Alkitab Mobile SABDA
[VER] : [BABA]     [PL]  [PB] 
 <<  Galatia 6 >> 

1Hei sudara-sudara, sunggoh pun satu orang boleh kna tangkap dalam satu ksalahan, biar-lah kamu yang rohani btulkan itu macham orang dngan hati yang lmah-lmbot, sambil perhatikan angkau punya diri sndiri, spaya jangan angkau pula kna pnchoba'an.

2Biar-lah kamu pikul tanggongan satu sama lain, dan bgini gnapkan-lah hukum Almaseh.

3Kerna jikalau satu orang yang t'ada jadi apa-apa fikirkan diri-nya jadi apa-apa, dia itu tipukan diri-nya sndiri.

4Ttapi biar masing-masing orang ujikan dia sndiri punya pkerja'an, dan bharu-lah dia boleh mgahkan fasal diri-nya, dan bukan fasal lain orang.

5Kerna tiap-tiap orang msti pikul dia sndiri punya tanggongan.

6Biar-lah orang yang trima plajaran deri perkata'an itu bhagikan smoa perkara yang baik k-pada orang yang mngajar.

7Jangan-lah kna tipu; Allah ta'boleh di-olok-olokkan: kerna apa-apa orang mnabur, itu-lah juga dia nanti mnuai.

8Kerna orang yang mnabur deri sbab dia sndiri punya tabi'at dunia, deri-pada tabi'at dunia pun dia nanti mnuai kbinasa'an; ttapi orang yang mnabur deri sbab Roh itu, deri-pada Roh juga dia nanti mnuai hidop yang kkal.

9Dan jangan-lah kita ini mnjadi jlak-jmu buat baik: kerna bila ktika-nya kita nanti mnuai, kalau kita t'ada lteh.

10Jadi itu, s-brapa kita ada smpat, biar-lah kita buat apa yang baik k-pada smoa orang, terlbeh skali k-pada sgala isi rumah perchaya.

11Tengok-lah brapa bsar punya huruf sahya ada tulis k-pada kamu dngan tangan sahya sndiri.

12S-brapa banyak orang yang mau buat rupa-nya sndiri bagus dalam hal dunia, dia-orang paksakan kamu trima sunat; chuma spaya jangan dia-orang kna aniaya deri sbab salib Almaseh.

13Kerna orang yang trima sunat pun t'ada juga pliharakan hukum-taurit; ttapi dia-orang mau kamu ini trima sunat, spaya dia-orang boleh mgahkan diri dalam hal kamu punya badan.

14Ttapi jangan skali-kali sahya ini mgahkan diri sahya, chuma deri-hal salib Tuhan kita Isa Almaseh, yang oleh-nya juga dunia ini sudah di-salibkan k-pada sahya, dan sahya pun k-pada dunia.

15Kerna sunat t'ada apa-apa, dan hal ta'sunat pun t'ada apa-apa, ttapi satu kjadian yang bharu itu-lah.

16Biar-lah sjahtra dan ksian datang di atas s-brapa banyak orang yang bawa diri mnurut ini aturan, dan di atas Isra'el Allah pun.

17Deri-pada ini jam jangan-lah satu orang pun kasi susah sama sahya: kerna di badan sahya ada bawa Isa punya luka punya bkas-bkas.

18Biar-lah anugrah Tuhan kita Isa Almaseh bersama-sama kamu punya roh, hei sudara-sudara. Amin.


  Share Facebook  |  Share Twitter

 <<  Galatia 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran