Dual Panel1Hikayat yang pertama sahya sudah karang, Tiofilus, deri-hal smoa perkara yang Isa sudah mula'i berbuat dan mngajar pun,
2sampai itu hari yang dia sudah di-bawa naik, kmdian deri-pada dia sudah kasi hukum oleh Roh Alkudus k-pada rasul-rasul yang dia sudah pileh.
3Dan k-pada dia-orang Isa sudah nyatakan diri-nya hidop kmdian deri-pada sngsara-nya dngan banyak ktangan, dan sudah tunjokkan diri-nya k-pada dia-orang ampat-puloh hari punya lama, dan sudah katakan perkara-perkara deri-hal kraja'an Allah:
4dan bila dia sudah berhimpon dngan dia-orang, dia psan dia-orang jangan pergi deri Yerusalim, ttapi nantikan perjanjian Bapa "yang kamu sudah dngar deri-pada sahya;
5kerna Yahya juga sudah baptiskan orang dngan ayer; ttapi kamu nanti di-baptiskan dngan Roh Alkudus t'ada brapa hari lagi."
6Sbab itu, bila dia-orang sudah berhimpon, dia-orang tanya sama dia, "Tuhan, waktu ini-kah Tuhan mau pulangkan kraja'an k-pada orang Isra'el?"
7Dan Isa kata sama dia-orang, "T'ada di-bri k-pada kamu yang kamu boleh tahu smoa waktu atau ktika, yang Bapa sudah tntukan dalam prentah-nya sndiri.
8Ttapi kamu nanti trima kuasa bila Roh Alkudus turun atas kamu: dan kamu nanti mnjadi sahya punya saksi, baik di Yerusalim, baik pada sluroh Yahudiah dan Samariah, dan sampai hujong bumi."
9Dan bila dia sudah kata bgini, dia sudah di-bawa naik s-tngah dia-orang pandang; dan satu awan trima dia, sampai hilang deri-pada mata dia-orang.
10Dan ktika dia-orang mrnong k-langit waktu Isa naik, ada dua orang yang pakai puteh berdiri dkat dia-orang,
11dan kata, "Hei orang Galil, knapa kamu berdiri pandang k-langit? ini Isa juga, yang sudah di-bawa naik deri-pada kamu k-langit, bgitu juga nanti datang sperti kamu tengok dia pergi k-langit."
12Kmdian dia-orang balek k-Yerusalim deri gunong bernama Zaitun, yang dkat Yerusalim, satu perjalanan hari perhentian punya jauh.
13Dan bila dia-orang sudah masok negri, dia-orang naik bilek loteng di mana dia-orang ada tinggal; ia'itu Petrus dan Yahya dan Yakob dan Andrias, Filipus dan Tomas, Bar-Tolmai dan Matius, Yakob anak Alfius, dan Simon Zilotis, dan Yudas anak Yakob.
14Smoa-nya ini dngan satu hati ttap mminta do'a dngan prempuan-prempuan, dan Mariam Isa punya mak, dan dngan sudara-sudara-nya.
15Dalam itu tempo Petrus berdiri di antara itu sudara-sudara (dan ada banyak orang berkumpol, lbeh kurang s-ratus dua-puloh) dan Petrus kata,
16"Sudara-sudara, patut-lah surat itu di-bnarkan yang Roh Alkudus sudah katakan oleh mulut Da'ud deri-hal Yudas, yang sudah jadi pmimpin k-pada orang-orang yang tangkap Isa.
17Kerna Yudas sudah di-bilangkan di antara kita, dan sudah dapat bhagian dalam playanan ini."
18(Ini orang sudah dapat satu tanah dngan upah kjahatan-nya, dia jatoh tunggang-langgang, dan terblah prot-nya di tngah-tngah, terkluar smoa isi prot-nya.
19Dan smoa orang yang tinggal di Yerusalim dapat tahu ini hal, sampai itu tanah di-namakan dngan bhasa-nya, 'Akildama,' ia'itu Tanah Darah.)
20"Kerna ada tersurat dalam kitab Mazmur, Biar-lah tmpat kdudokan-nya mnjadi sunyi, Dan jangan orang tinggal dalam-nya:' dan lagi, Biar-lah lain orang ambil pangkat-nya.'
21Sbab itu antara smoa orang yang sudah ada bserta dngan kita, s-lama Tuhan Isa kluar masok antara kita,
22mula'i deri-pada baptisan Yahya sampai itu hari yang Isa sudah di-bawa naik deri-pada kita, deri antara orang-orang ini msti ada satu mnjadi saksi dngan kita deri-hal kbangkitan Isa."
23Kmdian dia-orang tntukan dua orang, ia'itu Yusof yang di-sbot Bar-sabbas dan diglar Yustus pun, sama Mattias.
24Dia-orang minta do'a kata-nya, "Ya Tuhan, yang tahu hati sklian orang, tunjokkan-lah antara ini dua orang yang mana Tuhan sudah pileh,
25spaya dia boleh ambil tmpat dalam ini playanan dan pkerja'an rasul, yang deri-pada-nya Yudas sudah jatoh, spaya dia pergi k-tmpat-nya sndiri."
26Dia-orang buang undi atas ini dua; dan Mattias terkna undi; kmdian dia sudah di-bilang bersama-sama s-blas rasul itu.