Alkitab Mobile SABDA
[VER] : [BABA]     [PL]  [PB] 
 <<  Ibrani 12 >> 

1Sbab itu, sdang kita ada di-klilingkan dngan saksi-saksi, sperti awan banyak-nya, baik kita tpikan tiap-tiap pikulan yang brat, dan dosa yang kpongkan kita dngan snang, dan baik kita lari dngan sabar dalam perlumba'an yang ada dpan kita,

2dan mrnong k-pada Isa yang adakan dan smpurnakan kita punya perchaya, yang deri sbab ksuka'an yang ada dpan dia, sudah tahan salib, dngan t'ada pdulikan malu-nya, dan sudah dudok di sblah kanan takhta Allah.

3Kerna timbang-lah dia punya hal yang sudah sabarkan bgitu punya perbantahan deri-pada orang-orang yang buat dosa atas diri-nya sndiri, spaya jangan kamu jadi pnat sbab tawar-hati.

4Dalam kamu punya lawan sama dosa, kamu blum kna tahan sampai berdarah;

5dan kamu sudah lupa itu nasihat yang chakap sama kamu sperti sama anak-anak, "Hei anak, jangan angkau ta'pdulikan Tuhan punya ajaran, Dan jangan tawar-hati bila angkau kna dia kalot:

6Kerna orang yang Tuhan sayang dia ajarkan, Dan tiap-tiap anak yang dia trima dia ssah."

7Kamu ada tahan ini smoa spaya kamu boleh kna ajaran: Allah ada buat kamu sperti dia punya anak-anak: kerna mana ada satu anak yang bapa-nya t'ada ajarkan?

8Ttapi kalau kamu t'ada kna ajaran, sunggoh pun smoa anak-anak sudah dapat bhagian dalam itu hal, kamu mnjadi anak haram, bukan anak btul.

9Lagi pun kita sudah ada bapa di dunia yang sudah ajarkan kita, dan kita sudah kasi hormat sama dia: bukan-kah lbeh patut kita tundok k-pada Bapa sgala roh, sampaikan dapat hidop?

10Kerna dia-orang sudah ajarkan kita sikit hari sperti dia-orang fikir baik; ttapi Allah spaya kasi kita fa'idah, ia'itu spaya kita dapat satu bhagian kkudusan-nya.

11Ini ktika smoa ajaran rasa-nya t'ada mndatangkan suka-hati, ttapi susah-hati: dalam pada itu, kmdian dia nanti kluarkan buah kbnaran yang bawa sntosa k-pada orang yang sudah jadi biasa sama itu ajaran.

12Sbab itu btulkan-lah sgala tangan yang lteh dan lutut yang tepok;

13dan bikin lorong-lorong yang lurus kerna kamu punya kaki, spaya apa yang tempang jangan terplechok, ttapi balek di-smbohkan.

14Tuntut-lah perdamaian dngan smoa orang, dan itu kkudusan, yang kalau t'ada, satu orang pun ta'boleh tengok Tuhan:

15jaga baik-baik spaya jangan satu orang pun t'ada dapat anugrah Allah; dan jangan pula bertumboh apa-apa akar kpahitan yang kasi susah, dan kbanyakan orang kna najis oleh-nya;

16dan jangan ada orang chabol atau orang ssat, sperti Isu, yang sudah jualkan dia punya pangkat anak-sulong deri sbab sikit makanan.

17Kerna kamu tahu yang kmdian deri-pada itu, bila dia mau trima itu berkat jadi dia punya psaka, dia sudah kna tolak (sbab dia t'ada dapat smpat mau bertobat), sunggoh pun dia tuntutkan itu berkat dngan ayer-mata.

18Kerna kamu ada datang bukan k-pada satu gunong yang boleh di-jamah dan yang mnyala dngan api, dan bukan-nya k-pada klam-kabot, dan kglapan, dan ribot,

19dan bunyi trompet, dan bunyi perkata'an, sampaikan orang yang dngar minta jangan lagi apa-apa perkata'an di-chakapkan k-pada dia-orang;

20kerna dia-orang ta'boleh tahan itu psanan, ia'itu, "Jikalau binatang skali-pun jamah itu gunong, dia msti kna hntam batu:"

21dan bgitu takot-lah itu rupa, sampaikan Musa bilang, "Sahya sangat-lah takot dan mngglitar:"

22ttapi kamu ini sudah datang k-pada Gunong Sion, dan negri Allah yang hidop, ia'itu Yerusalim yang di shorga, dan mla'ikat-mla'ikat berlaksa-laksa punya banyak,

23dan perhimponan dan eklisia sgala anak-sulong yang sudah tersurat di shorga, dan k-pada Allah, hakim sklian orang, dan k-pada sgala roh orang bnar yang sudah di-smpurnakan,

24dan k-pada Isa, itu perjanjian yang bharu punya orang-tngah, dan k-pada darah yang di-rnjiskan, yang katakan perkara-perkara lbeh baik deri-pada darah Habil.

25Jaga baik-baik, jangan kamu tolakkan dia yang ada berchakap. Kerna jikalau orang-orang yang tolakkan dia itu yang berchakap di atas bumi t'ada dapat lpas, terlbeh lagi kita ini, yang balek deri-pada dia yang berchakap deri shorga;

26itu waktu dia punya suara gonchangkan ini bumi: ttapi skarang dia sudah janji, dan kata, "Chuma lagi satu kali saja, dan sahya nanti gmpakan bukan saja ini bumi, ttapi langit pun."

27Dan ini perjanjian, "Lagi satu kali saja," arti-nya yang apa-apa yang kna gonchang nanti hilang, ia'itu smoa perkara yang sudah di-jadikan, spaya apa-apa yang t'ada kna gonchang boleh tinggal.

28Sbab itu, sdang kita trima satu kraja'an yang ta'boleh di-gonchangkan, biar-lah kita trima-kaseh, dan dalam itu hal kita boleh buat smbahyang yang berknan k-pada Allah dngan hormat dan takot:

29kerna kita punya Allah jadi satu api yang hanguskan.


  Share Facebook  |  Share Twitter

 <<  Ibrani 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran