Alkitab Mobile SABDA
[VER] : [BABA]     [PL]  [PB] 
 <<  Filipi 2 >> 

1Sbab itu, jikalau dalam Almaseh ada pnghiburan, jikalau ada pmbujokan deri sbab kaseh, jikalau ada perskutuan Roh, jikalau ada ksian dan blas hati,

2gnapkan-lah sahya punya ksuka'an, yang kamu punya hati sama, mnaroh sama kaseh, dan mnjadi s-tuju, dan satu hati;

3jangan satu apa pun deri sbab berlawan-lawan atau sbab sombong, ttapi dngan rndah-hati masing-masing bilangkan lain orang lbeh mulia deri-pada diri:

4jangan masing-masing perhatikan sndiri saja punya perkara, ttapi masing-masing perkara lain orang pun.

5Biar-lah ini macham punya ingat ada sama kamu, sperti sudah ada sama Isa Almaseh:

6ia'itu sdang dia ada rupa Allah, yang dia ada s-tara sama Allah itu dia bilangkan bukan satu perkara yang patut di-gnggamkan,

7ttapi dia sudah kosongkan diri-nya dan ambil hamba punya rupa, dan sudah jadi sama sperti manusia;

8orang jumpa dia ada rupa badan manusia, dan dia rndahkan diri-nya, dan turut prentah Allah sampai kmatian, dan itu pun kmatian di kayu salib.

9Itu sbab-lah Allah sudah sangat tinggikan dia, dan sudah kasi sama dia satu nama yang atas smoa nama:

10spaya dalam nama Isa itu smoa lutut patut terlipat, deri-pada isi langit, dan isi bumi, dan yang di bawah bumi,

11dan spaya sgala lidah boleh mngaku yang Isa Almaseh-lah mnjadi Tuhan, spaya bawa kmulia'an k-pada Allah Bapa itu.

12Sbab itu, hei sgala kkaseh sahya, sperti slalu kamu sudah turut prentah, biar-lah kamu kerjakan kamu sndiri punya slamat dngan takot dan mngglitar, bukan saja waktu sahya ada sama-sama kamu, ttapi skarang pula terlbeh lagi waktu sahya ada jauh deri-pada kamu;

13kerna Allah juga-lah yang bkerja dalam kamu, sampaikan kamu ada itu mau, dan kamu bkerja pun turut sperti Allah punya kahandak yang baik itu.

14Buat-lah smoa perkara dngan t'ada bersungut-sungut dan bertngkar;

15spaya kamu jadi ta'salah dan tulus hati, ia'itu anak-anak Allah yang t'ada chla di antara orang jman yang bengkok dan terbalek, yang antara-nya kamu jadi nyata sperti trang dalam dunia,

16sambil kamu hulorkan perkata'an yang bawa hidop itu; spaya sahya pun boleh mgahkan diri dalam hari Almaseh, sbab sahya punya kahidopan t'ada sia-sia, dan sahya punya pnat pun t'ada sia-sia.

17Ttapi jikalau sahya punya darah pun kna tumpah atas kamu punya iman punya korban dan smbahyang, sahya bersuka-suka juga, dan tumpang suka sama-sama kamu smoa:

18dan bgitu juga biar-lah kamu pun bersuka-suka, dan tumpang suka sama sahya.

19Ttapi dalam Tuhan Isa sahya harap mau hantarkan Timotius k-pada kamu dngan sgra, spaya sahya punya hati boleh ttap bila sahya dapat tahu kamu punya hal.

20Kerna satu orang pun t'ada sama sahya yang sama hati-nya, yang sunggoh-sunggoh nanti pdulikan deri-hal kamu smoa.

21Kerna dia-orang smoa ada tuntut perkara-nya sndiri, bukan-nya Isa Almaseh punya perkara.

22Ttapi kamu tahu dia itu punya klakuan yang sudah kna ujikan, ia'itu sperti satu anak sama bapa-nya, bgitu-lah dia sudah jadi hamba sama-sama sahya dalam kerja jalankan injil.

23Sbab itu, bila sahya tengok apa macham sahya punya hal, sahya harap mau hantarkan dia dngan sgra:

24ttapi dalam Tuhan sahya harap yang sahya sndiri boleh datang dngan sgra.

25Ttapi sahya sudah fikir sahya patut hantarkan Ipafroditus k-pada kamu, ia'itu sahya punya sudara dan kawan dalam pkerja'an dan pprangan, dan dia-lah kamu punya psuroh, yang sudah mlayankan sahya dalam sahya punya kkurangan;

26sdang dia sudah rindu sama kamu smoa, dan sudah mnjadi banyak susah-hati sbab kamu sudah dapat dngar yang dia ada sakit;

27kerna btul juga dia sakit, sampai hampir mati: ttapi Allah sudah ksiankan sama dia, dan bukan saja sama dia, ttapi sama sahya pun, spaya jangan pula sahya kna susah timpa susah.

28Sbab itu sahya lbeh rajin sudah hantarkan dia, spaya bila kamu tengok sama dia lagi s-kali, kamu boleh bersuka-suka, dan spaya sahya pun kurang susah-hati.

29Sbab itu sambot-lah sama dia dalam Tuhan dngan s-pnoh-pnoh ksuka'an; dan hormatkan-lah itu macham punya orang:

30kerna deri sbab pkerja'an Almaseh dia sudah hampir mati, dan buangkan nyawa-nya mau chukopkan apa-apa yang kurang dalam kamu punya playanan sama sahya.


  Share Facebook  |  Share Twitter

 <<  Filipi 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran