Dual Panel1Dan itu imam-bsar kata, "Btul-kah smoa ini perkara bgitu?"
2Dan dia jawab, "Hei sudara-sudara dan ngchek-ngchek, dngar-lah. Allah yang maha mulia sudah nyatakan diri-nya sama kita punya nenek-moyang Ibrahim, ktika dia di negri Masopotamiah, s-blum dia tinggal di negri Haran,
3dan sudah kata sama dia, 'Kluar-lah deri-pada angkau punya tanah, dan deri-pada angkau punya chikeweh, dan mari masok itu tanah yang sahya nanti tunjokkan sama angkau.'
4Habis itu dia kluar deri negri orang Kasdim, dan tinggal di Haran: dan deri situ, bila dia punya bapa sudah mati, Allah sudah pindahkan dia datang ini negri di mana kamu skarang ada tinggal.
5Dan Allah t'ada kasi dia satu psaka pun dalam-nya, satu kaki tanah pun t'ada: dan dia sudah janji mau kasi ini tanah sama dia, mnjadi dia punya herta, dan sama dia punya anak-chuchu, bila dia blum ada anak lagi.
6Bgini-lah Allah sudah bilang, yang Ibrahim punya kturunan nanti mnumpang di negri asing, dan orang nanti buatkan hamba sama dia-orang, dan aniayakan dia-orang, ampat-ratus tahun punya lama.
7Dan Allah kata, 'Bangsa yang buat dia-orang hamba, sahya nanti hukumkan: habis itu dia-orang nanti kluar dan buat smbahyang sama sahya dalam ini tmpat.'
8Dan Tuhan sudah kasi dia perjanjian sunat; dan dalam hal itu Ibrahim beranakkan Isahak, dan sunatkan dia pada hari yang k-lapan; dan Isahak beranakkan Yakob, dan Yakob beranakkan dua-blas nenek-moyang kita itu.
9Dan sbab dngki-hati kita punya nenek-moyang sudah jualkan Yusof k-negri Masir:
10dan Allah ada bserta dngan dia, dan lpaskan dia deri-pada smoa ksusahan-nya, dan kasi dia anugrah dan bijaksana dpan Fira'un, raja Masir; dia sudah jadikan dia gobernor atas negri Masir dan s-gnap istana-nya.
11Sudah datang pula satu klaparan atas sluroh negri Masir dan negri Kana'an, dngan ksusahan yang bsar, dan nenek-moyang kita t'ada dapat makan.
12Ttapi bila Yakob dngar yang di Masir ada trigu, dia suroh nenek-moyang kita pergi sana nombor satu kali.
13Dan nombor dua kali Yusof nyatakan diri-nya sama dia punya sudara; bharu-lah Fira'un tahu Yusof punya bangsa.
14Dan Yusof suroh orang panggil dia punya bapa Yakob, dan smoa chikeweh-nya, tujoh-puloh-lima orang.
15Jadi, Yakob turun k-Masir, dan di situ dia mati, dan sgala nenek-moyang kita pun;
16dan orang bawa dia-orang punya mayat di negri Shakim, dan tanamkan di kubor yang Ibrahim sudah bli dngan wang perak di Shakim deri-pada anak-buah Hamor.
17Ttapi bila sudah dkat itu waktu perjanjian yang Allah sudah janji sama Ibrahim, orang bangsa itu bertambah-tambah dan jadi ramai di negri Masir,
18sampai terkluar satu raja Masir yang lain, yang t'ada tahu sama Yusof.
19Dia sudah tipu sama bangsa kita, dan aniayakan nenek-moyang kita, dan paksakan dia-orang buangkan dia-orang punya anak-anak kchil, spaya jangan hidop lagi.
20Ini waktu Musa sudah jadi, dan dia chantek skali; dan orang sudah piarakan dia tiga bulan dalam rumah bapa-nya.
21Bila dia sudah kna buang, Fira'un punya anak-prempuan pungut sama dia, dan piarakan dia sperti anak-sndiri-nya.
22Dan Musa sudah dapat plajaran dalam hal sgala kpandaian orang Masir; dan dia berkuasa dalam perkata'an dan perbuatan.
23Ttapi bila umor-nya sudah ampat-puloh tahun, hati-nya teringat mau mlawat sudara-sudara-nya anak-anak Isra'el.
24Dan dia tengok satu orang kna aniaya, dan bantu sama dia, serta balaskan kerna orang yang sudah di-seksakan, dan bunoh itu orang Masir:
25dan dia sudah sangka yang sudara-sudara-nya nanti mngerti bagimana Allah mau lpaskan dia-orang dngan dia punya tangan: ttapi dia-orang t'ada mngerti.
26Besok-nya ktika dia-orang berklahi Musa ternampak sama dia-orang, dan mau damaikan dia-orang, kata-nya, 'Hei tuan-tuan, kamu ini sudara, knapa pula mau aniayakan satu sama lain?'
27Ttapi orang yang aniayakan kawan-nya tolakkan Musa, kata-nya, 'Siapa sudah tntukan angkau jadi kpala dan hakim atas kita?
28Mau-kah angkau bunoh sama sahya sperti angkau sudah bunoh itu orang Masir s-malam?'
29Musa lari sbab ini perkata'an, dan mnumpang di tanah Midian, dan di sana dia beranakkan dua anak dlaki.
30Dan bila sudah lpas ampat-puloh tahun, satu mla'ikat ternampak sama dia di tanah sunyi dkat gunong Tur-Sina, dalam pokok duri punya nyala-api.
31Dan bila Musa tengok itu, dia hairan sama itu pnglihatan: dan ktika dia datang dkat mau tengok, ada satu suara Tuhan,
32'Sahya ini-lah Allah nenek-moyang-mu, Allah Ibrahim dan Isahak dan Yakob. 'Dan Musa mnglitar, t'ada brani tengok.
33Tuhan kata sama dia, 'Buka-lah angkau punya kasut deri kaki, kerna tmpat yang angkau berdiri, itu-lah tanah yang suchi.
34Sunggoh-lah sahya sudah tengok aniaya yang orang bangsa sahya di negri Masir ada tanggong, dan sahya sudah dngar dia-orang mngrang, dan sahya sudah turun mau lpaskan dia-orang: skarang mari-lah, sahya mau suroh angkau masok negri Masir.'
35Ini Musa yang dia-orang ta'mau trima, kata-nya, 'Siapa sudah tntukan angkau jadi kpala dan hakim?' dia-lah yang Allah sudah hantarkan jadi kpala dan pnolong, dngan tangan mla'ikat yang ternampak sama dia di dalam pokok duri.
36Ini orang bawa dia-orang kluar, bila dia sudah buat perkara hairan dan tanda-tanda di negri Masir dan di laut Kulzum dan di tanah sunyi ampat-puloh tahun punya lama.
37Ini-lah itu Musa yang sudah kata sama anak-anak Isra'el, 'Allah nanti angkatkan kerna kamu deri antara sudara-sudara-mu satu nabi, sperti sahya ini.'
38Ini-lah dia-itu yang ada dalam eklisia di tanah sunyi sama-sama itu mla'ikat yang sudah berchakap sama dia di gunong Tur-Sina, dan sama-sama nenek-moyang kita: dia sudah trima sgala perkata'an yang hidop, spaya boleh srahkan k-pada kita:
39kita punya nenek-moyang ta'mau turut prentah-nya, ttapi sudah halaukan dia, dan dalam hati-nya balek pergi negri Masir,
40serta kata sama Harun, 'Bikinkan kita datok-datok yang boleh pergi dpan kita: kerna deri-hal ini Musa yang sudah bawa kita kluar deri negri Masir, kita ta'tahu 'ntah apa-kah sudah jadi sama dia.'
41Dan itu waktu dia-orang sudah bikin satu anak lmbu, dan bawa satu korban sama itu patong, dan bersuka-suka dalam perbuatan tangan-nya.
42Ttapi Allah berbalek, dan srahkan dia-orang spaya buat smbahyang sama sgala tntra langit; sperti sudah tersurat dalam buku nabi-nabi, 'Hei isi rumah Isra'el, sudah-kah kamu bawa binatang smblehan dan korban k-pada sahya Di tanah sunyi ampat-puloh tahun punya lama?
43Dan kamu sudah angkat khemah Molok, Dan bintang datok Rifan, Ia'itu patong-patong yang kamu sudah buat mau berlutut sama dia: Dan sahya nanti pindahkan kamu pergi sblah sana negri Babil.'
44Kita punya nenek-moyang ada itu khemah ksaksian di tanah sunyi, sama sperti dia sudah tntukan yang chakap sama Musa, suroh buat itu ikut chontoh yang dia sudah tengok.
45Dan nenek-moyang kita yang ikut Yush'a pula sudah trima itu dan bawa masok, bila dia-orang ambil tanah sgala orang bangsa asing, yang Allah halaukan di dpan nenek-moyang kita sampai jman Da'ud:
46yang dapat anugrah dpan Tuhan, dan minta chari satu tmpat kdiaman kerna Yakob punya Allah.
47Ttapi Sulaiman sudah naikkan rumah kerna dia.
48Dalam pada itu, Yang Maha Tinggi itu t'ada tinggal dalam rumah yang di-bikin oleh tangan manusia; sperti nabi itu kata,
49Shorga-lah sahya punya takhta, Dan bumi-lah alas kaki sahya: Apa macham rumah yang kamu mau naikkan kerna sahya? kata Allah: Atau yang mana-kah tmpat perhentian sahya?
50Bukan-kah sahya punya tangan juga yang sudah bikin sklian ini?'
51Hei orang yang kpala kras dan yang t'ada bersunat dalam hati dan kuping, kamu-lah slalu mlawan Roh Alkudus: sperti nenek-moyang kamu, bgitu juga kamu pun.
52Deri antara nabi-nabi, siapa-kah yang kamu punya nenek-moyang t'ada aniayakan? dan dia-orang sudah bunoh orang-orang yang lbeh dhulu kasi tahu deri-hal kdatangan Orang Bnar itu; dan skarang kamu-lah yang sudah srahkan dan bunoh dia:
53kamu juga yang sudah trima hukum-taurit dngan prentah mla'ikat, dan t'ada simpankan."
54Bila dia-orang dngar ini smoa, dia-orang punya hati jadi terlalu panas, dan dia-orang gertakkan gigi-nya sama dia.
55Ttapi dia, pnoh dngan Roh Alkudus, mrnong k-langit, dan nampak kmulia'an Allah, dan Isa berdiri sblah kanan Allah,
56dan dia kata, "Tengok, sahya nampak langit terbuka, dan Anak-manusia itu berdiri di sblah kanan Allah."
57Ttapi dia-orang bertriak dngan suara yang bsar, dan tutopkan dia-orang punya kuping, dan serbu sama dia dngan satu hati:
58dan dia-orang buangkan dia kluar negri, dan hntam batu sama dia: dan saksi-saksi itu ltakkan dia-orang punya pakaian di kaki satu orang muda yang bernama Sa'ul.
59Dan dia-orang hntam batu sama Stifanus waktu dia bertriak k-pada Tuhan, kata-nya, "Ya Tuhan Isa, trima-lah sahya punya roh."
60Dan dia berlutut, dan bertriak dngan suara yang bsar, "Ya Tuhan, jangan tanggongkan ini dosa atas dia-orang." Dan bila dia sudah kata ini, dia tertidor.