Dual Panel1Ttapi ada satu orang bernama Hananiah, dngan bini-nya Safira, yang sudah jual satu herta,
2dan sudah smbunyikan s-bhagian deri-pada herga-nya, bini-nya pun tahu, dan bawa s-bhagian dan ltakkan di kaki rasul-rasul.
3Ttapi Petrus kata, "Hei Hananiah, knapa Setan sudah pnohkan angkau punya hati mau chakap bohong sama Roh Alkudus, dan smbunyikan deri-pada herga tanah itu?
4S-lagi itu tanah tertinggal, bukan-kah tinggal angkau punya? dan bila sudah jual pun, bukan-kah itu dalam angkau punya kuasa? Bagimana-kah angkau sudah taroh ini perkara dalam angkau punya hati? Angkau sudah chakap bohong bukan sama manusia, ttapi sama Allah."
5Bila Hananiah dngar ini perkata'an, dia jatoh dan putus nyawa: dan takot yang bsar datang atas smoa orang yang dngar ini.
6Dan orang muda-muda bangun, kapankan dia, dan dia-orang angkatkan dia kluar, dan tanamkan dia.
7Dan ada lbeh-kurang tiga jam bgitu, bini-nya pula masok dngan t'ada dapat tahu apa yang sudah jadi.
8Dan Petrus kata sama dia, "Kata sama sahya jikalau kamu sudah jual itu tanah s-kian herga." Dan dia jawab, "Ya, s-kian banyak."
9Dan Petrus kata sama dia, "Bagimana pula kamu dua-dua sudah berpakat mau choba sama Roh Tuhan? tengok, kaki orang yang sudah tanam laki angkau ada di pintu, dan dia-orang nanti angkatkan angkau kluar.
10Dan itu juga dia jatoh di kaki rasul itu, dan putus nyawa-nya: dan orang muda-muda itu masok, dan jumpa itu prempuan sudah mati; dia-orang angkat dia kluar, dan tanamkan dia sblah laki-nya.
11Dan takot yang bsar datang atas s-gnap eklisia, dan atas sgala orang yang dngar.
12Dan banyak tanda-tanda dan perkara yang hairan sudah di-jadikan oleh rasul-rasul punya tangan antara orang bangsa itu; dan dia-orang smoa dngan satu hati berhimpon dalam srambi Sulaiman.
13Ttapi antara orang lain, t'ada satu orang pun brani champur sama dia-orang: ttapi orang bangsa itu muliakan dia;
14dan orang yang perchaya lbeh lagi bertambah-tambah pada Tuhan, banyak skali orang jantan dan prempuan pun;
15sampai dia-orang bawa kluar orang-orang sakit di jalan bsar pun, terltak di tilam dan tmpat tidor, spaya bila Petrus lalu, dia punya bayang saja boleh kna s-barang orang.
16Dan banyak skali orang deri negri-negri kliling Yerusalim sudah berkumpol serta bawa orang sakit dan orang yang terkna jin yang najis: dan tiap-tiap orang sudah di-smbohkan.
17Ttapi imam-bsar itu bangun, dngan smoa orang yang sblah dia (ia'itu orang Saduki punya kampongan), dan hati dia-orang pnoh-lah dngan dngki,
18dan dia-orang tangkap rasul-rasul dan kasi masok negri punya jel.
19Ttapi tempo malam satu mla'ikat Tuhan bukakan sgala pintu jel, dan bawa dia-orang kluar, serta kata,
20"Pergi-lah kamu, berdiri dalam ka'abah dan katakan k-pada bangsa itu smoa perkata'an deri-hal ini hidop."
21Dan bila dia-orang sudah dngar bgini, dia-orang masok dalam ka'abah s-blum trang tanah, dan mngajar. Ttapi imam-bsar datang, dngan smoa orang yang sblah dia, dan panggil bichara bsar dan smoa orang tua-tua anak Isra'el, dan dia-orang suroh orang pergi jel bawa dia datang.
22Ttapi mata-mata yang pergi t'ada dapat dia-orang dalam jel; dan dia-orang pulang kasi khabar,
23kata-nya, "Kita jumpa jel terkunchi tgoh skali, dan pnunggu-pnunggu pun berdiri di muka pintu: ttapi bila kita sudah buka, kita t'ada dapat satu orang pun di dalam-nya.
24Bila pnghulu ka'abah dan kpala-kpala imam dngar ini perkata'an, dia-orang jadi bimbang-hati deri-hal rasul-rasul, 'ntah apa-kah ini perkara nanti jadi.
25Dan datang pula satu orang, yang kata sama dia-orang, "Tengok, itu orang yang kamu sudah kasi masok jel ada dalam ka'abah, dan berdiri mngajar orang bangsa ini."
26Habis itu pnghulu ka'abah pergi dngan mata-mata, dan bawa dia-orang datang, ttapi bukan dngan kras; sbab takot orang bangsa itu, barangkali dia-orang nanti kna hntam batu.
27Dan bila dia-orang sudah bawa rasul-rasul, dia-orang kasi dia berdiri dpan bichara itu, dan imam-bsar tanya dia-orang,
28kata-nya, "Bukan-kah dngan kras kita sudah larangkan kamu jangan mngajar dalam ini nama? tengok, kamu sudah pnohkan satu Yerusalim dngan kamu punya ajaran, dan lagi kamu punya maksud mau tanggongkan ini orang punya darah atas kita."
29Ttapi Petrus dan rasul-rasul jawab dan kata, "Kita msti turut prentah Allah lbeh deri-pada prentah manusia.
30Allah nenek-moyang kita sudah bangkitkan Isa, yang kamu sudah bunoh dngan gantongkan dia di atas kayu salib.
31Dia-lah yang Allah sudah tinggikan dngan tangan kanan-nya, mnjadi Raja dan Juru-slamat, mau kasi taubat sama orang Isra'el, dan ampun dosa.
32Dan kita mnjadi saksi deri-hal smoa perkara ini; dan Roh Alkudus pun, yang Allah sudah kasi sama orang yang turut dia punya prentah."
33Bila dia-orang dngar ini, dia-orang punya hati jadi terlalu panas, dan maksud-nya mau bunoh itu rasul-rasul.
34Ttapi ada satu orang Farisi, bernama Gamali'el, satu orang yang mngajar taurit, yang smoa orang bangsa itu kasi hormat, dia berdiri dalam itu bichara, dan suroh kluarkan itu rasul-rasul s-kjap.
35Dan dia kata sama dia-orang, "Hei orang Isra'el, jaga kamu punya diri baik-baik deri-hal ini orang, apa-apa kamu mau buat.
36Kerna dhulu deri-pada ini ada satu orang bernama Tiudas, yang sudah buat diri-nya orang bsar; dan kira-kira ampat-ratus orang sudah masok sblah dia: dia sudah kna bunoh; dan orang-orang yang ikut sama dia berpchah sana sini, dan t'ada jadi apa-apa.
37Habis itu pula sudah terkluar Yudas, orang Galil, ktika orang kna banchi, dan dia sudah tarek orang ikut sama dia: ttapi dia pun sudah mati, dan smoa yang turut prentah-nya sudah chrai-brai.
38Dan skarang sahya kata sama kamu, jauhkan kamu punya diri deri-pada ini orang, dan diamkan dia; kerna jikalau ini pakatan atau ini pkerja'an deri-pada manusia, tntu smoa nanti habis terbuang:
39ttapi kalau deri-pada Allah, kamu t'ada boleh buangkan: dan jangan pula kamu jadi mlawan Allah."
40Dan dia punya chakap dia-orang dngar: dan bila dia-orang sudah panggil rasul-rasul, dia-orang ssahkan, dan psan dia-orang jangan berchakap dalam nama Isa, dan kasi dia-orang pergi.
41Sbab itu dia-orang kluar deri dpan bichara, dngan suka-hati sbab dia-orang sudah di-bilangkan layak kna malu kerna nama itu.
42Dan s-hari-hari, baik di ka'abah atau di rumah, dia-orang t'ada brenti mngajar dan khabarkan yang Isa-lah Almaseh.