, spaya perkata'an boleh di-bri k-pada sahya bila sahya buka mulut, mau kasi tahu ruhsia injil dngan brani-hati,

20dan deri sbab itu injil-lah sahya mnjadi utusan yang kna pasong; dan lagi spaya dalam hal injil sahya boleh berchakap dngan brani, sperti yang patut sahya chakap.

21Ttapi spaya kamu boleh tahu smoa sahya punya hal, dan apa-kah sahya ada buat, smoa itu Tukhikus nanti kasi tahu, ia'itu sudara yang kkaseh dan playan yang kperchaya'an dalam Tuhan:

22yang sahya sudah hantarkan k-pada kamu kerna itu perkara juga, ia'itu spaya kamu boleh tahu kita punya hal, dan spaya dia boleh hiburkan kamu punya hati.

23Sjahtra-lah k-pada sudara-sudara kita, dan kaseh dngan perchaya, deri-pada Allah Bapa dan deri-pada Tuhan kita Isa Almaseh.

24Anugrah Allah bersama-sama dngan smoa orang yang kaseh sama Tuhan kita Isa Almaseh dngan t'ada kputusan.


  Share Facebook  |  Share Twitter

 <<  Efesus 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2017
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran