Alkitab Mobile SABDA
[VER] : [BABA]     [PL]  [PB] 
 <<  Ibrani 9 >> 

1Jadi itu perjanjian yang pertama pun ada dia punya undang-undang smbahyang, dan tmpat kudus-nya, ia'itu di atas bumi punya.

2Kerna khemah sudah di-lngkapkan, ia'itu yang sblah dpan punya, dalam-nya ada kaki plita, dan meja, dan persmbahan roti; dan itu tmpat di-sbot "tmpat kudus."

3Dan sblah dalam tirai yang nombor dua itu ada khemah yang di-sbot "tmpat yang kudus skali;"

4dan di situ ada perasapan mas, dan pti perjanjian yang bersalut kliling-nya dngan mas, dan pasu mas yang isi Manna, dan tongkat Harun yang berputek, dan itu dua papan loh perjanjian;

5dan atas-nya itu dua karub kmulia'an yang lindongkan itu tmpat perdamaian: fasal itu smoa kita skarang ta'boleh chakapkan satu-satu.

6Bila ini smoa sudah lngkap bgini, itu imam-imam slalu masok dalam khemah yang di dpan, dan buat kerja smbahyang;

7ttapi yang masok dalam khemah yang nombor dua, chuma kpala-imam saja, satu tahun satu kali, dan itu pun bukan dngan t'ada darah, yang dia persmbahkan kerna diri-nya, dan kerna itu bangsa punya silap:

8dalam ini hal Roh Alkudus trangkan yang jalan masok tmpat yang kudus itu blum lagi di-nyatakan, s-lama khemah yang di dpan itu ada berdiri;

9dan itu mnjadi perumpama'an kerna waktu yang skarang ini ada; dan dalam itu perumpama'an orang ada bawa persmbahan dan korban yang t'ada kuasa smpurnakan dalam angan-angan hati-nya orang yang buat itu smbahyang,

10sdang itu (dngan dia punya makanan dan minuman dan jnis-jnis punya adat-chuchi smoa) chuma undang-undang fasal badan saja, yang di-ltakkan sampai waktu smoa perkara di-btulkan s-mula.

11Ttapi Almaseh sudah datang mnjadi kpala-imam dalam perkara-perkara yang baik yang mndatang, trus khemah yang lbeh bsar dan lbeh smpurna, yang bukan perbuatan tangan manusia, ia'itu bukan deri ini kjadian,

12dan bukan oleh darah kambing-kambing dan anak-lmbu, ttapi oleh dia sndiri punya darah, dia sudah masok satu kali saja dalam tmpat yang kudus, bila dia sudah dapat tbusan yang kkal.

13Kerna jikalau kambing dan lmbu jantan punya darah, dan kalau lmbu btina punya habu, yang di-perchek atas orang yang sudah najis, boleh kuduskan sampai badan berseh;

14brapa lagi pula darah Almaseh, yang oleh Roh yang kkal sudah persmbahkan diri-nya dngan t'ada chla k-pada Allah, boleh bersehkan kamu punya angan-angan hati deri-pada perbuatan yang mati, spaya kamu boleh buat smbahyang k-pada Allah yang hidop?

15Dan deri sbab ini-lah dia mnjadi orang tngah dalam perjanjian yang bharu, spaya orang yang di-panggil itu boleh trima psaka yang kkal, yang sudah di-janjikan k-pada-nya, sdang sudah ada satu kmatian mau tbuskan ksalahan yang orang sudah buat waktu perjanjian yang pertama.

16Kerna di mana ada satu wasiat, ta'boleh tidak orang yang bikin itu wasiat msti sudah mati.

17Kerna satu wasiat ada kuat kalau orang sudah mati: kerna s-lagi orang yang bikin wasiat itu ada hidop, mana-kah kuat-nya?

18Deri sbab ini, perjanjian yang pertama itu sudah di-tntukan bukan-nya dngan t'ada darah.

19Sbab bila Musa sudah katakan smoa hukum k-pada s-gnap bangsa itu turut sperti hukum-taurit, dia ambil anak-anak lmbu dan kambing-kambing punya darah, dngan ayer dan bulu domba yang werna merah, dan zufa, dan dia rnjiskan itu kitab dan s-gnap bangsa itu,

20dan kata, "Ini-lah darah perjanjian yang Allah sudah psan k-pada kamu."

21Dan lagi pun, itu khemah dan smoa perkakas smbahyang dia rnjiskan bgitu juga dngan itu darah.

22Dan hampir-hampir boleh kata, kalau turut hukum-taurit smoa perkara di-bersehkan dngan darah, dan lain deri-pada mnumpah darah tidak ada ampun.

23Sbab itu patut-lah smoa perkara yang di shorga punya chontoh di-bersehkan dngan ini smoa; ttapi perkara-perkara yang di shorga pula dngan korban yang lbeh baik deri-pada ini smoa.

24Kerna Almaseh sudah masok bukan-nya tmpat kudus yang perbuatan tangan manusia, yang mnjadi tmpat kudus yang btul punya chontoh; ttapi sudah masok shorga skali pun, spaya skarang dia boleh mnghadap dpan Allah kerna kita;

25dan bukan-nya spaya dia persmbahkan diri-nya krap-krap kali; sperti kpala-imam tahun-tahun masok tmpat kudus dngan darah yang bukan dia sndiri punya;

26kalau bgitu dia msti kna mati banyak kali deri waktu kjadian dunia: ttapi skarang waktu pnghabisan smoa jman, satu kali saja dia sudah di-nyatakan mau hapuskan dosa oleh korban diri-nya sndiri.

27Dan sdang sudah di-tntukan yang manusia msti satu kali mati, dan kmdian pula hukuman;

28bgitu juga Almaseh pun, bila dia satu kali sudah di-persmbahkan spaya boleh mnanggong dosa orang banyak, dia nanti ternampak nombor dua kali, dngan t'ada mnanggong dosa lagi, k-pada orang-orang yang mnantikan dia, mau slamatkan dia-orang.


  Share Facebook  |  Share Twitter

 <<  Ibrani 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel